Esekieri 40

Nyomba înjerû ya Ngai

1 Kwarî mwanjîîrioni wa mwanka, ntugû ya îkûmi ya mweri, nyuma ya tûgûtaîgwa na mwanka wa îkûmi na îna kuuma Njerusaremu îkwînyangua. Ntugû înu inya ya Mwathani yambûyîîra na yankamata yambira Njerusaremu. 2 Na njîra ya kîoneki kîa Mwathani, andeeta noogo, nthî ya Isiraeri, na aambira kîrîmaani kîîraaya mûno. Rûteere rwakîo rwa naiti ndoona nyomba ira ciakaraga ta taûni.

Muntû aathimaga kîra gîntû

3 Akûndeeta oogo, i kwarî na muntû, ûra mwonekere wake aayicaga ta rûthuku, arî na mûkumbû wa gatani wa kûthima nau na kamûtî ga kûthima nako njaraani yake, na aarûûngi mwîrîgaani. 4 Muntû ûyu ambîîra, “Mwana wa muntû raitha na ûthikîîrie bwega, na waige mathûgaania maaku kîrî mantû monthe mara nthiîte gûkwonia. N'ûntû nkûreeteete aaga kaingo nkwonia mantû mama. Wîre antû ba Isiraeri mantû monthe mara ûkoona.”

Rûthingo rwathiûrûkîîrîîtie Nyomba ya Ngai

5 Kîra ndoonire i Nyomba ya Ngai, na i kwarî na rûthingo rûmîthiûrûkîîrîîte. Ûraaya bwa kîthimi kîra kîarî njaraani ya muntû ûyû bwarî bwa mita ithatû. Aathima rûthingo na kîthimi kîra kîarî njaraani. Rwarî na ûmatu bwa mita ithatû, na gwîtia îgûrû kwarî mita ithatû.

Mwîrîga wa uumîîro bwa riûa

6 Rîru aathi njîraani ya mwîrîga ûra werekereete bwa uumîîro bwa riûa, eetia na nkinyo, na aathima gîtugî kîa mwîrango kîra kîarî mwîrîgaani, kîarî mita ithatû kûthi nthî. 7 Mberebere yaayo i kwarî na njîra îra yarî na tûnyomba twa akaria, tûthatû wa rûra rûteere rwayo, na wa kara kanyomba kaarî na wariî na ûraaya bwa mita ithatû, na mwanya ûra warî gatîgatî ga tûnyomba tûtu twa akaria, warî mita ciîrî na nucu, na mberebere ya tûnyomba tûtu twa akaria, kwarî na njîra ya ûraaya bwa mita ithatû îra yaathiîte mwîrangooni wa kanyomba ka mwîrîgaani. 8 Rîru aacooka aathima kanyomba gaku ka mwîrîgaani, 9 kaarî na wariî bwa mita inya, na nthingo ciako mita îmwe, na kanyomba ka mwîrîgaani kaarî mûthiani mbarî ya ndeeni. 10 I kwarî na tûnyomba twa akaria tûthatû wa kîra rûteere rwa mwîrîga wa umîîro bwa riûa, na tûrî tûthatû i twaganeene, na nthingo ira ciarî nteere irî ciîrî i ciaganeene. 11 Rîru aathima wariî bwa mwîrîga amwe na mbureemu, nabu bwarî mita ithanthatû na nucu, na wariî bwa mwîrîga uungwa tûtagûtara mbureemu, bwarî mita itaano. 12 I kwarî na karûthingo mbere ya tûnyomba twa akaria, na kaarî na ûmatu bwa centimita mîrongo îtaano, na tûnyomba twa akaria twarî twa mita ithatû mbarî cionthe. 13 Rîru aathima wariî bwa mwîrîga kuuma rûthingooni rwa nyuma ya kanyomba kamwe kûthi rûthingooni rwa nyuma rwa kanyomba kara kangî akeranîîtie njîra îra yakûrûkîîte, wariî bwa mita îkûmi na ciîrî na nucu. 14 Rîru aathima kanyomba ka mwîrîgaani nako kaarî akubî na kîarago. Kaarî na wariî bwa mita îkûmi. 15 Wariî bwa mûthûngîîro kuuma rûthingo rwa ome rwa mwîrîga mwanka mûthiani wa kanyomba ka mûthia mwîrîgaani bwarî mita mîrongo îîrî na itaano. 16 Tûnyomba tunthe itwarî na tûndirica na kinya nthingo cia nja ira ciagaanîîtie tûnyomba ndeeni i ciarî na ndirica. Na i kwarî na maûa ma mîkîndû maarûthîîtwe nthingooni cia ndeeni cia mûthûngîîro ûyu.

