Gûntû kûûtheru na rûthingo rwa ome
42
1 Rîru muntû ûra aantongoreereetie aambira kîaragooni kîa ome, kwerekera bwa îgûrû, na ambira tûnyomba tûra twerekanîrîîte na kîarago kîa Nyomba ya Ngai kûraithana na mwako wa bwa neegûrû. 2 Ûraaya bwa mwako ûyû bwarî mita mîrongo îtaano, na wariî bwa yo bwarî mita mîrongo îîrî na itaano. 3 Rûteere rûmwe rwayo rwerekereete kîeni kîra kîarî rûteere rwa Nyomba ya Ngai. Na rûteere rûra rûngî rwerekereete kabaranda ga kîarago kîa ome. N'yo yaakîîtwe îrî ya ngoroba ithatû. Ngoroba îra yarî îgûrû rîa îra îngî n'yarî îniini bûra antû bakîona bara bangî barî ruungu rwao. 4 Bwa mbere ya tûnyomba i kwarî na mûkûrûkîîro bwa ndeeni, wa wariî bwa mita itaano na ûraaya bwa mita mîrongo îtaano. Na mîrango yayo yarî bwa îgûrû. 5 Îndî tûnyomba twa ngoroba ya îgûrû itwarî tûûniini nkûrûki ya twa ngoroba ya gatîgatî na tûra twarî twa ngoroba ya ruungu. 6 Tûnyomba tûra twarî ngorobaani ya ithatû tûtaarûngîkîîtwe na itugî ta ngoroba ira ingî ira ciarî kîaragooni kîa ome. 7 I kwarî na rûthingo rwathiiyanîîtie na tûnyomba, kwerekera bwa kîarago kîa bwa ome, kwerekanîra na tûnyomba, rwarî na ûraaya bwa mita mîrongo îîrî na itaano. 8 N'ûntû mwako ûra warî na tûnyomba ûra warî akubî na baranda ya kîarago kîa ome warî wa mita mîrongo îîrî na itaano, na ûra nau werekanîrîîte na Nyomba ya Ngai warî na mita mîrongo îtaano. 9 Ruungu rwa tûnyomba tûtû i wakûrûkîîrîîte kayîra kara muntû aakûrûkaga nako aumîîte bwa uumîîro bwa riûa kaingo athûngîra aumîîte bwa kîarago kîa bwa ome. 10 Rûteere rwa bwa iti ûtaambîîte na ûraaya bwa kîarago kîa ome rûra rûgwatithanîîtie kîarago kîa Nyomba ya Mwathani na kwerekanîra na rûthingo rwa ome kinya oogo i kwarî na tûnyomba. 11 Mbere ya tûnyomba tûtu i kwarî na kayîra gagûkûrûkîîra wa ta kara kaarî bwa neegûrû. Mwako ûyu warî na ûraaya na wariî wa ta bwa ûra ûngî. Wana mîîrango n'yabuaneene namîîrango ya mwako wa bwa îgûrû. 12 I kwarî na mwîrango ruungu rwa tûnyomba tûra twarî rûteere rwa iti ya mwako, mûthiani mbarî ya uumîîro bwa riûa ara rûthingo rwanjîîrîîtie.13 Rîru ambîîra, “Tûnyomba twa bwa îgûrû na twa bwa iti kwerekana na kîarago kîa Nyomba ya Ngai i tûnyomba tûûtheru, ara athînjîri bara bathiiyaga mbere ya Mwathani bakaarîîyagîra biewa bira bitheru mûno. Agu noogo bakaagaiga biegwa bira bitheru mûno, biewa bia irio, biewa bia meeyia, na biegwa bia mabîtia, n'ûntû bantû aaga n'atheru. 14 Rîra athînjîri barî Nyomba ya Ngai na beende kuumagarûka bathi kîaragooni kîa noome, nwa mwanka batige tûnyombaani tûtu nguo ira ntheru bagwîkîrîîte rîra bagûtûmîkagîra Mwathani. Nwa mwanka beekîre nguo ira ingî mbere baumagara naara antû beethîranaga.” 15 Rîra aarîkiirie kûthima ndeeni ya kîeni kîa Nyomba ya Ngai, antongoreeria twauma na mwîrîga ûra waraithîîte bwa uumîîro bwa riûa, na aathima kîeni kîa Nyomba ya Ngai kûthiûrûûka. 16 Rîru aathima mbarî ya uumîîro bwa riûa agîtûmagîra rûthanje, na kwarî mita magana maîrî ma mîrongo îtaano. 17 Rîru aagarûka na aathima bwa îgûrû na rûthanje, na kwarî mita magana maîrî ma mîrongo îtaano 18 aathima bwa iti, agîtûmagîra rûthanje na kwarî mita magana maîrî ma mîrongo îtaano 19 na aagarûka aathima bwa ûthwîro bwa riûa wa agîtûmagîra rûthanje na kwarî mita magana maîrî ma mîrongo îtaano. 20 Aathima mbarî ciayo cionthe irî inya, nacio ciarî mita magana maîrî ma mîrongo îtaano mbarî cionthe. N'yarî na rûthingo kûmîthiûrûûka, na rûthingo rûru i ru rwagaanîîtie Bantû ara Atheru na Bantû ara Atheru Mûno, na yarî na wariî bwa mita magana maîrî ma mîrongo îtaano, n'ûntû bwa kwathûrana gûntû kûra kûtheru na kûra gûtarî kûtheru.