Kîrooto kîa Nebukandinesa
2
1 Mwankaani wa îîrî wa wathani bwa Nebukandinesa, Nebukandinesa n'arootire kîrooto kîra kîanyamaariirie nkoro yake mûno na aaga toro. 2 Kwoogu, mûnene aathana ariingi biama, augi mantû, agao na Akarindini bareetwe beere mûnene kîrooto kîra aarooteete. Baaya baarûngama mbere ya mûnene, 3 n'we abeera, “I ndararootire kîrooto na i gîkûnthîînia mûno nkîenda kûmenya bûra gîkuuga.” 4 Akarindini beera mûnene na rwaria rwa kîaramaîki, “Îî mûnene, ûrootûûra tene na tene! Îra aruti ngûgî baaku kîrooto gîku na tûgagûtaûrîra bûra gîkuuga.” 5 Mûnene eera Akarindini, “Ûûgû i bu mbangîîte, wona bwarega kûmbîîra kîrooto gîku amwe na ûtaûri bwakîo, bûkaagitangwa icuncî icuncî, na mîciî yenu îtuîkithue maganjo. 6 Îndî bûkambîîra kîrooto amwe na ûtaûri bwakîo, nkabûnenkera biewa amwe na gîtîîyo kîînene. Kwoogu, mbîîraani kîrooto amwe na ûtaûri bwakîo.” 7 Baacookia rîa maîrî, “Ka mûnene aambe eere aruti ngûgî baake kîrooto, rîru tûûmbe gûtaûra bûra gîkuuga.” 8 Mûnene acookia auga, “Inkûmenya na mma ka bûkûgeria gûta îgiita, n'ûntû i bûkwona nkûrîîkia gûkûrûkia 9 atî, ‘Wona bwarega kûmbîîra kîrooto, kûrî na îkaanûkia rîmwe kîrî bwinthe.’ Bûgwatanîrîte kûmbarîria mîgambo ya ûrongo bûûnta bûkîenda kwona kana nkaagarûra mathûgaania. Kwoogu, mbîîraani kîrooto, kaingo mmenya bûkaambîîra bûra gîkuuga.” 10 Akarindini beera mûnene, “Gûtirî muntû aaga nthîgûrû ûûmba kûgwûra bûra mûnene akwenda! Na mma gûtirî mûnene, kinya akeegua arî na gîtîîyo kana inya îgana ata, aagana kûûria aringi biama, augi mantû kana mûkarindayo ûntû ta bûbû. 11 Ûntû bûra mûnene akûûria i bûûmo mûno, na gûtirî we aûmba kûgwûrîria mûnene tatiga ngai, nacio ititûûranagîra na antû.”12 Na n'ûntû bwa ûgu mûnene athûûra na aathana atî antû bonthe bara baûme ba Mbabironi bathirue. 13 Watho bwarutwa, na antû bara baûme baarî akubî kûûragwa, baaceria Ndanieri na acoore baake wana bo baûragwa. 14 Îndî Ndanieri aarîria Arioki mwathi wa akaria ba mûnene eemenyereete na arî na ûûme. Nwe Arioki n'arî akuumagara athi kûûraga antû bara baûme ba Mbabironi, 15 Ndanieri aûria Arioki mwathi wa akaria ba mûnene, “I kî n'ûntû watho bwa mûnene bûrî bûthûûku ûgu?” Nwe Arioki eera Ndanieri bwega bûra mantû maakari. 16 Rîru Ndanieri aathûngîra kîrî mûnene na amûromba amwee kaanya na akamwîra kîrooto na bûra gîkuuga.
Ngai aagwûrîra Ndanieri kîrooto kîa Nebukandinesa
17 Rîru Ndanieri eenûka eera acoore baake Anania, Misaeri, na Asaria, 18 barombe kîao kîa Ngai wa îgûrû n'ûntû bwa mantû mama ma kîriga, kaingo Ndanieri na acoore baake na antû babu bangî baûme ba Mbabironi batikaathirue. 19 Rîru Ngai agwûrîra Ndanieri kîrooto ûtugû na njîra ya kîoneki, na Ndanieri akaatha Ngai wa îgûrû.