Kîarago kîa ome kîa Nyomba ya Ngai

17 Rîru aandeeta kîaragooni kîa ome kîa nyomba ya Ngai. Ndoona tûnyomba mîrongo îthatû tûra twakîîtwe nthingooni ira ciathiûrûûkîîrîîte kîarago gîku, na mbere ya tu i kwarî na njîra yaarûthîîtwe na maiga. 18 Na njîra înu yatambîîte na nteere cia mîîrîga, îganaanîrîîtie na wariî bwa mîîrîga, îno n'yo yarî njîra ya bwa iti. 19 Na aathima wariî bwa kîarago kuuma mwîrîga wa ome mwanka mwîrîga wa ndeeni atarîîte bwa uumîîro bwa riûa, wariî bûbu bwarî mita mîrongo îtaano. Rîru aandeeta bwa neegûrû auga i mma.

Mwîrîga wa bwa neegûrû

20 Rîru aathima mwîrîga wa kîarago kîa ome kîra kîerekereete bwa îgûrû, ûraaya na wariî bwakîo. 21 Tûnyomba tûra tûthatû twa akaria, twarî nteere irî ciîrî cia mwîrîga na nthingo ira ciatugaanîîtie, na kanyomba kara kaarî mwîrîgaani cionthe ciarî cia ithimi bimwe na mwîrîga ûra warî wa mbere. Mwîrîga ûyu warî na ûraaya bwa mita mîrongo îîrî na itaano na wariî bwa mita îkûmi na ciîrî na nucu. Nau warî bwa mbarî ya naiti. 22 Kanyomba ka mûthûngîîro na ndirica ciako, na maûa ma mîkîndû, biakari ta bira bia mûthûngîîro wa bwa naiti. I kwarî na nkinyo mûgwanja ira cietagia mwîrîgaani ûyu. Kanyomba kaayo ka mûthûngîîro keerekeene na kîarago. 23 Kwerekanîra na mwîrîga wa bwa îgûrû, wata ûra wa uumîîro bwa riûa, i kwarî na mwîrîga wa kûthûngîra kîaragooni kîa ndeeni, aathima kuuma mwîrîga ûmwe kûthi ûra ûngî, kwarî mita mîrongo itaano.

Mwîrîga wa bwa naiti

24 Rîru aantongoreeria kwerekera bwa iti, na kinya i kwarî na mwîrîga bwa iti, na aathima nthingo ciayo na kanyomba ka mûthûngîîro, biarî na ithimi bimwe na bia mîîrîga îra îngî. 25 I kwarî na ndirica ndeeni ya tûnyomba tûra twarî mwîrîgaani wa ta cia mîîrîga îra îîngî. Ûraaya bwa yo bwarî bwa mita mîrongo îîrî na itaano na wariî bwarî mita îkûmi na ciîrî na nucu. 26 I kwarî na nkinyo mûgwanja ira ciatûmagîrwa kûmîkinyîîra, kanyomba ka mwîrîgaani kaarî bwa ndeeni. N'yarî na maûa ma mînaathi nthingooni mbarî cionthe. 27 Kinya i kwarî na mwîrîga bwa iti ya kîarago kîa ndeeni, na aathima kuuma mwîrîga ûmwe kûthi ûra ûngî kwerekera bwa iti, kwarî na mita mîrongo îtaano.

Mwîrîga wa bwa naiti wa kîarago kîa ndeeni

28 Rîru andeeta kîaragooni kîa ndeeni gûkûrûkîîra mwîrîga wa bwa iti, na aathima mwîrîga ûyu na warî na ithimi bimwe na îra îîngî. 29 Tûnyomba twa akaria, nthingo ciayo, na kanyomba ka mûthûngîîro biarî bia ithimi bimwe na bia mîîrîga îra îîngî. Na i kwarî na ndirica tûnyomba tûtu na kinya ka mûthûngîîro. Ûraaya bwarî mita mîrongo îîrî na itaano na wariî bwarî mita îkûmi na ciîrî na nucu. 30 (Na i kwarî na tûnyomba twa mûthûngîîro twathiûrûûkîrîîte, twarî na ûraaya bwa mita îkûmi na ciîrî na nucu na wariî bwa mita ciîrî na nucu.) 31 Kanyomba kaayo ka mwîrîgaani keerekereete kîarago kîa nja, na nthingo ciako ciagemeetue na mbica cia mînaathi, na i kwarî na nkinyo inyanya ira ciathiiyaga mûthûngîîrooni wako.

