Gîcuncî kîa nthîgûrû kîa Mwathani kîîtheru
45
1 “ ‘Rîra bûkûgaana nthîgûrû bûkînenkera wora mwîrîga gîcuncî kîa u kîrî rûgai, nwa mwanka bûrute kîbarî kîmwe kîa nthîgûrû kîrî kîa Mwathani na kîrî kîîtheru, na bûkaaruta kîrî kîa ûraaya bwa kiromita îkûmi na ciîrî na nucu na wariî bwa kiromita îkûmi, kîonthe bûra kîgana gîkeegua kîrî kîîtheru. 2 Kuumania nakîo, kîgucî kîganeene mbarî cionthe wa kîra mbarî îrî na mita magana maîrî ma mîrongo îtaano gîkeethîrwa kîrî kîa Nyomba ya Ngai, na kwîthîrwe kîrî na kîbururio kîa mita mîrongo îîrî na itaano gûkîthiûrûkîîria.3 “ ‘Ndeeni ya kîbarî gîku kîîtheru bûthime kîgucî kîa ûraaya bwa kiromita îkûmi na ciîrî na wariî bwa kiromita itaano, kûra gûkeethîrwa kûrî na Nyomba ya Ngai, bantû ara atheru cwe. 4 Gîkeegua kîrî kîgucî kîa nthîgûrû kîîtheru na kîrî kîa athînjîri ba Ngai, bara barutaga ngûgî Nyomba ya Ngai na bakinyagîîra Mwathani kûmûtûmîkîra. Gîkeethîrwa kîrî bantû a nyomba ciao na bantû aatheru a Nyomba ya Ngai. 5 Kîgucî kîngî, kîa ûraaya bwa kiromita îkûmi na ciîrî na wariî bwa kiromita itaano gîkeethîrwa kîrî kîa Arawi bara barutaga ngûgî Nyomba ya Mwathani, gîkeethîrwa kîrî gîa gwaka taûni ciao ara bagaatûûra.
6 “ ‘Gûtaambania na kîbarî gîku gîkaarutwa kîrî kîîtheru bûrute bantû a gwaka taûni kîrî na ûraaya bwa kiromita îkûmi na ciîrî na wariî bwa kiromita ciîrî na nucu, gîkeethîrwa kîrî kîa antû bonthe ba Isiraeri.
Nthîgûrû ya mûnene
7 “ ‘Na kîgucî kîa nthîgûrû gîkarutîrwa mûnene. Kuuma mwankaani wa mbarî ya ûthwîro bwa riûa bwa bantû ara atheru na gûntû kûra kûnenkeretwe taûni gîgataambûrûka bwa ûthwîro bwa riûa mwanka îriani rîa Menditarîniani; na kuuma mwankaani wa uumîîro bwa riûa gîgataambûrûka mwanka mwankaani wa nthîgûrû mbarî ya uumîîro bwa riûa. Na ûraaya bwa kîgucî gîku kîonthe kuuma ûthwîro bwa riûa mwanka uumîîro bwa riûa bûkeegua bûganeene na ûraaya bwa kîthaka wa kîmwe kîa bira binenkeretwe mwîrîga wa Isiraeri. 8 Kîgucî gîkî kîa nthîgûrû gîkeethîrwa kîrî rûgai rwake ndeeni ya Isiraeri. Na anene bakwa batiinyîîria antû baakwa kaîrî, îndî bakaareka antû ba Isiraeri beegwatîra nthîgûrû kûringana na mîîrîga yao.
9 “ ‘Ûûgû i bu Mwathani Ngai wa Isiraeri akuuga, “I bwîyîîtie bwa kûgana, biû anene ba Isiraeri! Rekanaani na mantû maathûûku ma ûgîti na kwinyanîîria, na bûrûthe mantû ma ûmma na mara mabatîîrie. Tigaani kwîngatia antû baakwa, i bu Mwathani Ngai akuuga.”
