Nyomba îra nene ya Nyomba ya Ngai
41
1 Rîru muntû ûra aantongoreetie aambira bantû ara atheru. Aathima kayîra kara kaathiîte bwa ndeeni nako kaarî na wariî bwa mita ithatû. 2 Wariî bwa mûthûngîîro bwarî bwa mita itaano na ûmatu bwa nthingo cia mûthûngîîro bwarî mita ciîrî na nucu mbarî cionthe, aathima bantû ara atheru, aarî na ûraaya bwa mita mîrongo îîrî na wariî bwa mita îkûmi.Kanyomba kara kaniini ka Nyomba ya Ngai
3 Rîru aathûngîra kanyomba kara kaarî ndeeni cwe na aathima kayîra kara kaathûngîrîîte ku, kaarî na wariî bwa mita îmwe na wariî bwa mita ithatû, na nthingo cia nteere irî ciîrî ciarî na ûmatu bwa mita ithatû na nucu. 4 Aathima nyomba yongwa na yarî na mita îkûmi mbarî cionthe. Nyomba îno yarî mbere ya bantû ara atheru. Rîru ambîîra, “Aaga noo Bantû ara Atheru Mûno.” 5 Rîru aathima ûmatu bwa nthingo cia ndeeni cia Nyomba ya Ngai, bwarî mita ithatû, na i kwarî na tûnyomba tûniini twathiûrûkîîte Nyomba ya Ngai na wa kamwe kaarî na wariî bwa mita ciîrî. 6 Tûnyomba tûtû twarî ngoroba ithatû, weera ngoroba îrî na tûnyomba mîrongo îthatû. Rûthingo rwa ome rwa Nyomba ya Ngai rwa wa kîra ngoroba, i rwarî rûcege nkûrûki ya rwa ngoroba îra îrî ruungu kaingo tûnyomba tûrûngama tûtawatithanîîtue naru. 7 Tûnyomba tûra twathiûrûûkîrîîte Nyomba ya Ngai twakîîtwe twîtîîtie na kara kanyomba gakîaramaga nkûrûki ya kara karî ruungu rwako. Njîra ya gwîtia yeetîîtie kuuma ngoroba îmwe kûthi îra îîngî. 8 Rîru ndoona Nyomba ya Ngai na mûcingi ûûkîîrîîtue kûmîthiûrûkîîra na îgûrû rîa uu i gwakîîtwe tûnyomba na warî wa mita ithatû wîtia. 9 Ûmatu bwa rûthingo rwa nja rwa tûnyomba twa ndeeni bwarî mita ciîrî na nucu. Mwanya ûra warî gatîgatî ga tûnyomba twa rûteere rwa nyomba ya Mwathani, 10 na tûnyomba twa athînjîri twarî na wariî bwa mita îkûmi kûthiûrûkîîra Nyomba ya Ngai nteere cionthe. 11 Tûnyomba twa nteere i twakinyîrîkaga kuuma mwanyaani ûra watigîîtwe, mûrango ûmwe werekera bwa îgûrû, na mûrango ûra ûngî werekera bwa iti, na wariî bwa mwanya ûra watigîîtwe bwarî bwa mita ciîrî na nucu kûthiûrûûka.
Mwako ûra warî rûteere rwa ûthwîro bwa riûa
12 Gataaria mûthiani wa mwanya ûra warî rûteere rwa ûthwîro bwa riûa rwa Nyomba ya Ngai, i kwarî na nyomba yarî na ûraaya bwa mita mîrongo îna na itaano na wariî bwa mita mîrongo îthatû na itaano, na nthingo ciayo ciarî na ûmatu bwa mita ciîrî na nucu kûthiûrûkîîra.
Ithimi na mantû mangî meegiî Nyomba ya Ngai
13 Rîru muntû ûyu aathima ome ya Nyomba ya Ngai na yarî na ûraaya bwa mita mîrongo îtaano, na kuuma nyuma ya Nyomba ya Ngai kûgiitania kîeni kûthi bwa nyomba îra yarî mbarî ya ûthwîro bwa riûa, ûraaya bûbu kinya bu bwarî mita mîrongo îtaano. 14 Na wariî bwa mbarî ya mbere ya uumîîro bwa riûa bwa Nyomba ya Ngai amwe na kîeni, mita mîrongo îtaano. 15 Rîru aathima ûraaya bwa nyomba înu mwanka mbarî ya ûthwîro bwa riûa amwe na tûnyomba twayo mbarî cionthe n'yo yarî na ûraaya bwa mita mîrongo îtaano. Kanyomba ka mûthûngîîrooni, bantû ara atheru, na bantû ara Atheru Mûno, 16 cionthe ciakîîtwe na mbaaû kuuma nthî mwanka ndîrîcaani. 17 Kûthi mwanyaani îgûrû rîa mûrango mwanka kanyomba ka ndeeni, wana kinya nja. Na nthingooni cionthe kûthiûrûûka kanyomba ka ndeeni na Bantû Ara Atheru Mûno i kwarî na magemio makari ta 18 mînaathi na biûmbe birî na mathabu. Rûteere rwa wa kîra mûnaathi kwarî na mbica ya kîûmbe kîrî mathabu kûthiûrûûka nyomba yonthe. Wa kîra kîûmbe kîarî na moothiû maîrî. 19 Ûthiû bwa muntû bwerekereete mûnaathi mbarî îmwe na ûthiû bwa cimba bwerekera mûnaathi mbarî îra îîngî. Ûgu i bu waakari Nyomba ya Ngai yonthe. 20 Kuuma barandaani ome kûthi bantû îgûrû rîa mûrango, biûmbe birî na mathabu na mînaathi biarûthîîtwe nthingooni cionthe. 21 Itugî bia mwîrîga wa Nyomba ya Ngai na bantû ara Atheru Mûno biaganeene mbarî cionthe.
Kîthînjîro kîa mbaaû
22 Na i kwarî na kîthînjîro kîarûthîîtwe na mbaaû, kîarî kîa mita îmwe na nucu wîtia, na wariî bwa mita îmwe na ûraaya bwa mita îmwe na ûkona bwakîo bwarî bwa mbaaû. Koona cia kîo, ûkona bwakîo na nteere cia kîo ciarî cia mbaaû. (Muntû ûyu ambîîra ata rî, meetha îno n'yo îkaraga mbere ya Mwathani).
Mîrango
23 Bantû ara Atheru na ara atheru mûno i kwarî na mîrango îîrî mbarî irî ciîrî cia mûthûngîîro. 24 I kwarî na mîrango îîrî wa kîra rûteere rwa mûthûngîîro îra yaarugûkagîra gatîgatî. 25 Mîrangooni ya Bantû ara Atheru i kwarûthîîtwe biûmbe birî mathabu amwe na mînaathi, ta bûra ciakari nthingooni, na i kwarî na rwembea rwa mbaaû bwa mbere ya kanyomba ka mwîrîgaani ka nja. 26 Nteere cia kanyomba gaka i kwarî na ndirica, na nthingo i ciagemeetue na mbica cia mîkîndû.