Mwîrîga ûmwinge
44
1 Rîru muntû ûra aantongoreetie ancookia nyuma mwîrîgaani wa ome wa bantû ara atheru, ûra werekereete bwa uumîîro bwa riûa, na n'warî ûmwinge. 2 Mwathani ambîîra, “Mûrango ûyû ûgaakara ûrî mwinge, na ûtiirugûrwa. Gûtirî we akaathûngîîra oogo. N'ûntû Mwathani, Ngai wa Isiraeri, n'athûngîrîîte nau. Kwoogu ûgaakara ûrî mwinge. 3 Nwa mûnene wenka, n'ûntû we i mûnene aûmba gûkara nthî njîraani ya mwîrîga akîrîa irio mbere ya Mwathani. Akaathûngîîra bwa kanyomba ka mwîrîgaani, na acookeere oogo.”Wîtîgîîrua Nyomba ya Ngai
4 Rîru andeeta gûkûrûkîîra njîra ya mûrango wa bwa îgûrû mwanka mwerekera wa Nyomba ya Ngai, na ndaaraitha, we! Ûtugi bwa Mwathani bwaûyûra Nyomba ya Ngai, ndawa nthî na ûthiû bwakwa. 5 Mwathani ambîîra, “Mwana wa muntû, gwata bwega, raitha bwega, na ûthikîîrie bwega mantû mara monthe ngaakwîra îgûrû rîa mîtaratara ya Nyomba ya Mwathani na mawatho maayo monthe, na ûmenye bwega bara baûmba wîtîgîîrua na bara bataûmba wîtîgîîrua bantû ara atheru. 6 Îra ndemi ino, ndemi cia antû ba Isiraeri, ûûgû i bu Mwathani Ngai akuuga, ‘Biû antû ba Isiraeri, i kwîthîrwe kûrî na mûthia wa meeyia meenu marî njici, 7 ma wîtîgîîria mbûyi, bara batarî bataane nkoro na mwîrî, beethîrwa barî bantû aakwa ara atheru bwekîra Nyomba yakwa mûgiro, rîra bwandutîîre igongwana bia irio, maguta na nthakame. I buunangîîte kîrîîkanîro gîakwa n'ûntû bwa mantû marî njici mara bûkûrûtha. 8 Na bûtimenyagîîra into biakwa biitheru îndî bwîtîgîîrîîtie ageni ba kuuma kûûngî bamenyagîîra.
9 “ ‘Kwoogu ûûgû i bu Mwathani Ngai akuuga: Gûtirî mbûyi, muntû ûtarî mûtaane nkoro na mwîrî, wa mbûyi cionthe ira itûûraga gatîgatî ga antû ba Isiraeri, akaathûngîra bantû akwa ara atheru.
Arawi
10 “ ‘Arawi bara baantiganîîrie, baûra kuuma kîrî niû baathiingata mîbuanaano rîra Isiraeri baataratarire, bagaakamata nthînje yao bongwa. 11 Amwe na ûgu bakeethîrwa barî aruti ngûgî baakwa bantû akwa ara atheru, bakîmenyagîîra mîrango ya Nyomba ya Mwathani, na bakîrutaga ngûgî Nyomba ya Ngai. I bo bakaathînjaga igongwana bia kûbîîthua na rîra bîewa bikaarutwa n'ûntû bwa antû, bakaarûngama mbere ya antû na babatûmîkîre. 12 N'ûntû i baabatûmîkîîre mbere ya mîbuanaano na baatûma antû ba Isiraeri bataratara na kûgwa meeyiani na baarûtha ûthûûku. Kwoogu, i nthiîtîîtie îgûrû rîao, atî bagaakamata îkaanûkia rîao, i bu Mwathani Ngai akuuga. 13 Batiithengeera akubî naani, kûndutîra ngûgî ta athînjîri, kana baaya akubî na into biakwa bira bitheru kana bira bitheru mûno, îndî bakaagîa îgi, rîrî maumithio ma mantû marî njici mara barûthîîte. 14 Îndî amwe na ûgu nkabathuura kûrûngamîîra nyomba yakwa, kwingia moobatu maayo monthe, na mara makaarûthwa ku.