Mwîrîga wa bwa uumîîro bwa riûa wa kîarago kîa ndeeni

32 Rîru aandeeta kîaragooni kîa ndeeni rûteere rwa umîîro bwa riûa, na aathima mwîrîga, na waganeene na mîîrîga îra îîngî. 33 Tûnyomba twa akaria, nthingo ciayo, na kanyomba ka mûthûngîîro biarî bia ithimi bimwe na bia mîîrîga îra îngî. Na i kwarî na ndirica tûnyomba tûtu na kinya ka mûthûngîîro. Ûraaya bwarî mita mîrongo îîrî na itaano na wariî bwarî mita îkûmi na ciîrî na nucu. 34 Kanyomba kaayo ka mwîrîgaani keerekereete kîarago kîa nja, na nthingo ciako i ciagemeetue na mbica cia mînaathi wa kîra rûteere, na njîra ya gûkinya oogo yarî na nkinyo inyanya.

Mwîrîga wa bwa neegûrû wa kîarago kîa ndeeni

35 Rîru andeeta kîrî mwîrîga wa bwa neegûrû wa kîarago kîa ndeeni na acuthima, warî na ithimi wa ta bia mîîrîga îra îîngî. 36 Tûnyomba twayo twa akaria, nthingo, na kanyomba ka mwîrîgaani biaganeene na bira biingî, na i biarî na ndirica kûthiûrûkîîria. Ûraaya bwarî mita mîrongo îîrî na itaano, na wariî bwa mita îkûmi na ciîrî na nucu. 37 Kanyomba kaayo ka mwîrîgaani keerekerete kîarago kîa nja, na nthingo ciayo ciagemeetue na mbica cia mînaathi nteere cionthe na njîra ya kûthi oogo yarî na nkinyo inyanya.

Bantû a kûthuuranîra igongwana

38 I kwarî na kanyomba karî na mûrango ndeeni ya kanyomba ka mwîrîgaani, ara kîgongwana gîa kûbîîthua kîathambagîrua. 39 Na ndeeni ya kanyomba ka mwîrîgaani i kwarî na meetha ciîrî mbarî cionthe, ara kîgongwana gîa kûbîîthua, kîgongwana n'ûntû bwa meeyia, na kîgongwana n'ûntû bwa îbîtia biarî bithînjîrwe. 40 Na nja ya kanyomba ka mwîrîgaani kara kaarî mûthûngîîrooni wa mwîrîga wa bwa neegûrû i kwarî na meetha ciîrî, na rûteere rûra rûngî rwa kanyomba ka mwîrîgaani i kwarî na meetha ciîrî. 41 Ndeeni i kwarî na meetha inya, na meetha ciingî inya ciarî nja ya nteere cia mîîrîga, cionthe ciarî meetha inyaanya, ara igongwana biarî bithînjîrwe. 42 I kwarî na meetha inya ciarûthîîtwe na maiga maacae cia kîgongwana gîa kûbîîthua. Ciarî na wariî na ûraaya bûganeene bwa centimita mîrongo mûgwanja na itaano, na centimita mîrongo îtaano wîtia. Îgûrû rîacio noogo into bia kûthînja igongwana bia kûbîîthua na igongwana bia mîthemba îra îngî biatûûgagîîrua.

Kîaragooni

43 I kwarî na tûpogoro, twa ûraaya bwa centimita mûgwanja na nucu, twarûmîîrîîtue kûthiûrûûka rûthingo ndeeni. Na meethaani inu noo nyama cia igongwana ciagaigagîîrwa.

Nyomba ya athînjîri ba Ngai

44 Na mwîrîgaani wa ndeeni, i kwarî na tûnyomba twîrî, kamwe rûteere rwa mwîrîga wa bwa neegûrû keerekereete bwa iti, na kara kangî rûteere rwa mwîrîga wa bwa naiti keerekereete bwa neegûrû. 45 Muntû ûra antongorereetie ambîîra, “Kanyomba gaka keerekereete bwa iti i ka athînjîri bara batûmîkaga Nyomba ya Ngai. 46 Kanyomba kara keerekereete bwa neegûrû i ka athînjîri bara batûmîkaga kîthînjîrooni, baba nabo n'aana ba Sandoki, bara bonka kuuma rûrîîyooni rwa Rawi bara beetîgîîrîîtue kûthengeera akubî na Mwathani kûmûtûmîkîra.”

Ithimi bia kîarago kîa ndeeni

47 Aathima kîarago, na kîarî mita mîrongo îtaano mbarî cionthe. Na kîthînjîro kîarî mbere ya Nyomba ya Mwathani.

Rûthingo rwa Nyomba ya Ngai yonthe

48 Rîru andeeta kanyomba ka mûthûngîîro wa Nyomba ya Ngai na acuthima. Mûthûngîîro warî na wariî bwa mita mûgwanja na mita ciîrî na nucu wîtia. Mbureemu cia mûthûngîîro ciarî na ûmatu bwa mita îmwe na nucu. 49 Kanyomba ka mwîrîgaani kaarî na ûraaya bwa mita îkûmi, na wariî bwa mita ithanthatû. I kwarî na nkinyo cia kûthi oogo, na i kwarî na itugî biîrî wa kîmwe rûteere rûmwe.