Muuro wa rûûyî kuuma Nyomba ya Ngai
47
1 Rîru ancookia nyuma mwanka mûthûngîîrooni wa Nyomba ya Ngai, na agu rûûyî i rwathiyaga rûkiumaga ruungu rwa gîtugî kîa Nyomba ya Ngai kwerekera bwa uumîîro bwa riûa n'ûntû Nyomba ya Ngai yeerekerete bwa uumîîro bwa riûa. Rûûyî rwathiyaga kuuma bwa ruungu rwa mûthia wa bwa iti ya gîtugî kîa Nyomba ya Ngai, bwa iti ya kîthînjîro. 2 Rîru aanduta nja na njîra ya mwîrîga wa bwa neegûrû, na antongoreeria bwa mûthiûrûûko wa nja mwanka mwîrîga wa ome ûra werekereete bwa uumîîro bwa riûa, na rûûyî rwaumaga bwa mbarî ya iti.3 Eerekereete bwa uumîîro bwa riûa na kîthimi arî nakîo njaraani yake. Muntû ûyu aathima mita magana mataano, rîru antongoreeria twathûngîra rûûyîîni, naru rwakinyaga ndûgicûûni. 4 Kaîrî aathima mita magana mataano, na antongoreeria twathûngîra rûûyîîni, rîru rwakinyaga maru. Aathima mita magana mataano, na antongoreeria twathûngîra rûûyîîni, rîru rwakinyaga kauna. 5 Rira aathimire mita ciingî magana mataano, na rîru warî ûgûtuîka muuro ntaûmba kûringa tatiga nkathambîra. 6 Ambîîra, “Mwana wa muntû, gwata ûntû bûbû bwega.” Rîru aantongoreeria twacooka nyuma tûtambîîte na îgombe rîa muuro. 7 Ncookeete woogu ndoona mîtî îmiingî ngombeeni irî ciîrî cia muuro ûyu. 8 Ambîîra, “Rûûyî rûrû rûthiiyaga bwa gîteere kîa uumîîro bwa riûa na rûkeendama bwa kîbondeeni kîa Njorondani, na rûkathûngîra Îria Rîtarî Mwoyo, rûgatûma rûûyî rûru rûtuîka rwega na rûûtheru. 9 Bantû onthe ara muuro ûyû gûyîrîîte, gûkethagîrwa kûrî na biûmbe bia mîthemba îmingî birî mwoyo. Gûkegagua kûrî na makûyû maingî n'ûntû rûûyî rûrû rwathûngîra ku, rûûyî rwa îria rûgatuîka rûtheru. Kwoogu wa bantû muuro ûyû ûgaakûrûkagîîra into bionthe bira birî oogo bigatûûraga mwoyo. 10 Ategi ba makûyû bakarûngama rûteere rwa îria rîrî kuuma Eni-Gendi mwanka Eni-Egiraimu, gûkeethîrwa kûrî bantû a gûtambûrûkîria neeti. Gûkeethîrwa kûrî na makûyû ma mîthemba îmiingî ta bûra marî Îriani rîa Menditarîniani. 11 Îndî inyaka na maria bira birî îkumbo bitiithera bigaatigwa birî na mwonyo. 12 Ngombeeni mbarî cionthe cia muuro, gûgaakûra mîtî ya mîthemba yonthe ya irio. Mathangû maayo matiinyaara kana matunda marega kûbua, îgaaciaraga matunda meega wa kîra mweri, n'ûntû rûûyî rûra îkûnyua ruumîîte Nyomba ya Ngai. Matunda maayo makeethîrwa marî irio, na mathangû maayo makeegua marî ma kworania.”
Mîanka îmîyerû ya nthîgûrû
13 Ûûgû i bu Mwathani Ngai akuuga, “Îno i mîanka îra bûkaagaa n'yo mînda ya rûgai gatîgatî ka mîîrîga îkûmi na îîrî ya Isiraeri. Njosebu akeethîrwa arî na icuncî biîrî.a 14 Ûkamigaania îganeene. I ndaathiîtîîrie biûyûyû bienu, na nthîgûrû îno îkeethîrwa îrî rûgai rwenu.
15 “Ûyû nuu ûkeethîrwa ûrî mwanka wa nthîgûrû:
Rûteere rwa bwa îgûrû, kuuma Îria rîa Menditarîniani ûthiîte na njîra ya Ethironi mwanka Rebo-Amathi, na kûthi mwanka Sendandi, 16 Mberotha, Siburaimu îra îîthagîrwa îrî gatîgatî ka mwanka wa Ndamasiki na mwanka wa Amathi, kûthi mwanka Aseri Atikoni, îra îrî mwankaani wa Aurani. 17 Kwoogu mwanka ûgataamba kûthi bwa Îria ûkinye nthî Asari-Enoni, ûra wîthagîrwa ûrî bwa îgûrû ya mwanka wa Ndamasiki, na mwanka wa Amathi bwa îgûrû. Ûyû n'uu ûkeethîrwa ûrî mwanka wa mbarî ya bwa îgûrû.
18 Rûteere rwa uumîîro bwa riûa, gatîgatî ka Aurani na Ndamasiki, gûtaamba na Njorondani gatîgatî ka Ngiriandi na nthîgûrû ya Isiraeri, kûthi îria rîa uumîîro bwa riûa kûthi mwanka Tamari. Ûyû n'uu ûkeethîrwa ûrî mwanka wa mbarî ya bwa uumîîro bwa riûa.
19 Rûteere rwa bwa iti, mwanka ûkeendama kuuma Tamari kûthi ndûyîîni cia Meriba Kandesi, kuuma agu kûthi Kaurooni ka Mûgûmba ka Miisiri kûthi Îria rîa Menditarîniani. Ûyû n'uu ûkeethîrwa ûrî mwanka wa mbarî ya bwa iti.
20 Rûteere rwa ûthwîro bwa riûa, Îria rîa Menditarîniani i rîo rîkeethîrwa rîrî mwanka, kuuma agu kûthi bantû eerekanîrîte na Rebo-Amathi. Ûyû n'uu ûkeethîrwa ûrî mwanka wa mbarî ya bwa ûthwîro bwa riûa.
21 “Bûkagaana nthî îno gatîgatî keenu kûringana na mîîrîga ya Isiraeri. 22 Bûkagaana îrî rûgai rwenu na bara bakaraga gatîgatî keenu na barî na aana baciarîrîtwe ku. Bûkabayûkia bakari ta aciarîrwa gûkû Isiraeri. Amwe na biû bakagaîrwa rûgai barî mîîrîgaani ya Isiraeri. 23 Mwîrîgaani woora ageni babu bakeethîrwa bagîkaraga, agu noogo bûkaabagaîra rûgai rwao,” i bu Mwathani Ngai akuuga.