Ûrito na ithimi
10 “ ‘Bwîthîrwe bûrî na ithimi bia mma bia ûrito na ûraaya. 11 Efa îkeethîrwa îrî kîthimi gîa into biûmo na mbathi kîîthîrwe kîrî kîthimi kîa into bia rûûyî na biîthîrwe biganeene, na omeri i kîo gîkeegua kîrî kîganaania kîa bionthe. Omeri îmwe îkeethîrwa îrî na efa îkûmi, na mbathi îkûmi i bûmwe na omeri îmwe. 12 Ithimi bienu bia ûrito bikeethîrwa bikari ûûgû; Gera mîrongo îîrî i sekeri îmwe, na sekeri mîrongo îthanthatû i bûmwe na mina îmwe.
Biegwa
13 “ ‘Bibi i bio biegwa bira bûbatîîrue bûruta, gîcuncî kîmwe kîa bîthanthatû kîa efa kuuma kîrî omeri îmwe ya ngano, na gîcuncî kîmwe kîa bithanthatû kîa efa kuuma kîrî omeri îmwe ya sayiri, 14 namo maguta makeegua marî gîcuncî kîmwe gîa îkûmi kuuma kîrî wa kîra kooro. (Kooro îmwe i bûmwe na omeri îmwe na îrî na mbathi îkûmi.) 15 Na bakaarutaga ng'ondu îmwe kuuma kîrî gîkoondo kîa ng'ondu magana maîrî, ûrîîthiini bwa Isiraeri. Gîkî i kîo kîgongwana kîa irio, gîa kûbîîthua, na kîa thîîrî, n'ûntû bwa kûrekerwa kwa meeyia maao, i bu Mwathani Ngai akuuga. 16 Antû bonthe ba nthîgûrû bakaaruta kîgongwana gîkî kîrî mûnene wa Isiraeri. 17 Na îkeethîrwa îrî ngûgî ya mûnene kweyana nyamû cia kûrutwa igongwana bia kûbîîthua, bia irio, biakûnyua biathooni bia kûyiûka kwa mweri, Sabatû, na biatho bingî bionthe bira biaige n'antû ba Isiraeri. Akeeyana kîgongwana kîa meeyia, kîa irio, gîa kûbîîthua, na gîa ûkiri n'ûntû bwa gûcookanîîria antû ba Isiraeri.
Biatho
18 “ ‘Ûûgû i bu Mwathani Ngai akuuga: Mweriini wa mbere, ntugû ya mbere ya mweri, ûkaathûkia ndegwa îtarî nkûrû îtarî na koothûûku, na ûtherie Nyomba ya Ngai. 19 Na mûthînjîri athûkie nthakame îmwe ya kîgongwana kîa meeyia na amîake itugîîni bia mwîrîga wa Nyomba ya Ngai, koona cionthe irî inya cia kîthînjîro, na itugîîni bia mûthûngîîro wa kîarago kîa ndeeni. 20 Ûkaarûtha woogu ntugû ya mûgwanja ya mweri kîrî muntû wonthe ûra wîyîîtie atakwenda kana atakûmenya. Kwoogu, na njîra îno ûtherie Nyomba ya Ngai.
21 “ ‘Mweriini wa mbere, ntugû ya îkûmi na inya, bûgaakûngwîra kîatho gîa Pasaka, na bûrîîyage mîgaate îtarî na ndawa ya kwimbithia bantû a ntugû mûgwanja. 22 Ntugû înu mûnene n'we akaaruta ndegwa îtarî nkûrû îrî kîgongwana kîa meeyia maake na ma antû bonthe. 23 Na wera ntugû ntugûûni inu mûgwanja cia kîatho akaaruta ta kîgongwana gîa kûbîîthua ndegwa mûgwanja itarî nkûrû na ntûrûme mûgwanja itarî nwa koothûûku, na nthenge îmwe wa ntugû kîrî kîgongwana kîa meeyia. 24 Akaaruta kîrî kîgongwana kîa irio, ndebe îmwe n'ûntû bwa kîra ncamba, ndebe îmwe n'ûntû bwa kîra ntûrûme, na ngarani îmwe ya maguta n'ûntû bwa kîra ndebe. 25 N'ûntû bwa kîatho gîa tûganda, kîra kîambagîîria ntugû ya îkûmi na itaano ya mweri wa mûgwanja, gwa kagiita ga ntugû mûgwanja nwa ta bu akaarutaga kîgongwana kîa meeyia, gîa kûbîîthua, kîa irio, na kîa maguta.