Ûkumio bwa Mwathani bwacooka Nyomba ya Ngai
43
1 Rîru aandeeta mwîrîgaani ûra werekereete bwa uumîîro bwa riûa. 2 Na agu, ûtugi bwa Ngai wa Isiraeri bwaya kuuma bwa uumîîro bwa riûa. Na kayû gaakari ta kayû ka ndûûyî inene, na nthî yakengakenga n'ûkumio bwake. 3 Kîoneki kîra ndoonire gîakari ta kîra ndooneete rîra Ngai aayîîte kwînyangia taûni, na ta kîoneki kîra ndooneete akubî na muuro wa Kebari, na ndagwa nthî na ûthiû. 4 Ûkumio bwa Mwathani bwathûngîîre Nyomba ya Mwathani gûkûrûkîîra mwîrîga wa uumîîro bwa riûa.5 Rîru Kîrundu ambûkîîria îgûrû, na andeeta kîaragooni kîa bwa ndeeni, na ûtugi bwa Mwathani bwaûyûra Nyomba ya Ngai. 6 Muntû ûyu wa aarûngi akubî rûteere rwakwa, ndeegua muntû akîaria naani kuuma Nyomba ya Mwathani. 7 Ambîîra, “Mwana wa muntû, aaga i bantû aakwa a gîtî gîakwa kîa ûnene na gîkinyithio kîa magûrû maakwa, ara ngaakara gatîgatî ga antû baakwa Isiraeri îgiita rîtarî mûthia. Antû ba Isiraeri batiîkîra riîtwa rîakwa rîîtheru mûgiro kaîrî, bo kana anene baao na njîra ya ûthûngîîri bwao, kana na njîra ya biimba bia anene baao. 8 Rîra baarûthire mîîrîga yao akubî na mîîrîga yakwa watuîka i rûthingo akî rwankanîîtie nyomba ciao na yakwa, baaka riîtwa rîakwa rîîtheru mûgiro na njîra ya mantû maao marî njici mara baarûthire, kwoogu ndabathiria na mûthûûro wakwa. 9 Îîndî i barutarute ûmaraaya bwao na biimba bia anene baao akubî naani, na ngaakarania nabo îgiita rîtarî mûthia.
10 “Îndî woû, mwana wa muntû, îra antû ba Isiraeri mantû ma Nyomba ya Ngai, na bathûgaanîrie mwakîre wayo, kaingo beegua nthoni n'ûntû bwa moothûûku maao. 11 Rîra bakeegua nthoni n'ûntû bwa mantû mara monthe barûthîîte, bamenyithie mantû ma mwakîre wa nyomba îno ya Ngai, mûbangîîre wayo, mîrango ya kuumagara na ya kûthûûngîra, na mwonekere wayo uunthe, mîtaratara na mîbango yonthe na mawatho maayo monthe, na ûmaandîke monthe mbere yao bakionaga, kaingo bamenyeera na bathingata mîbango na mîtaratara yayo yonthe. 12 Bûbu i bu watho bwa Nyomba ya Ngai, mwanka uunthe ûra ûrî îgûrû rîa kîrîma kûthiûrûûka kunthe ûkeegua ûrî mûtheru mûno. Bûbû i bu watho bwa Nyomba ya Ngai.
Kîthînjîro
13 “Bibi i bio ithimi bia kîthînjîro, kûthiûrûûka kîthînjîro i kwarî na mûberethi wa woorokeru bwa nucu mita, wariî bwa nucu mita na rûrengo rwa centimita mîrongo îîrî na itaano. 14 Kîthînjîro kîarî na mîgeema îthatû îra yaaganeene mbarî cionthe. Na yaanyiiaga yumîîte nthî kûthi îgûrû. Mûgeema wa nthî buru warî na ûraaya bwa mita inyanya na wariî bwa mita inyanya na ûraaya bwa gwîtia mita îmwe. 15 Mûgeemaani wa îgûrû wa kîthînjîro noogo igongwana biabîîthagîrua. 16 Gîcuncî kîa îgûrû gîa kîthînjîro kîarî kîa mita ithanthatû mbarî cionthe. 17 Gatîgatî kinya ko ikaaganeene, mita mûgwanja nteere cionthe, kîrî na rûrengo mbarî ya ome rwa centimita mîrongo îîrî na itaano. (Mûberethi warî na waariî bwa centimita mîrongo îtaano.) Nkinyo ira cietagia kîthînjîrooni ciarî mbarî ya uumîîro bwa riûa.”
Kûtherua gwa kîthînjîro
18 Rîru muntû ûra aantongorereetie ambîîra, “Mwana wa muntû, ûûgû i bu Mwathani Ngai akuuga: Îno n'yo mîtaratara ya kîthînjîro. Ntugû îra kîthînjîro gîgaakwa n'ûntû bwa kûbîîthia igongwana na gûkîmincîria nthakame, 19 ûnenkere athînjîri ba mwîrîga wa Arawi ba rûrîîyo rwa Sandoki, bara baayaga akubî naani kûndutîra ngûgî, ncamba ya ng'ombe ya kîgongwana kîa meeyia. I bu Mwathani Ngai akuuga. 20 Na ûthûkie nthakame îmwe yaayo, na ûmîake îgûrû rîa ngoci irî inya cia kîthînjîro, na koonaani inya cia mîthia ya kîthînjîro, na îgûrû rîa rûrengo kûthiûrûkîîria, ûgu i bu ûgaakîtheria na ûkiathûre. 21 Na ûkaathûkia ndegwa ya kîgongwana kîa meeyia, na kîbîîthîrue bantû ara athuure ome ya Nyomba ya Ngai, ome ya bantû ara atheru. 22 Ntugû ya ciîrî ûkaaruta nthenge îtarî na ûthûûku kîrî kîgongwana kîa meeyia, na kîthînjîro gîkaatherua, wa ta bûra kîarûthirwe na ndegwa. 23 Warîîkia gûkîtheria, ûrute ndegwa na ntûrûme kuuma ndîîthiani na itarî na ûthûûku. 24 Ûcinenkanîre mbere ya Mwathani, na athînjîri bacimincîrie mwonyo na bacirute îrî kîgongwana gîa kûbîîthia kîrî Mwathani. 25 Bantû a ntugû mûgwanja wa îra ntugû ûkaanenkanagîra nthenge îrî kîgongwana kîa meeyia, na kinya ncamba na ntûrûme kuuma ndîîthiani na itarî na ûthûûku, irutwe. 26 Bantû a ntugû mûgwanja bakaaruta igongwana kîthînjîrooni na kwoogu bagakîtheria. 27 Ntugû inu mûgwanja ciathira, rîru kuuma ntugû ya inyanya kûthi mbere athînjîri bakaarutagîra kîthînjîrooni igongwana bienu bia kûbîîthua na bia ngwatanîro, na nkabwîtîgîîria. I bu Mwathani Mwene Inya akuuga.”