Esekieri 48

Mînda ya kîîmîîrîga

1 “Îno n'yo mîîrîga ya Isiraeri na nthîgûrû îra wa mwîrîga ûkeegwa. Gîcuncî kîa Ndani i kîo kîrî bwa neegûrû cwe. Mwanka wakîo ûkaathingata barabara ya Ethironi, kûthi Rebo-Amathi, kûthi Asara Enani na mwankaani wa Ndamasiki na Amathi bwa neegûrû. Nthîgûrû ya Ndani îgiitanîîtie nthîgûrû ya Isiraeri kuuma bwa uumîîro bwa riûa mwanka bwa ûthwîro bwa riûa. 2 Gîcuncî gîa Aseri gîkeegua gîankeene na kîa Ndani bwa iti na kuuma bwa uumîîro bwa riûa mwanka bwa ûthwîro bwa riûa. 3 Gîcuncî kîa Nabutarî gîkeegua gîankeene na kîra gîa Aseri bwa iti, kuuma mbarî ya uumîîro bwa riûa mwanka mbarî ya ûthwîro bwa riûa. 4 Gîcuncî kîa Manase gîkeegua gîankeene na kîra kîa Nabutarî bwa iti kuuma mbarî ya uumîîro bwa riûa mwanka bwa ûthwîro bwa riûa. 5 Gîcuncî kîa Eburaimu gîkeegua gîankeene na kîra kîa Manase bwa iti kuuma mbarî ya uumîîro bwa riûa mwanka bwa ûthwîro bwa riûa. 6 Gîcuncî kîa Rubeni gîkeegua gîankeene na kîra kîa Eburaimu bwa iti kuuma mbarî ya uumîîro bwa riûa mwanka mbarî ya ûthwîro bwa riûa. 7 Gîcuncî kîa Njunda gîkeegua gîankeene na kîra kîa Rubeni bwa iti kuuma mbarî ya uumîîro bwa riûa mwanka bwa ûthwîro bwa riûa. 8 Bwa iti ya gîcuncî kîa Njunda kuuma bwa uumîîro bwa riûa gîkeegua kîrî gîcuncî kîra bûkaathûra. Gîkeegua kîrî na wariî bwa kiromita îkûmi na ciîrî na nucu na ûraaya bûkeegua bûgana bwa icuncî bira bingî kuuma bwa uumîîro bwa riûa mwanka bwa ûthwîro bwa riûa. Nyomba ya Ngai îkeethîrwa îrî gatîgatî ga gîcuncî gîku. 9 Mbarî îra bûkaaruta n'ûntû bwa Mwathani îkeethîrwa îrî na ûraaya bwa kiromita îkûmi na ciîrî na nucu, na wariî bwa kiromita îkûmi. 10 Ûûgû i bu gîcuncî kîra kîtheru gîkaagaîgwa; gîcuncî kîa athînjîri gîkeethîrwa kîrî na ûraaya bwa kiromita îkûmi na ciîrî na nucu rûteere rwa bwa neegûrû, na kiromita itaano rûteere rwa bwa ûthwîro bwa riûa, na kiromita itaano rûteere rwa uumîîro bwa riûa, na kiromita îkûmi na ciîrî na nucu rûteere rwa bwa iti na Nyomba ya Ngai îrî gatîgatî. 11 Gîcuncî gîkî gîkeethîrwa kîrî kîa athînjîri bara baathûre ba rûrîîyo rwa Sandoki, bara baantûmîkîîre, na bataûra rîra antû ba Aisiraeri baûrire ta bûra Arawi baarûthire. 12 Gîkeethîrwa kîrî gîcuncî kîao kîa mwanya kiumîîte gîcuncîîni kîîtheru kîa nthîgûrû, Bantû Ara Atheru Mûno, kîra gîgaankana na gîcuncî kîa Arawi. 13 Gwankana na gîcuncî kîa athînjîri, Arawi bakeethîrwa barî na gîcuncî kîrî na ûraaya bwa kiromita îkûmi na ciîrî na nucu na wariî bwa kiromita itaano. Ûraaya bunthe bwakîo bûkeethîrwa bûrî kîromita îkûmi na ciîrî na nucu na wariî bwa kiromita itaano. 14 Batikooro beendia gacuncî nwa kaniini kuuma ku kana bakûûrania na gîntû kîngî. Gîkî i gîcuncî kîega mûno kîa nthîgûrû na gîtikaanenkerwe antû bangî, n'ûntû i kîîtheru kîa Mwathani.

