Ndanieri 6

Ndanieri abîîndîrwa njûri

1 Ndariasi n'akeneere kwaiga arûngamîîri bara banene îgana na mîrongo îîrî kûrûngamîîra nteere cionthe ûneneeni bwake, 2 na athuura arûngamîîri bangî bathatû beegue barî îgûrû rîao na Ndanieri aarî ûmwe wao. Na arûngamîîri babu banene bairaga mantû maao kîrî bo kaingo boona mantû ma mûnene magûkara bwega. 3 Rîru gwatuîka Ndanieri n'we aarutire ngûgî îmbega nkûrûki ya babu bangî bonthe n'ûntû n'aarî na kîrundu gîa kûûmbana, na mûnene abaanga kûmûthuura arûngamîîra ûnene bunthe. 4 Na n'ûntû bwa ûgu anene babu na mangabana baaceria ûntû bûgûkonania na ûnene bwa kûthitanga nabu Ndanieri. Îndî batoona ûntû nwa bûmwe bwa kûthetera kana bamûgwata na ngukumo n'ûntû aarî mwîtîgua, na gûtirî kûremeerwa kwa ngûgî kana ngukumo aagwatîkana nabu. 5 Antû babu beerana, “Tûtiona ûntû bwa kûthitanga nabu Ndanieri tatiga tûceriirie ûntû bûgûkonania na watho bwa Ngai wake.”

6 Kwoogu, arûngamîîri bara banene na arûngamîîri ba iteere baabîînda njûri na baathi kîrî mûnene bamwîra, “Îî mûnene Ndariasi, ûrootûûra tene na tene! 7 Arûngamîîri bara banene ba iteere na aniini ba arûngamîîri ba iteere, eeyani ûkûrû na agiiti magamba na mangabana, i bagwatanîrîîte bauga mûnene n'eekîre watho na bûthingatwe atî muntû wonthe ûra akaagonga gîntû kîngî, muntû kana ngai tatiga woû bantû a ntugû mîrongo îthatû, Îî mûnene, muntû ta ûyû nwa mwanka agerwe îrinyaani rîa cimba. 8 Îîndî woû mûnene, tuunga watho na wîkîre kîrore baarûa înu i kaingo bûtagarûrwa, kûringana na watho bwa Amende na Aperisi, bûra bûtaûmba kûgarûrwa kaîrî.” 9 Kwoogu, mûnene Ndariasi aakûrûkia watho na eekîra baarûa kîrore.

Ndanieri îrinyaani rîa cimba

10 Kinya ûkeegua Ndanieri n'aiyî baarûa n'yekîîrwe kîrore, n'athiire na mbere kûthi nyomba yake îra yarî nyomba cia îgûrû na i ciarî i ndugûre cierekereete Njerusaremu, ara aaturagia maru maita mathatû wa ntugû kûromba Ngai wake na kûmûkaatha, wa ta bûra aarûthaga mbere. 11 Abîîndi njûri baaya barî amwe beethîra Ndanieri akîrombaga na akîûragia Ngai wake amwîgîîrua kîao. 12 Rîru baathi kîrî mûnene kûmwona îgûrû rîa watho bûra. “Îî mûnene! Anga ûteekîîre kîrore wakûrûkia atî ûra ûkaromba gîntû kîngî, îrî ngai kana muntû tatiga woû bantû a ntugû mîrongo îthatû, Îî mûnene, muntû ûyu akaagerwa îrinyaani rîa cimba?” mûnene acookia auga, “Watho bûbu bûrî oogo kûringana na watho bwa Amende na Aperisia, bûra bûtaûmba kûgarûrwa kaîrî bûkûrûkiirue.” 13 Rîru baacookeria mûnene bamwîra, “Ndanieri ûra ûmwe wa atae ba kuuma Njunda, atigûtindanîra naawe, woû mûnene, kana atindanîra na watho bûra wekîîre kîrore, wana îîndî nwa akûromba maita mathatû wa ntugû.”

14 Rîra mûnene eegiirue mantû mamu, ainyîîrîîka mûno. Na neendaga mûno gûteethia Ndanieri na aageria mûno bûra aûmba kûmwonokia mwanka riûa rîathûa. 15 Rîru abîîndi njûri baaya kîrî mûnene bamwîra, “Îî mûnene, woû nwiyî, i watho bwa Amende na Aperisia ati gûtirî watho nwa bûmwe bûra mûnene akûrûkîîtie bûûmba kûgarûrwa.”

16 Rîru mûnene aaruta watho Ndanieri areetwe na aagerwa îrinyaani rîa cimba. Mûnene eera Ndanieri, “Ngai waku, ûra ûtûmîkagîra rîonthe, aroogûtuunyûkia!” 17 Antû baareeta iiga baakunîka narîo mûromo wa îrinya, na mûnene acwinga na kîrore gîake na irore bia anene baake, kaingo gûtooneka muntû wa kwonokia Ndanieri. 18 Rîru mûnene aacooka gîkarooni gîake kîa ûnene aathiria ûtugû bunthe atakûrîa, atarî na bia gwîkenia, na atoona toro.

Ndanieri oonokua kuuma kîrî cimba

19 Rîru rûkîîrî rware rûgîtema, mûnene aûkîîra aathi na mpwî bwa îrinya rîa cimba. 20 Rîra aakinyire akubî na îrinya rîa cimba ara Ndanieri aarî, eeta Ndanieri na inya arî na kîîthikîîro, “Îî Ndanieri, mûruti ngûgî wa Ngai ûra atûûraga mwoyo, Ngai ûra ûtûmîkagîra rîonthe n'araûmbire gûkûonokia kuuma kîrî cimba?” 21 Ndanieri eera mûnene, “Îî mûnene ûrootûûra tene na tene! 22 Ngai wakwa aratûmire mûraîka wake aaya aakunîka cimba tûnyua kaingo itanthûûkia, n'ûntû ntiraarî na mabîtia mbere yake, na kinya mbere yaku, Îî mûnene, gûtirî mabîtia ndûthîîte.” 23 N'we mûnene aakena mûno nkûrûki na aathana Ndanieri arutwe îrinyaani rîa cimba. Kwoogu, Ndanieri aarutwa îrinyaani na gûtirî ûthûûku Ndanieri oona n'ûntû n'etîgîîtie Ngai wake. 24 Mûnene aaruta watho auga bara bathitangîîte Ndanieri bagwatwe na bagerwe îrinyaani rîa cimba amwe na eekûrû na aana baao. Bakûgerwa ku, na mbere bakinya nthî cimba ciabakîria inya na ciakabakaba maîndî maao maatuîka tûrebûrû.

25 Rîru mûnene Ndariasi aandîkîra antû na mîgongo ya ndwaria cionthe nthîgûrû yonthe auga,

“Bûrootûûra bwega! 26 I nkûruta watho atî ndeeni ya wathani bwakwa bunthe antû nwa mwanka beegue barî na kwinaina na kûmaka mbere ya Ngai wa Ndanieri: N'ûntû i Ngai ûrî mwoyo, na atûûraga tene na tene. Ûnene bwake bûtikooro bwînyangua na wathani bwake bûtirî mûthia. 27 N'onokagia na agatuunyûkia, aringaga biama na magegania îgûrû na nthî; n'ûntû n'onokeetie Ndanieri kuuma inyaani ya cimba.” 28 Kwoogu, Ndanieri aathi mbere gûtûûra bwega îgiita rîa wathani bwa Ndariasi na wathani bwa Sairas mûnene wa Perisia.