Ndanieri 4

Kîrooto kîa biîrî kîa Nebukandinesa

1 Mûnene Nebukandinesa aatûmana ntûmwa îno kîrî antû bonthe, mîgongo, na ndwaria bara bonthe baatwîre nthî yonthe. Bûrotûûra mayîîga! 2 I mboneete i bwega mbwîre biama na iriga bira Ngai Ûra Arî Îgûrû Mûno aamboneetie.

3 N'ata biama biake birî binene,

n'ata magegania maake marî inya!

Ûnene bwake n'ûnene bwa tene na tene,

na ûtongoria bwake i bwa kuuma rûciaro kûthi rûra rûngî.

4 Niû Nebukandinesa, ndaratûûraga mûtûûrîre ûmwega gwakwa mûciî na nkîthiiyaga na mbere bwega gîkarooni gîakwa kîa ûnene. 5 Îndî indoonire kîrooto kîranguayiirie. Ndî ûrîrî bwakwa indoonire bioneki na kîongo na mathûgaania maakwa ndeegua mataangîka. 6 Kwoogu ndaathana antû baûme bonthe ba Mbabironi bareetwe mbere yakwa, i kaingo bantaûrîra bûra kîrooto gîku gîkuuga. 7 Rîru ariingi ba biama, augi mantû, Akarindini, na aringia baaya, na ndabeera kîrooto gîku, îndî batikîûmba kûmbîîra ûtaûri bwakîo. 8 Rîa mûthia Ndanieri ûra eetagwa Beritesasa riîtwa rîa ngai yakwa aaya mbere yakwa, na n'aûyûrîîtwe i kîrundu kîa ngai intheru na ndamwîra kîrooto. 9 Beritesasa, mûnene wa aringi biama, inkûmenya n'ûyûrîîtwe i kîrundu kîa ngai intheru na kaîrî gûtirî kîriga kîûmo gwaku. Ta thikîîria kîrooto kîra ndararootire ûmbîîre ûtaûri bwakîo.

10 “Ndî ûrîrî bwakwa ûûgû i bu ndaroonire, i kwarî na mûtî gatîgatî ka nthî, warî na ûraaya bûûnene. 11 Mûtî wakûra wanenea na wagîa inya, na kathûmbî kaau i gaakinyaga îgûrû, na nwonekaga kuuma mîthiani yonthe ya nthî. 12 Mathangû maa u maraarî mathongi na matunda maingî, na ûreeyaga antû bonthe biakûrîa. Nyamû cia kîthaka ireeyûaga mûgunyeeni ruungu rwau, na nyoni cia îgûrû ciaka ntara mpong'iini ciau, na kuumania nau gîntû kîonthe kîrî mwoyo noo kîrareragwa. 13 Ndaathi na mbere kwona bioneki biakwa ndî ûrîrî, na i kûraarî na mûkaria ûmûtheru eendama kuuma îgûrû. 14 Na augîîria na inya akiugaga, ‘Rîîka mûtî ûyû na warie mpong'i ciau, ûûrûûre mathangû maa u na ûnyagaarie matunda maa u. Ka nyamû cionthe ithi ciume ruungu rwau na nyoni ciume mpong'iini ciau. 15 Îndî bûtige gîtinkû na mîri mûthetuuni, kîogeetwe na mûkumbû wa cuuma na rûthuku, nyakiini îmbîthî kîeniini. Rekaani athambue i maame ma kuuma ûgûrû, na bûreke atûûranîîre na nyamû cia kîthaka nyakiini ya nthî. 16 Ka mathûgaania maake magarûke kuuma kîrî ma muntû, na aneenkerwe mathûgaania ma nyamû. Na ka athirie mîanka mûgwanja. 17 Îgamba rîatûmîîrua n'akaria baatheru. Kaingo bara bonthe barî mwoyo bamenya atî ûra mûtheru mûno n'we wathanîîte îgûrû rîa ûnene bwa antû. Abunenkanagîra kîrî ûra akeenda na kinya antû bara barî ba nthî mûno.’ 18 Gîkî i kîo kîrooto kîra niû Nebukandinesa ndararootire. Îndî woû Beritesasa, uuge ûtaûri bwakîo, n'ûntû antû bonthe bara baûme ûneneeni bwakwa i baremeetwe i kûmbîîra ûtaûri bwakîo. Woû waûmba n'ûntû n'ûyûrîîtwe i kîrundu kîa ngai i ntheru.”

