Ndanieri 7

Kîoneki kîa Ndanieri kîa nyamû inya

1 Mwankaani wa mbere wa wathani bwa mûnene Berisasa wa Mbabironi, Ndanieri n'arootire na oona bioneki amaami ûrîrî bwake. Rîru aandîka kîrooto gîku. Na ûûgû i bu gîakari, 2 “Utugû, niû Ndanieri, ndoona kîonekiini nduuo inya cia îgûrû ciainainia îria rîra rînene, 3 na nyamû inya inene itabuaneene ciauma ku. 4 Ya mbere yakari ta Cimba na yarî na mathabu ma ndiiû. Kaîrî ndaithîîrîîtie woogu, mathabu mamu maayo maakûûrwa, na yaûkîîrua kuuma nthî na yarûngamua na magûrû maîrî ta muntû, yacooka yeewa mathûgaania ta ma muntû. 5 Nyamû yîngî ya ciîrî yaumîra, n'yo yakari ta ndû. Na rûteere rûmwe rwayo rwarî rûûkîîru, na n'yarî na mbaru ithatû kanyuani kaayo ira yarûmîîte na magego yacooka yerwa, ‘Ûkîîra, ûrîe nyama cia mîîrî îmingî wa bûra ûkaûmba!’ 6 Nyuma ya ûgu ndaithîîte, ndoona nyamû îîngî yaumîîra, n'yo yakari ta Ngo. Yarî na mathabu mana mûgongooni wayo na n'yarî na biongo bina, yacooka yaneenkerwa wathani. 7 Nyuma ya ûgu ndacooka ndoona kîonekiini gîakwa ûtugû nyamû ya inya yaumîîra. Yarî ya kûmakania na înthûûku na n'yarî na inya înene. Yarî na magego maanene ma cuuma, yarîîyaga, îkaunanga tûcuncî, na kîra gîatigara îgakinyangîra nthî na mbayo ciayo. Nyamû îno yarî mwanya mûno na nyamû ira ciarî ikuumîra mbere na yarî na ngoci îkûmi. 8 Wa ndaithîîte ngoci inu woogu, ndoona kagoci kangî kaniini kaumîîra gatîgatî ka ira îkûmi, na kaingo koonerwa mwanya, ngoci cia mbere ithatû ciakûûrwa na mîri. Na kagoci gaka kaarî na meetho ta ma muntû, na i kaarî na kanyua kaaragia mantû ma wîkumia.”

Îgamba mbere ya ûra ûtûûraga kuuma tene

9 Wa ndaithîîrîîtie woogu, ndoona itî bia ûnene biabanganua, na ûra ûtûûraga tene na tene aakarîra kîmwe kîa bio, nguo ciake ciarî injerû ta mbaraabu, na ntundu cia kîongo gîake ciakari ta guaya înjerû ce, gîtî gîake kîa ûnene kîarî ndîrîmbî inene, na nthigû cia kîo ciarî mwanki ûgwankana. 10 Muuro wa mwanki n'waumaga gîtîîni gîku mbere yake. I kwarî na magiri na magiri ma antû bara bamûtûmîkagîra, na mamiirioni ma antû i baarûngi mbere yake. Kooti ya kûgambithania yambîîria na mabuku namo maarugûrwa. 11 Ndaithîîte woogu, nwa ndeegagua mantû ma wîkumia mara kagoci gaku kaaragia. Na ndaithîîte woogu, nyamû îra ya inya yaûragwa na mwîrî wayo gwenyangua na wabîîthua na mwanki. 12 Na nyamû inu ciingî nacio, ûnene bwa cio bwathûkua îndî cietîgîîrua gûtûûra kwa îgiita. 13 Wa nthiîte mbere kûraitha kîonekiini gîakwa ûtugû, ndoona mbere yakwa ûra aakari ta muntû aayîîte arî matuuni ma îgûrû. Na aaya kîrî ûyu ûtûûraga tene na tene aareetwa mbere yake. 14 Aanenkerwa wathani ûkumio na ûnene, i kaingo antû bonthe, mîgongo na ndwaria i mûtûmîkîra. Wathani bwake i wathani bûgaatûûra na bûra bûtakîthira na bûtikooro bwînyangua.

Bioneki bia Ndanieri biataûrwa

15 Niû Ndanieri, i ndaatangîkire nkorooni yakwa, na bioneki bibu biakwa biamakia. 16 Ndaatheengeera ûmwe wa antû babu baarûûngi agu mbere ndamûûria bûra mantû mama moonanagia. Nwe eetîgîîria kûmbumbûrîra ûtaûri bwa mantû mamu. 17 “Nyamû ino nene inya i moonene mana mara makaumîîra nthîgûrû. 18 Îndî bara batheru ba Ngai Ûra Arî Îgûrû Mûno bakaathûkia ûnene na baathane tene na tene.”

19 Rîru ndeenda kûmenya mûno mantû ma nyamû ya inya, n'ûntû yarî mwanya na nyamû ira ingî, yarî ya kûmakania na magego maarî ma cuuma na nkunyû cia rûthuku, yaarîîyaga na îkaunanga tûcuncî na kîra gîatigara îgakinyanga na mbayo ciayo. 20 Kaîrî i ndeendire kûmenya mantû ma ngoci îkûmi, na kinya kagoci kara kaumire na ngoci ithatû ciakûûrwa kaingo koonerwa mwanya. Kagoci gaka i kaarî na meetho na kanyua kaaragia na wîkumia, na gagakara tako kanene kîrî ira ingî. 21 Ndaithîîte woogu, kagoci gaka kambîîria ndûa na atheru na gakîbacindaga, 22 mwanka ûra ûtûûraga tene na tene aaya agaamba akîgwataga mbaru atheru ba Ûra Ûrî Îgûrû, na mwanka kagiita gaakinya ga kwîgwatîra ûnene bwa îgûrû. 23 Na ûûgû i bu aambîîrire, “Nyamû înu ya inya n'ûnene bûra bûkaumîîra nthîgûrû bûrî mwanya mûno na moonene mara mangî monthe. Bûkaathiria nthîgûrû yonthe, na bûmîkinyangîre nthî, na bûmiunange tûcuncî tûcuncî. 24 Nacio ngoci inu îkûmi n'anene bara îkûmi bakaumîîra kwathana, na kûrî ûngî akaumîîra nyuma ya babu. Ûyû akeethîrwa arî mwanya na babu ba mbere, n'we akaagwîthia babu bangî bathatû. 25 Akaaria mantû kîînyume na Ûra Arî Îgûrû Mûno, na ainyîîrie atheru baake, na akaageria kûgarûra magiita mara matheru amwe na mawatho, na atheru bakaanenkanîrwa njaraani ciake bantû a mîanka îthatû na nucu. 26 Rîru kooti ya îgûrû îkare nthî kûgambithania na atuunywe wathani bwake, bûbîîthue na bwînyangue cwe. 27 Rîru ûnene, wathani, na nkuma ya ûnene nthîgûrû bikaanenkanîrwa kîrî antû ba Ngai ûra mûnene. Na ûnene bwao bûkeethîrwa bûrî bwa tene na tene, na wathani bunthe bûkabatûmîkîra na kûbaathîkîra.” 28 Ûyû nuu mûthia wa mantû mamu. Îndî niû, Ndanieri, ndaathangîkua i mathûgaania maakwa mûno na ûthiû bwakwa bwagarûka rangi, îndî ndaakira na mantû mama nkorooni yakwa.