Kûriûkua wa akuû
12
1 “Kagiitaani gaku Mikaeri mûraîka ûra mûnene, na ûra ûrûngamîrîte antû baaku, akaumîîra. Rîru kwîthîrwe kûrî na kagiita ka thîîna înene nkûrûki ya îra yaaronekana kaîrî kuuma rîra mîgongo yoonekanire nthî îno. Îndî kagiitaani gaku kîra ûmwe wa antû beenu ûra riîtwa rîake rîandîkîîtwe îbukuuni rîa mwoyo akoonokua. 2 Baingî ba bara bakuîte bagaûkîîra, bamwe bathi mwoyoni wa tene na tene, na bara bangî bathi gûntû kwa nthoni na kûmeneerua tene na tene. 3 Bara baûme bagaakenga ta werû bwa îgûrû, na bara batongoragîîria antû wagîruuni bagaatuîka baatheru wanabo bagaakenga ta nthata tene na tene. 4 Îndî woû, Ndanieri, gaiga ûroria bûbû bûrî witho na waige îbuku rîrî, rîrî rîkunîke mwanka îgiita rîa mûthia. Baingî bakaugia aaga na ara angî, na ûûme bûkongeereka.”5 Rîru niû, Ndanieri, ndaaraithîîria ndoona antû bangî baîrî ûmwe arûûngî îgombeeni mbarî îmwe na ûra ûngî arûngî îgombeeni rîra rîngî rîa muuro. 6 Ûmwe eera muntû ûra eekîrîîte nguo ya gatani ûra warî îgombeeni bwa îgûrû, “N'îgiita rîgana ata rîkaathira kaingo mantû mama ma kûmakania matuîkîka?”
7 “Muntû ûra eekîrîîte nguo ya gatani, ûra aarûûngi îgombeeni bwa îgûrû, aûkîîria njara ciake irî ciîrî îgûrû na athiîtia na ûra ûtûûraga tene na tene. Auga îkaathûkia mîanka îthatû na nucu. Rîra kûthîînua wa antû ba Ngai gûgaakinya mûthia, mantû mama makeethîrwa magûtuîkîka.”
8 I ndeegiirue bûra augire îndî ntaagwata bûra eendaga kwonania. Kwoogu ndaûria, “Mwathani wakwa, mantû mama makaarîîkia ata?”
9 “Nwe ambîîra, Ndanieri, îthi bûra ûthiîte, n'ûntû mantû mama magaakara marî maithe na marî makunîkîre mwanka îgiita rîa mûthia. 10 Baingî bakaatherua, bathambue, na bakembwe, îndî bara bathûûku bakaathi mbere kûrûtha ûthûûku. Gûtirî nwa ûmwe wao ûgaaciûkîrwa. Îndî nwa bara barî na ûûme bonka bagaaciûkîrwa bamenye i ta kuuga ata.”
11 “Kuuma ntugû îra kîgongwana gîa kîra ntugû gîkaarutarutwa oogo, na gîntû kîra gîîkîrithagia mûgiro kîrûngîkwe, gûkeethîrwa kûrî na ntugû ngiri îmwe na magana maîrî ma mîrongo kenda. 12 Na kîthaarimo i kîrî bara bageeteera baûmîîrîîtie mwanka ntugû ngiri îmwe na magana mathatû ma mîrongo îthatû na itaano igaakinya mûthia.
13 “Îndî woû, îthiîre mwanka îgiita rîa mûthia. Ûkaanogoka, îndî mûthiani wa ntugû inu, ûgaûkîîra kaîrî ûkeegwe kîewa kîra waigîrîîtwe.”