Athînjîri
15 “ ‘Îndî Arawi bara baarî athînjîri, ba rûrîîyo rwa Sandoki, bara baathiingatire mawatho ma bantû akwa ara Atheru rîra antû ba Isiraeri baantiganîîrie, bakaaya akubi na bantûmîkîre na bakaandutîra kîgongwana kîa maguta na nthakame, i bu Mwathani Ngai akuuga. 16 I bo bonka bakaathûngîra bantû akwa ara atheru, na i bo bakaathi akubî na kîthînjîro gîakwa bantûmîkîre, na i bo bakeegua barî atongoria.
17 “ ‘Rîra bakaathûngîra mîrango ya kîarago kîa ndeeni, nwa mwanka beekîre nguo cia gatani. Na batigeekîre nguo cia guaya, rîra bakûruta ngûgî mîîrîgaani ya kîarago kîa ndeeni, na kinya naagu ndeeni. 18 Bakeethîrwa boogeete iremba bia gatani kîongo, na nguo cia ndeeni cia gatani tuuna twao, na batigeekîre gîntû nwa kîrîkû kîra kîûmba kûbathithinia. 19 Rîra bauma naara antû barî kîaragooni kîa nja, nwa mwanka barute nguo ira bakûrutaga nacio ngûgî, na baciaige tûnyombaani tûra tûtheru, rîru beekîre nguo ciingî, kaingo batateereera antû ûtheru na nguo inu ciao.
20 “ ‘Batikeenje biongo kana bareka ntundu iraayîa mûno, i ka bagaakubîagia ntundu cia biongo biao. 21 Gûtikaagîte mûthînjîri akaanyua ndibei rîra aathûngîra kîarago kîa ndeeni. 22 Batikaagûre ntigwa, kana mwekûrû ûmûte i mwene, îndî nwanga gacobo kuuma kîrî antû ba Isiraeri, kana ntigwa îra îrî ntigwa ya mûthînjîri. 23 Bakaarutana antû baakwa mwanya wa kîra kîtheru na kîra kîrî kîa wîthîre, na baboonie kwathûrana kîra gîtarî kîtheru na kîra kîtheru. 24 Rîra kûrî na nkarari i bo bakeethîrwa barî agiiti magamba, na bakaagambaga kûringana na ûgambi bwakwa. Bakaagaigaga mawatho na mataaro maakwa îgûrû rîa biatho biakwa bionthe bira mbathûrîîte, na baige Sabatû ciakwa i ntheru.
25 “ ‘Batikeebîkîre mûgiro na njîra ya kûthi akubî na muntû ûmûkuû, îndî nwa beebîkîre mûgiro n'ûntû bwa îthe, gina, kana nthaka kana mwarî, mûruagina kana mwaragina ûtagûrîîtwe. 26 Nyuma ya kûtherua nwa mwanka akare kagiita ga ntugû mûgwanja. 27 Ntugû îra akaathi bantû ara atheru, ndeeni ya kîarago kîa ndeeni, kûruta ngûgî bantû ara atheru, akaaruta kîgongwana n'ûntû bwa wîyia bwake wengwa, i bu Mwathani Ngai akuuga.
28 “ ‘Rûrû i ru rûkeethîrwa rûrî rûgai rwao, I niû rûgai rwao na bûtikaabagaîre into bia ûtûûro naagu Isiraeri n'ûntû I niû nkeegua Ndî rûgai rwao. 29 Bakaarîîyaga biegwa bia irio, biewa n'ûntû bwa meeyia, na biewa n'ûntû bwa mabîtia na into bionthe bira binenkanîrîîtwe kîrî Mwathani wa Isiraeri bikeegua birî biao. 30 Maciaro ma mbere na biewa bionthe bia mwanya bikeegua birî bia athînjîri. Bûbatîîrue bûbaa gîcuncî kîa mbere kîa mûtu wenu kaingo kîthaarimo gîkaraga mîciî yenu. 31 Mûthînjîrî atikaarîe kîrîîka nwa kîrîkû, îrî nyoni kana nyamû îkuîte yongwa kana îtembûrangîîtwe i nyamû.