Ndanieri ataûra kîrooto kîa biîrî

19 Rîru Ndanieri ûra kaîrî eetagwa Beritesasa, eegua ainyîîrua nkorooni gwa kagiita gaakai. Aamaka mathûgaaniani maake. Mûnene auga, “Beritesasa, ûtikeende kîrooto kana ûtaûri bwakîo bûkûmakia.” Beritesasa acookia auga, “Mwathi wakwa, kîrooto gîkî kîrootuîka i kîa bara bakûthwîre, na ûtaûri bwakîo nabu bûkeethîrwa bûrî bwa anthû baaku! 20 Mûtî ûra ûroonire, ûra wakûrire watuîka ûmûnene na wagîa inya, mwanka kathûmbî ka u gakinyîra îgûrû na ûkoonekana nthî yonthe, 21 ûra mathangû maa u maraarî mathongi na matunda maingî makûgana, na nwanenkagîra irio kîrî kîra gîntû, ara nyamû cia kîthaka iratûûraga, na mpong'iini ciau nyoni cia îgûrû ciaka ntara, 22 i woû mûnene! N'ûkûrîîte wanenea na wagea inya. Ûnene bwaku i bwongeerekeete bwakinya îgûrû, na ûtongoria bwaku bwakinya mîthia ya nthî. 23 Ara noo mûnene ûroonire mûkaria ûra mûtheru aîndamîîte kuuma îgûrû na akiugaga, ‘Rîîkaani mûtî ûyû na bûcuînyangie, îndî bûtige gîkona amwe na mîri mûthetuuni, kîogeetwe na mûkumbû wa cuuma na rûthuku, naagu kîeniini kîa nyaki, na ka arindwe i maame ma îgûrû, na ûtûûro bwake bwîthîrwe bûrî amwe na nyamû cia kîthaka, mwanka athirie mîanka mûgwanja,’ 24 bûbû i bu ûtaûri, ‘Îî woû mûnene, bûbû i watho bûra Ûra Arî Îgûrû Mûno arutîîte îgûrû rîa mûnene mwathi wakwa: 25 Ûkaarutwa antûûni, na ûgaatûûra amwe na nyamû cia kîthaka. Na ûkeethîrwa ûkîrîa nyaki ta ng'ombe, na ûkaathambua i maame ma îgûrû, na ûkaathiria mîanka mûgwanja, mwanka rîra ûkaamenya atî Ûra Arî Îgûrû Mûno n'we ûrî na watho îgûrû rîa ûnene bwa antû, na abunenkagîra muntû ûra akwenda. 26 Na ta bûra kwathanîîtwe gîtinkû na mîri bitigwe, ûgaacookerua ûnene bwaku kaîrî rîra ûkaamenya îgûrû i rîo rîathanaga.’ 27 Kwoogu mûnene, ûkeegua wegua mataaro maakwa, îîrire meeyia maaku na ûrûthe mantû ma ûtheru, na ûtige ûthûûku bwaku wîgîîrue bara bainyîîrie kîao, kwaûmbîka ntugû ciaku cia gûtûûra bwega ikathi na mbere.”

Kîrooto kîa Nebukandinesa kîaingîka

28 Mantû mama monthe i maakarîkîîre mûnene Nebukandinesa. 29 Nyuma ya mîeri îkûmi na îîrî, mûnene n'angaangaga rûûgûrû rwa nyomba ya ûnene ya Mbabironi, 30 na mûnene auga, “Anga îno ti Mbabironi taûni îra nene, îra mbakîîte na inya yakwa înene îrî taûni îra nene ya wathani bwakwa na kwonania ûkumio bwakwa bûra bûgana?” 31 Warîra akîaragia ûgu, kayû kaaria kuuma îgûrû, “Mûnene Nebukandinesa, thikîîria bûra ûtuîrîîtwe, ûnene bûkuuma kîrî woû! 32 Ûkaarutwa kuuma antûûni, na gîkaro gîaku kîrî amwe na nyamû cia kîthaka. Ûkaarîîyaga nyaki ta ng'ombe, na ûkaathiria mîanka mûgwanja ûkari ûûgû, mwanka rîra ûkaamenya atî Ûra Arî Îgûrû Mûno n'we ûrî îgûrû rîa wathani bwa antû na abunenkagîra ûra akwenda.” 33 Warîru biugo bibu biagwata Nebukandinesa. Aarutwa antûûni, aarîa nyaki ta ng'ombe, na mwîrî wake wagwatwa i maame kuuma îgûrû mwanka guaya ya mwîrî yaraayîa ta mbwî cia ndiiû na nkunyû ciake ciakara ta cia nyoni.

Nebukandinesa aakumia Ngai

34 Îgiita rîru rîathira, niû Nebukandinesa, ndaûkîîria meetho maakwa ndaaraitha îgûrû, na mathûgaania ma kî ûmuntû mancookera. Ndaathaarima ûra ûrî îgûrû mûno, na ndamûgonga na ndaatîîya ûra ûtûûraga tene na tene. N'ûntû wathani bwake i wathani bûtathiraga rî kana rîna ûnene bwake bûtûûraga kuuma nthuke kûthi îra îngî. 35 Antû bonthe bara batwîre nthî aboonaga ta ba ûtheri mbere yake, na arûthaga bûra akwenda amwe na njûûrî ya îgûrû na bara batwîre nthî. Gûtirî we aûmba kûgiria njara yake kana amûûria “N'ata ûkûrûtha?” 36 Kagiitani wa gaku mathûgaania maakwa ma kî ûmuntû maancookera, gîtîîyo na nkuma na ûnene bwakwa ndaacookerua. Bara bampeeyaga ûkûrû na aathani baakwa baaya baanthagaana, na ndaacookua ûneneeni kaîrî ndî na inya ya wathani nkûrûki ya mbereeni. 37 Îîndî niû Nebukandinesa, i ngûkumia na ngaûkîîria na ngatîîya mûnene wa îgûrû, n'ûntû ngûgî ciake cionthe i cia mma, na njîra ciake i cia ûmma, na n'aûmbaga kûgwîthia bara bakaraga na wîkumia.