Mûbuanaano wa thaabu
3
1 Mûnene Nebukandinesa aarûtha mûbuanaano wa thaabu wa ûraaya bwa biiti mîrongo kenda na wariî bwa biiti kenda, na acurûngamia mwaranthî wa Ndura gîteere kîa Mbabironi. 2 Rîru mûnene Nebukandinesa aatûmana arûngamîîri bara banene ba iteere na aniini ba arûngamîîri ba iteere, Ngabana, eeyani ûkûrû, aigi igîîna, agiiti magamba, na anene bonthe ba nteere cionthe baaye kûrugûruani kwa mûbuanaano ûra mûnene Nebukandinesa aarûngîkîîte. 3 Kwoogu, Arûngamîîri bara banene ba iteere na aniini ba arûngamîîri ba iteere, Ngabana, eeyani ûkûrû, aigi igîîna, agiiti magamba, na anene bonthe ba nteere cia wathani, beethîrana kîathooni gîa kûrugûrua kwa mûbuanaano ûra mûnene Nebukandinesa aarûngîkîîte. Warîra barûûngi mbere ya mûbuanaano ûyu, 4 muugîîria augîîria na inya auga, “Biû antû, mîgongo, na ndwaria bûrîathwa 5 atî, rîra bûkeegua kayû ga coro, mûtûûrirû, biringi, inanda, wandîndî ya ndigi inyiingî, mbeebe, na into bionthe bia kwina, nwa mwanka bûgwe nthî na bûgonge mûbuanaano wa thaabu ûra mûnene Nebukandinesa arûngîkîîte. 6 Ûra akaarega kûgwa nthî na acugonga akaagerwa kîrûngûyûûni kîa mwanki warîo.” 7 Kwoogu, kûrîîkia kwîgua kayû ka rûgoci, biringi, inaanda, mbeebe, gîempe, na into bingî bia kwina, antû bonthe, mîgongo, na ndwaria baagwa nthî baagonga mûbuanaano wa thaabu ûra Nebukandinesa aarûngîkîîte.Sandiraka, Mesaki na Abendinego baathitangwa n'ûntû bwa kûrega kwathîka
8 Na kagiitaani gaka i rîo Akarindini boonire kaanya ga kûthitanga Ayaundi. 9 Beera mûnene Nebukandinesa, “Îî mûnene, ûrootûûra tene na tene! 10 Woû mûnene, nwakûrûkiirie watho, atî muntû wonthe ûra ûkeegua kayû ga coro, mûtûûrirû, biringi, inanda, wandîndî ya ndigi inyiingî, mbeebe, na into bionthe bia kwina, nwa mwanka agwe nthî na agonge mûbuanaano wa thaabu, 11 na ûra akaarega kûrûtha ûgu, akaagerwa kîrûngûyûûni kîa mwanki. 12 Kûrî na Ayaundi barî oogo, bara ûthuurîîte kûrûngamîîra gîteere kîa Mbabironi, nabo i Sandiraka, Mesaki, na Abendinego. Bo batigûkwathîkîra, woû mûnene. Batirutagîra ngai ciaku ngûgî na batigongaga mûbuanaano wa thaabu ûra ûrûngîkîîte.”
13 Rîru Nebukandinesa arî na mûthûûro ûmûnene auga Sandiraka, Mesaki, na Abendinego bathûngîrue gwake. Kwoogu, baareetwa mbere ya mûnene. 14 Nebukandinesa abeera, “N'ûmma, Sandiraka, Mesaki, na Abendinego, atî bûtikûrutîra ngai ciakwa ngûgî na bûtigongaga mûbuanaano wa thaabu ûra ndûngîkîîte? 15 Îîndî bûkaaya kwîgua kayû ka rûgoci, biringi, inanda, mbeebe, gîempe, na into bingî bia kwina, bwîgue bwîthuuranîrîîte bûgwe nthî na bûgonge mûbuanaano ûra ndûthîîte, bûkaarûtha bwega. Îndî bûkarega gûcugonga, nthûti îmwe bûkaagerwa kîrûngûyûûni kîa mwanki, na ndîûria i ngai îrîkû îkaabwonokia kuuma njaraani ciakwa?”