20 Ndanieri auga, “Riîtwa rîa Mwathani rîrookumua tene na tene, n'ûntû ûûme na inya i biake.
21 “N'we agarûraga mathaa na magiita, na n'we agwîthagia anene na agaûkîîria bangî, n'wa we eeyanaga ûûme kîrî bara baûgî na ûmenyo kîrî bara bagwataga mantû. 22 N'agwûraga mantû ma ndeeni na mara maithe, n'aiyî bûra bûrî mwinduuni, na werû bûrî ndeeni yake. 23 Ingûgûcookeria nkaatho woû Ngai wa biûyûûyû biakwa, n'ûmpeete ûûme na inya, na îîndî n'ûngwûrîîte bûra tûrakûûriirie, n'ûntû n'ûtûgwûrîrîîte mara mûnene akwenda.”
Ndanieri ataûra kîrooto
24 Kwoogu, Ndanieri aathi kîrî Arioki, ûra mûnene athuurîîte athiria antû baûme ba Mbabironi, na amwîra, “Ûtikaathirie antû baûme ba Mbabironi, mbira mbere ya mûnene, na nkamûtaûrîra kîrooto.”
25 Rîru Arioki aira Ndanieri mbere ya mûnene na mpwî na amwîra, “Nkwona muntû kuuma kîrî atae ba kuuma Njunda ûra aûmba gûkwîra bûra kîrooto gîkuuga.” 26 Mûnene eera Ndanieri, ûra eetawa Beritesasa, “Nwa ûûmbe kûmbîîra kîrooto kîra ndooteete na ûkambîîra bûra gîkuuga?” 27 Ndanieri acookeria mûnene, “Gûtirî antû baûme, aringi biama, augi mantû kana aringia baûmba gûkûgwûrîra kîriga gîkî ûkûûria, 28 îndî kûrî Ngai ûrî îgûrû ûra ûgwûraga mantû ma iriga, na n'agwûrîrîîte mûnene Nebukandinesa bûra gûgaakarîka ntugûûni cia mûthia. Kîrooto gîaku na bioneki kuuma kîongo gîaku ûmaami ûrîrî bwaku biakari ûûgû, 29 kîrî woû, mûnene, ûgarami ûrîrî bwaku, mathûgaania makûûyîîra ma bûra gûgaakarîka nyumaani, na ûra ûgwûraga mantû ma iriga akuumbûrîra bûra gûgaakara. 30 Îndî niû, ntiragwûrirua mantû mama n'ûntû bwa ûûme bwakwa bûra ndî nabu nkûrûki ya antû bara bangî, îndî i kaingo ûmenya ûtaûri na ûciûkîrwa i mathûgaania maaku.
31 “Ûraithîîrîîtie woogu, îî mûnene, irû! I kwarî na mûbuanaano ûmûnene. Mûbuanaano ûyû warî ûmûmatu, na gûkenga kwa mwanya, warûngi mbere yaku, na mwonekere wau warî wa kûmakania. 32 Kîongo kîau kîarî kîa thaabu înkembe, kîbara na njara biarî bia fetha, nda na biero biarî bia rûthuku, 33 magûrû ma cuuma, nucu ya mbayo yarî cuuma na nucu îra îîngî yarî ya yûûmba. 34 Wa ûraithîîrîîtie woogu, iiga rîagiitwa, na ti njara cia muntû ciarîgiitire, rîaringa mbayo cia mûbuanaano ûyu ira ciarî cia cuuma na yûûmba na rîa cirebûranga tûcuncî tûcuncî. 35 Rîru cuuma, yûûmba, rûthuku, fetha, na thaabu, bionthe biarebûrangwa tûcuncî tûcuncî biakara ta maûngû rwaraani îgiita rîa thaano, ruuo naru rwabikamata, na gûtirî kîo gîatigwa gîkîonekaga. Îndî iiga rîru rîaringire mûbuanaano rîatuîka kîrîma kîînene na rîaûyûra nthî yonthe.
