Kîatho kîa mûnene Berisasa
5
1 Nyumaani mûnene Berisasa n'arûthire kîatho kîînene n'ûntû bwa magiri ma anene baake, na aanyunyanîra ndibei amwe nabo.2 N'ûntû bwa ntogoona ya ndibei, Berisasa aathana ikombe bia thaabu na fetha bira îthe Nebukandinesa aarutîîte Nyomba ya Ngai Njerusaremu bireetwe, kaingo we na anene baake, eekûrû baake, na aka baake ba kwaiga banyua nabio. 3 Kwoogu ikombe bia thaabu na fetha bira biarutîîtwe Nyomba ya Ngai Njerusaremu biareetwa, mûnene na anene baake, eekûrû baake, na aka ba kwaiga banyua nabio ndibei. 4 Bakînyuunyaga ndibei bagîkumagia ngai cia thaabu na fetha, cia rûthuku, cuuma, na cia mbaaû, na cia maiga.
Kwandîkwa rûthingooni
5 Warîru boona biara bia njara ya muntû bikîandîka rûthingooni rwa gîkaro kîa ûnene, akubî na ara taa yaigagîîrwa. Mûnene nwa aaraithîîrîîtie njara îkîandîka. 6 Na gûûka ûthiû bwake bwagarûka rangi, na mathûgaania maake maamaka. Magûrû maake manjîîria kwinaina na maru makîringanaga. 7 Mûnene augîîria na inya akiugaga areterwe augi mantû, Akarindini, na aringia; na mûnene eera antû bara baûme ba Mbabironi, “Ûra ûûmba kûthooma maandîko mama na antaûrîre bûra makuuga ageekîrwa nguo ya ûkûyû, na eekîrwe mûkathî wa thaabu nkingo yake, na eethîrwe arî wa bathatû ûneneeni.” 8 Rîru antû bonthe ba mûnene bara baûme baaya, îndî bataûmba kûthooma kana beera mûnene bûra maugaga. 9 Kwoogu mûnene Berisasa athûûra kaîrî na ûthiû bwake bwathi na mbere kûgarûka, na atongoria baake wana bo baathi na mbere kûrigicana.
10 Mwekûrû wa mûnene akwîgua gîtuma mûnene akîaria na atongoria baake, aaya nyomba ara kîatho kîarî. Mwekûrû wa mûnene auga, “Mûnene, ûrootûûra tene na tene! Ûtikaamake kana ûthiû bwaku bûgarûka rangi. 11 Kûrî na muntû ûneneeni bwaku ûrî na kîrundu kia ngai intheru. Ntugûûni cia abaagu muntû ûyu n'onekanire arî na îthûgaania rîega, na kûgwata mantû bwega, na n'aarî na ûûme bûkari ta ûûme bwa ngai. Abaagu Nebukandinesa, aamûtuîkithiirie mûnene wa aringi biama, augi mantû, Akarindini, na aringia, 12 n'ûntû kîrundu kîega, ûmenyo, na kûmenya gûtaûra irooto bwega, gûtaûra njuno, na kûthiria mathîîna i kwarî ndeeni ya Ndanieri, ûra mûnene eetaga Beritesasa. Îîndî Ndanieri n'eetwe aaye, na akeeyana ûtaûri.”
Maandîko mara maarî rûthingooni maataûrwa
13 Rîru Ndanieri areetwa mbere ya mûnene. Mûnene amwîra, “Kwoogu i woû Ndanieri ûmwe wa atae bara baaba areetire aaga kuuma Njunda? 14 I mbîgîîtue mantû maaku atî ûrî na kîrundu wa Ngai, na mathûgaania meega, ûmenyo, na ûûme birî naawe. 15 Îîndî antû baûme, augi mantû, i barareetirwe mbere yakwa kaingo bathooma maandîko mama na bambîîra ûtaûri bwa mo, îndî batiraûmba kûmataûra. 16 Îndî i mbîgîîtue nwa ûtaûre na ûkathiria mathîîna. Kwoogu ûkaaya kwîgua nwa ûûmbe kûthooma maandîko mamu na ûkambîîra bûra makuuga, ûgeekîrwa nguo ya ûkûyû, na gwîkîrwe mûkathî wa thaabu nkingo, na ûtuîke wa bathatû ûneneeni.”
17 Nwe Ndanieri acookeria mûmene auga, “Ka biewa bibu biîgue birî biaku, kana ûneenkere muntû ûngî! Îndi na gûkari ûgu niû nkaathoomera mûnene maandîko na mmwîre bûra makuuga. 18 Mûnene, Ngai Ûra Arî Îgûrû Mûno n'anenkeere abaagu Nebukandinesa ûnene, gûûkîîrua, mwago na ûkumio. 19 Na n'ûntû bwa gûûkîîrua kûra aamwere, antû bonthe, mîgongo na ndwaria bainaina na baakuthûka barî mbere yake. Aûragaga bara akwenda na agatiga bara akwenda batûûra, na agatîîya bara endaga gûtîîya, na akagwîthia bara eendaga kûgwîthia. 20 Îndî rîra nkoro yake yeebûkîîrie na mwoyo wake waûmagara mwanka eekumia mûno, n'aarutirwe gîtîîni kîa ûnene, na aatunywa ûkumio bwake. 21 N'arutirwe antûûni, na mathûgaania maake maagarûrwa maatuîka ma nyamû. Aatûûranagia na mang'ooi ma kîthaka, na aarîîyaga nyaki ta ng'ombe, na mwîrî wake wakunîkirwa i maame ma îgûrû, mwanka aaya kûmenya atî Ngai Ûra Arî Îgûrû Mûno n'we mûnene na arî na watho îgûrû rîa ûnene bwa antû, na abuneenkanagîra kîrî ûra akwenda. 22 Na woû, Berisasa mwana wake, ûteenyiithia nkorooni yaku, na kinya ûkeegua n'waiyî mama monthe! 23 Wîbûkîîrîîtie îgûrû mûno kîînyume na Mwathani wa îgûrû! Wetiirie ikombe bia Nyomba ya Ngai biareetwa mbere yaku, woû na anene na eekûrû baaku na aka ba kwaiga bwanyua nabio ndibei. Bwakaatha ngai cia fetha na cia thaabu, cia rûthuku, na cia cuuma, cia mîtî, na cia maiga, ira itoonaga kana ciîgua kana imenya nwa mbi. Îndî bwarega gûtîîya Ngai ûra arî na watho îgûrû rîa ûtûûro bwenu na njîra cienu cionthe.
24 “Kwoogu njara yaatûmwa kuuma gwake na yaandîka biugo bibi. 25 Na bibi i bio biugo bira biandîkirwe: MENE, MENE, TEKERI, na PARISINI. 26 Na bûbû i bu ûtaûri bwa mîgambo îno:
MENE i ta kuuga, ‘Ngai n'atarîîte ntugû cia ûnene bwaku na abureeta mûthia waabu.’
27 TEKERI i ta kuuga, ‘N'ûthimîîtwe na kîthimi wonekana ûtirî na ûrito.’
28 PARISINI i ta kuuga, ‘Ûnene bwaku i bûûgaanie na bwanenkerwa Amende na Aperisia.’ ”
29 Rîru Berisasa aathana auga Ndanieri eekîrwe nguo ya ûkûyû na mûkathî wa thaabu nkingo, na gwatûmîîrua atî n'we ûrî wa bathatû ûneneeni.