16 Sandiraka, Mesaki, na Abendinego baacookeria mûnene, “Itû Nebukandinesa, tûtibatîîrue twîtheteera mantûûni mama. 17 Wegua nûûgu Ngai ûra tûrutagîra ngûgî agatwonokia kuuma kîrûngûyûûni gîkî kîa mwanki na kinya kuuma njaraani ciaku mûnene, nwa atwonokie. 18 Îndî wana ûkeegua tibu, woû mûnene ûmenye atî tiû tûtiirutîra ngai ciaku ngûgî na tûtiigonga mûbuanaano wa thaabu ûra ûrûngîkîîte.”
Kîrûngûyû kîa Mwanki
19 Rîru Nebukandinesa athûûra mûno i Sandiraka, Mesaki, na Abendinego mwanka ûthiû bwake bwakûnjara. Auga mwaki ûmûnene ûbuîgwe na wongeerwe maita mûgwanja nkûrûki ya bûra ûkaraga, 20 na aathana akaria bara barî inya mûno njûûrîîni yake bathaîke Sandiraka, Mesaki, na Abendinego na babagere kîrûngûyûûni gîku kîa mwanki. 21 Kwoogu, antû babu baathaîkwa, wa baarî na nguo ciao ira ndaaya, curuarî, nkoobia, na nguo ingî ciao, na baagerwa kîrûngûyûûni gîku kîa mwanki. 22 Na n'ûntû watho bwa mûnene bwarî bûûthûûku na mwanki nau wongeerwa nkûrûki, rûrîrîîmbî rwa mwanki rwabîîthia antû bara baûkîîrie Sandiraka, Mesaki, na Abendinego. 23 Îndî antû baba bathatû, Sandiraka, Mesaki, na Abendinego, baagwa gûku mwankiini barî booge.
24 Rîru mûnene Nebukandinesa aamakania mûno na aûkîîra na mpwî. Aûria bara baamweyaga ûkûrû, “Anga t'antû bathatû tûgerire mwankiini barî bathaîke?” Baacookeria mûnene bamwîra, “N'ûmma, îî mûnene.” 25 Mûnene acookia, “Î ndîona antû bana batarî bathaîke, bakîanganga gatîgatî ka mwanki na batikûbîa, na muntû wa bana arî na mwonekanîre ta wa mwana wa ngai.” 26 Rîru Nebukandinesa aathiiyanga akubî na kîrûngûyû gîku kîa mwanki na auga nainya, “Sandiraka, Mesaki, na Abendinego, aruti ngûgî ba Ngai Ûra Arî Îgûrû Mûno, umagaraani! Ncûûni aaga!” Kwoogu, Sandiraka, Mesaki, na Abendinego baumagara mwankiini. 27 Na akaria, arûngamîîri, Ngabana, eeyani ûkûrû ba mûnene, beethîrana amwe baakûûyîîra wabu mwanki ûtaarî na inya îgûrû rîa mîîrî ya antû babu. Ntundu cia biongo biao itaang'onyara, nguo ciao ira ndaaya itaabîa, na bataanunkaga ntoogo nwa aniini. 28 Nebukandinesa auga, “Ûkumio i kîrî Ngai wa Sandiraka, Mesaki, na Abendinego, ûra aatûma mûraîka aaya kwonokia aruti ngûgî baake bara bamwîtîgîîtie. Î baaregire kwathîkîra watho bwa mûnene na baaruta mîîrî yao bantû a kûrutîra ngûgî na kûgonga ngai ingî tatiga Ngai wao. 29 Kwoogu, i nkwathana: Gûkaaya kwîthîrwa kûrî na antû, mûgongo, kana rwaria bara bakaaria mantû maathûûku îgûrû rîa Ngai wa Sandiraka, Mesaki, na Abendinego, bagaatembûrangwa tûcuncî tûcuncî, na mîciî yao ituîkithue maganjo, n'ûntû gûtirî na Ngai ûngî ûûmba kwonokania mûthemba ûyû.” 30 Rîru mûnene aaneneyia Sandiraka, Mesaki, na Abendinego ndeeni ya gîteere kîa Mbabironi.