15 “Gîcuncî kîra gîgaatigara kîa ûraaya bwa kiromita îkûmi na ciîrî na nucu na wariî bwa kiromita ciîrî na nucu, gîkeethîrwa kîrî gîa gûtûmîrwa i taûni ta wîthîre, ta gûtûûra ku na kûrîma. Na taûni îkeethîrwa îrî gatîgatî, 16 na bibi i bio bikeethîrwa birî ithimi biayo; mbarî ya bwa îgûrû ûkeegua îrî na ûraaya bwa kiromita ciîrî na mita magana maîrî ma mîrongo îtaano, na mbarî ya bwa iti ûkeegua îrî kiromita ciîrî na mita magana maîrî ma mîrongo îtaano, mbarî ya bwa uumîîro bwa riûa wariî bwa kiromita ciîrî na mita magana maîrî ma mîrongo îtaano na mbarî ya ûthwîro bwa riûa wariî bwa kiromita ciîrî na mita magana maîrî ma mîrongo îtaano. 17 Kûthiûrûkîîra taûni gûkeethîrwa kûrî na gîcuncî gîtarî gîtûmîre, na gîkeethîrwa kîrî kia mita îgana rîa mîrongo îîrî na itaano mbarî cionthe. 18 Gîcuncî kîra gîgaatigara gîa gîcuncî kîra gîankeene na gîcuncî kîra kîtheru gîkeegua kîrî kiromita itaano gîtambîîte bwa uumîîro bwa riûa kîerekereete taûni na kiromita itaano gîtambîîte bwa ûthwîro bwa riûa kîerekereete taûni. Gîkeegua kîriganîrîîtie na gîcuncî kîra kîtheru. Maketha ma gûntû gûku makeethîrwa marî irio bia kûrîîgwa n'antû ba taûni înu. 19 Aruti ngûgî ba taûni înu bara bakarîma ku, bakauma mîîrîgaani yonthe ya Isiraeri. 20 Gîcuncî gîku kîonthe bûkaathûra gîkeegua kîrî gîa kiromita îkûmi na ciîrî na nucu mbarî cionthe, amwe na gîcuncî kîra kîtheru na gîntû kîonthe gîa taûni.

21 “Kîra gîgaatigara mbarî cionthe cia gîcuncî kîra kîtheru amwe na taûni gîkeethîrwa kîrî kîa mûnene. Wa kîmwe gîa icuncî bibi kîrî na wariî bwa kiromita îkûmi na ciîrî na nucu, gîtambûrûkîîte bwa mîanka ya Isiraeri, kîmwe bwa uumîîro bwa riûa na kîra kîngî bwa ûthwîro bwa riûa. Gîcuncî kîra kîtheru na Nyomba ya Ngai bikeegua birî gatîgatî ga icuncî bibu birî biîrî. 22 Kwoogu into bia Arawi na bia taûni bikeegua birî gatîgatî ka icuncî bia mûnene. Icuncî bia mûnene bikeegua birî gatîgatî ka mwanka wa Njunda mbarî ya neegûrû na mwanka wa Benjameni mbarî ya iti.

Icuncî bia mîîrîga îra îîngî

23 “Bibi i bio icuncî bira bianenkeerwe mîîrîga îra îîngî: Benjameni aatambûrûkîîte agiitanîîtie nthîgûrû ya Isiraeri kuuma mbarî ya uumîîro bwa riûa kûthi bwa ûthwîro bwa riûa. 24 Gîcuncî gîa Simioni gîkeegua gîankeene na kîra kîa Benjameni bwa iti kuuma mbarî ya uumîîro bwa riûa mwanka bwa ûthwîro bwa riûa. 25 Gicuncî gîa Isakaari gîkeegua gîankeene na kîra gîa Simioni kuuma mbarî ya uumîîro bwa riûa mwanka bwa ûthwîro bwa riûa. 26 Gicuncî gîa Seburuni gîkeegua gîankeene na kîra gîa Isakaari kuuma mbarî ya uumîîro bwa riûa mwanka bwa ûthwîro bwa riûa. 27 Gicuncî kîa Ngandi gîkeegua gîankeene na kîra gîa Seburuni kuuma mbarî ya uumîîro bwa riûa mwanka bwa ûthwîro bwa riûa. 28 Na kuuma mwankaani wa Ngandi kwîndama bwa iti mwanka ûkambîîria Tamari ûthi ndûyîîni cia Meriba Kandesi, ûcooke werekere kauro ka mûgûmba ka Miisiri kûthi mwanka Îria rîa Menditarîniani. 29 Îno n'yo nthîgûrû îra mîîrîga ya Isiraeri îkaagaîrwa irî rûgai rwao, i bu Mwathani Ngai akuuga.

Mîîrîga ya taûni

30 “Îno n'yo îkeethîrwa îrî miumagarûkîîro ya taûni: Kwanjîîria mbarî ya bwa neegûrû, îra îkeethîrwa îrî na kiromita ciîrî na mita magana maîrî ma mîrongo îtaano, 31 mîîrîga ya taûni îgeetwa mariîtwa kûringana na mîîrîga ya Isiraeri. Gûkeethîrwa kûrî na mîîrîga îthatû rûteere rwa îgûrû: Mwîrîga wa Rubeni, mwîrîga wa Njunda, na mwîrîga wa Rawi. 32 Mbarî ya uumîîro bwa riûa, îra îrî na kiromita ciîrî na mita magana maîrî ma mîrongo îtaano gûkeethîrwa kûrî na mîîrîga îthatû: mwîrîga wa Njosebu, mwîrîga wa Benjameni, na mwîrîga wa Ndani. 33 Mbarî ya bwa iti, îra îrî kiromita ciîrî na mita magana maîrî ma mîrongo îtaano gûkeethîrwa kûrî na mîîrîga îthatû: Mwîrîga wa Simioni, mwîrîga wa Isakaari, na mwîrîga wa Seburuni. 34 Mbarî ya ûthwîro bwa riûa îra îrî na kiromita ciîrî na mita magana maîrî ma mîrongo îtaano, gûkeegua kûrî na mîîrîga îthatû: Mwîrîga wa Ngandi, mwîrîga wa Aseri, na mwîrîga wa Nabutarî. 35 Mûthiûrûûko wa taûni ûkeethîrwa ûrî kiromita kenda. Na kuuma ntugû înu kûthi mbere, riîtwa rîa taûni rîkeegua rîrî ‘Mwathani Arî Oogo.’ ”