36 “Gîkî i kîo kîarî kîrooto, îîndî tûgakwîra bûra gîkuuga. 37 Woû, Îî mûnene, mûnene wa anene ûra Ngai wa îgûrû aneenkereete wathani, ûnene, inya, na ûkumio, 38 ûra antû bonthe banenkanîrîîtwe njaraani ciake, wa ara batwîre, nyamû cia kîthaka, na nyoni cia îgûrû, na ûra atuîkithîîtie mwathi wacio i woû kîongo gîku kîa thaabu. 39 Nyuma ya woû gûgaûkîîra ûnene bûngî bûniini nkûrûki ya bwaku, na kûgîe ûnene bwa ithatû bwa rûthuku, bûra bûkaathana nthî yonthe. 40 Na gûkeethîrwa kûrî na ûnene bwa inya, bûrî na inya ta cuuma, wa ta bûra cuuma îrebûrangaga na îkathithira gîntû kîonthe, bûkaathithira na bûnyagaarie moonene mama monthe. 41 Wa ta bûra wonire mbayo na biara biungeene cuuma na yûûmba, bûkeethîrwa bûrî ûnene bûgaûkeene, îndî inya îmwe ya cuuma îkeethîrwa îrî ku, ta bûra wonire cuuma yungeene na yûûmba. 42 Wa ta bûra biara bia mbayo biarî bia cuuma na yûûmba, nwabu ûnene bûbu bûkeegua bûrî na inya, îndî nwa buunîkange. 43 Wa ta bûra wonire cuuma yungeene na yûûmba, ûgu i bu bakaagwatanîra na njîra ya kûgûranîra, îndî batiigwatana bwega barîîkeenie, wa ta bûra cuuma îtagwatana na yûûmba bwega. 44 Na ntugûûni cia anene babu Ngai wa îgûrû agaûkîîria ûnene bûra bûtakîthirua, kana ûnene bûbu bûthûkua n'antû bangî. Bûkaathithira moonene mama monthe na makinye mûthia wa mo, nabu bûkaarûgama îgiita rîtarî mûthia. 45 Wa ta bûra wonire iiga rîagiitwa kuuma kîrîmaani na ti njara ya muntû yagiitire, na rîathithira cuuma, rûthuku, yûûmba, fetha, na thaabu, Ngai ûmûnene n'amenyithîîtie mûnene bûra gûgaakarîka Nyumaani. Na kîrooto i kîa mma, na ûtaûri bwakîo i bwa gwîtîgîka.”
Ndanieri na acoore baake baaneneua
46 Rîru mûnene Nebukandinesa aagwa nthî na ûthiû bwake, agonga Ndanieri, na aathana arutîrwe kîgongwana kîa irio na macoco. 47 Mûnene eera Ndanieri, “N'ûmma, Ngai waku n'we Ngai ûra mûnene kîrî ngai ira ingî cionthe na Mwathani wa anene na mûgwûri wa iriga, n'ûntû n'ûmbîîte kûgwûra kîriga gîkî!” 48 Rîru mûnene aaneneyia Ndanieri, na amwaa biewa biinene mûno, na amûtuîkithia mûnene wa Mbabironi na mûrûgamîîri wa antû bara baûme ba Mbabironi. 49 Ndanieri aromba mûnene athuure, Sandiraka, Mesaki, na Abendinego barûngamîîre gîteere kîa Mbabironi. Mûnene eetîgîîria abathuura. Îndî Ndanieri atauma gîkarooni kîa mûnene.