NDANIERI
Nthaka inya cia Isiraeri irî Mbabironi
1
1 Mwankaani wa îthatû wa wathani bwa mûnene Njeoyakimu wa Njunda, mûnene Nebukandinesa wa Mbabironi aayire Njerusaremu na amîkîîmba. 2 Na Mwathani aarekeeria mûnene Njeoyakimu wa Njunda aagwa njaraani cia Nebukandinesa, amwe na into bimwe bia Nyomba ya Ngai. Nebukandinesa aakamatire atae amwe na into bibi aacooka nabio Mbabironi nyomba ya ngai yake na abiaiga kîgîînaani kîa ngai yake.3 Rîru mûnene aathana auga mûkaria wa gîkaro kîa mûnene Asipenasi mûtongoria wa bara bakabe areete bamwe ba aana ba Isiraeri ba mîciî îrî gîtîîyo. 4 Nthaka imbîthî itarî nwa koothûûku ka mwîrî na inthongi, na irî na ûûme bwa mantû na inthoomu mantûûni maingî na ciûmba kûruta ngûgî gîkarooni kîa mûnene. Na abarutane mwandîkîre na rwaria rwa Akarindea. 5 Mûnene auga mûgana wa irio na ndibei îra bagaatûmagîra wa kîra ntugû. Irio i bira mûnene aarîîyaga na ndibei n'îra mûnene aanyuunyaga. Baarî barutanwe mîanka îthatû, rîru bairwe mbere ya mûnene. 6 Gatîgatîîni kaao i kwarî na Ndanieri, Anania, Misaeri, na Asaria, kuuma mwîrîgaani wa Njunda. 7 Mûtongoria wa bara bakabe abaneenkera mariîtwa mangî: Eeta Ndanieri Mberitesasa, Anania amwîta Sandiraka, Misaeri amwîta Mesaki, na Asaria amwîta Abendinego.
8 Îndî Ndanieri we n'arî na mûrûngamo wake auga atiûmba kwîbîkîra mûgiro na irio bia mûnene kana ndibei îra mûnene aanyunyaga. Kwoogu, aûria mûnene wa bara bakabe amwîtîgîîrie atikeebîkîre mûgiro. 9 Ngai n'we aneenkera Ndanieri kwendeerwa kuuma kîrî Mûtongoria wa bara bakabe. 10 Mûtongoria wa bara bakabe eera Ndanieri, “Ingûkuthûka mwathi wakwa mûnene, n'ûntû n'augîîte irio bira bûkaarîa na ndibei îra bûkaanyua. Akaaya kwona bûthûûkîîtie mwîrî nkûrûki ya bara bangî ba îrika rîenu, nwa angiite kîongo.” 11 Rîru Ndanieri eera mûkaria ûra Mûtongoria wa bara bakabe aathuurîîte akaria Ndanieri, Anania, Misaeri na Asaria, 12 “Wenda, geria aruti ngûgî baaku bantû a ntugû îkûmi. Ga tûnenkagîrwe nyani cia kûrîa na rûûyî rwa kûnyua akî. 13 Rîru ûcooke ûtûbuanaanie na bara bangî bakûrîa irio bia kuuma kwa mûnene, rîru ûrûthîre aruti ngûgî baaku kûringana na bûra ûkoona.” 14 Kwoogu, eetîgîîria ûntû bûbu na abageria bantû a ntugû îkûmi. 15 Mûthiani wa ntugû îkûmi i bo boonekanaga barî beega na barî banoru nkûrûki ya nthaka ira ingî ira ciarîîyaga irio bia mûnene. 16 Kwoogu, mûkaria ûyu aatîîra kûbaa irio bira mûnene augîîte banenkagîrwe, na aathi mbere kûbanenkera nyani bantû a bio. 17 Na Ngai aaneenkera nthaka ino irî inya ûûme na waara mantûûni ma kîthoomo na ûmenyo. Kaîrî, Ndanieri n'aarî na ûmenyo mantûûni monthe ma maono na irooto.
18 Îgiita rîgûkinya rîra mûnene augîîte nthaka inu ireetwe kîrî we, Mûtongoria wa bara bakabe abaira mbere ya Nebukandinesa, 19 na mûnene aaria nabo. Na kîrî bo bonthe, gûtirî nwa ûmwe wonekana wa kûbuanaanua na Ndanieri, Anania, Misaeri, na Asaria. Kwoogu, baatua kûrutagîra mûnene ngûgî. 20 Mantûûni monthe ma ûûme na ûmenyo mara mûnene eendaga kuumania nabo, aaboonire barî beega maita îkûmi nkûrûki ya aringi biama na augi mantû ndeeni ya ûnene bwake bunthe. 21 Na Ndanieri aathi na mbere kûrutîra mûnene ngûgî agu mwanka mwanka wa mbere wa mûnene Sairas.