Mawatho mwanya mwanya
46
1 “ ‘Ûûgû i bu Mwathani Ngai akuuga: Mwîrîga wa kîarago kîa bwa ndeeni ûra werekereete bwa ûthwîro bwa riûa ûgaakara ûrî mwinge ntugû inu ithanthatû cia kûruta ngûgî, îndî ntugû ya Sabatû na ntugû ya kûyiûka kwa mweri ûkaarugûrwa. 2 Mûnene akaathûngîîra kanyomba ka mwîrîgaani wa ome na arûgame akubî na gîtugî kîa mwîrîga. Athînjîri bakaaruta kîgongwana gîa kûbîîthua na igongwana biake bia ûkiri. Akaagonga arî agu mwîrîgaani. Rîru aumagare. Mwîrîga ûtikaingwe mwanka ûgoro. 3 Antû ba nthîgûrû bakaagongaga mbere ya Mwathani barî mwîrîgaani ûyu ntugû cia Sabatû na kûyiûka kwa mweri. 4 Kîgongwana gîa kûbîîthua kîra mûnene akaarutîra Mwathani ntugû ya Sabatû i tûtûrûme tûthanthatû tûtarî na ûthûûku na ntûrûme îtarî na ûthûûku. 5 Kîgongwana kîa irio kîra gîkeegua kîrî amwe na ntûrûme gîkeegua kîrî efa îmwe, na kîgongwana kîa irio kîra gîkeegua kîrî na tûtûrûme nwa bûra akaûmba kûruta kîgana, amwe na ngarani ya maguta kîrî wa kîra efa. 6 Ntugû ya kûyiûka kwa mweri akaaruta ncamba îtarî nkûrû na îtarî na wonje, na tûtûrûme tûthanthatû na ntûrûme itarî na wonje. 7 Kîrî kîgongwana kîa irio, akaaruta efa îmwe kîrî wa kîra ncamba, efa îmwe kîrî wa kîra ntûrûme na kîrî tûtûrûme akaaruta wa bûra akaûmba, amwe na ngarani ya maguta kîrî wa kîra efa. 8 Rîra mûnene athûûngîra, akaathûngîîra kanyomba ka mwîrîgaani, na akaumagarûkîîra waagu.9 “ ‘Rira antû ba nthîgûrû înu bakaayaga mbere ya Mwathani biathooni bira bithuure, ûra akaathûngîra na mwîrîga wa bwa îgûrû kûgonga, akaumaga na mwîrîga wa bwa iti, na ûra akaathûngagîra na mwîrîga gwa bwa iti akaumaga na mwîrîga wa bwa îgûrû, baticookaga na njîra ya mwîrîga ûra bathûngîîre nau, îndî bakathiyaga babuurîîte bwa mbere. 10 Rîra baathûngîra, mûnene akaathûnganîîria amwe nabo, na baumagara n'we akaumagara.
11 “ ‘Biathooni na magiita mara mathuure kîgongwana kîa irio gîkeegagua kîrî efa îmwe kîrî wa kîra ncamba ya kiumîri, efa îmwe kîrî ntûrûme, kîrî tûtûrûme gîkeegua kîrî wa bûra akaûmba kweyana, amwe na ngarani ya maguta kîrî efa îmwe. 12 Rîra mûnene eeyana kîgongwana gîa kwîbendera, kîrî gîa kûbîîthua kana gîa ûkiri, kîrî gîa kwîbendera kîrî Mwathani, akaarugûrîrwa mwîrîga wa uumîîro bwa riûa, na akaaruta kîgongwana gîake gîa kûbîîthua kana gîa ûkiri ta bûra arûthaga ntugû ya Sabatû. Rîru aumagare, na arîîkia kuumagara mwîrîga wingwe.
13 “ ‘Ûkaanenkanagîra gatûrûme, ka mwanka ûmwe, gatarî na wonje, karî kîgongwana gîa kûbîîthua kîrî Mwathani ntugû cionthe. Wa kîra rûkîîrî ûkaanenkanagîra kîo. 14 Na ûkaanenkanagîra amwe nakîo kîgongwana kîa irio kîra rûkîîrî, gîa gîcuncî kîmwe kîa bîthanthatû kia efa na gîcuncî kîmwe kîa bithatû kîa ngarani ya maguta n'ûntû bwa kûrinda mûtu. Gîkî i kîgongwana kîa irio kîrî Mwathani, na bûbû i watho bwa kûthingatagwa magiita monthe. 15 Ûgu i bu kîgongwana gîa ntûrûme, kîa irio na kîa maguta gîkaarutagwa wa kîra rûkîîrî, ta kîgongwana gîa kûbîîthua îgiita rîonthe.
16 “ ‘Ûûgû i bu Mwathani Ngai akuuga: Mûnene akaaya kûnenkera nthaka yake kuuma kîrî rûgai rwake, gîku gîkeethîrwa kîrî kîa nthaka yake, gîkeethîrwa kîrî kîmwe gîa into bia mûciî wake. 17 Îndî mûnene akaaya kûneenkera mûruti ngûgî wake kîewa kuuma kîrî rûgai rwake, gîkeethîrwa kîrî gîake mwanka mwankaani wa gûcookanîria, rîru gîcookue kîrî mûnene. N'aana baake bonka baûmba kwaiga kîewa kuuma kîrî rûgai rwake. 18 Mûnene atikooro athûkia gîntû kîa rûgai kuuma kîrî antû, atikaabarute intooni biao na inya, na akaaneenkera nthaka ciake rûgai kuumania na into biake biongwa, kaingo gûteethîrwa kûrî na muntû wakwa ûgatuunywa into biake.’ ”
Gûntû wa kûrugîra
19 Rîru aandeeta gûkûrûkîîra mûthûngîîrooni, ûra warî rûteere rwa mwîrîga, mwanka mûturu wa tûnyomba twa athînjîri tûra twerekerete bwa îgûrû. Aambonia bantû aarî mûthiani wabio, rûteere rwa ûthwîro bwa riûa. 20 Rîru ambîîra, “Aaga i bantû ara athînjîrî bakaarugîra kîgongwana n'ûntû bwa îbîtia na kîgongwana gîa kûthiria meeyia, na bantû ara bakaarugîra kîgongwana kîa irio, i kaingo batabiruta nja kîaragooni kîa ome batikaaye kûgwatithia antû ûtheru.”
21 Rîru aandeeta nja kîaragooni kîa ome, antongoreeria twakûrûkîîra koona irî inya cia kîarago, na kîrî wa kîra koona indoonire kîarago, 22 ndeeni ya koona cia biarago birî bina i kwarî na twarago tûngî tûniini, wa kamwe kaarî ka ûraaya bwa mita mîrongo îîrî na wariî bwa mita îkûmi na itaano. Wa kamwe ga twarago tûtu tûna twarî koonaani irî inya, tunthe i twaganeene. 23 Na i kwarî na nthingo kûthiûrûkîîria biarago bibi birî bina, na ûkonaani bwa nthingo ino i kwarî na gûntû wa kûbua mwanki. 24 Rîru ambîîra, “Bibi i bio irugîro ara bara barutaga ngûgî Nyomba ya Ngai bakaatherûkagîria igongwana bira bikaarutagwa n'antû.”