Kûthirua kwa njûûrî ya Gogu
39
1 “Naawe, mwana wa muntû, roreria Gogu, na guuge, ‘Ûûgû i bu Mwathani Ngai akuuga: Ndî na ûthû naawe, Îî Gogu, mûtongoria mûnene wa Meseki na Tubari! 2 Ngakûgarûra na ngûkururie. Nkûrute kuuma rûteere rwa neegûrû buru na nkwire bwa irîma bia Isiraeri. 3 Nkaaringa ûta buume njaraani yaku ya kîmotho, na ntûme mîgwî yuuma njaraani yaku ya ûrîo. 4 Ûkaagwa irîmaani bia Isiraeri, woû na njûûrî na mîgongo îra îrî amwe naawe. Ngakûnenkanîra kîrî nyoni cia mîthemba yonthe ndîi nyama na nyamû cia kîthaka ibûrîe. 5 Ûkaagwa kîthakaani, n'ûntû nkwaria. I bu Mwathani Mwene Inya akuuga. 6 Ngaatûma mwanki kîrî nthîgûrû ya Magogu na antû bara batwîre mayîîga nthî cia îkumbo, na bakaamenya atî i niû Mwathani.7 “ ‘Ngaatûma riîtwa rîakwa rîîtheru rîmenyeka antûûni baakwa Isiraeri, na ntiîtîgîîria riîtwa rîakwa rîîtheru rîthûûkua kaîrî na nthîgûrû ikaamenya atî i niû Mwathani, Ûra Mûtheru ndeeni ya Isiraeri. 8 Nîîyîîte! Ûmma îkaaya! I bu Mwathani Mwene Inya akuuga, îno n'yo ntugû îra mbarîîtie mantû maayo.
9 “ ‘Rîru bara batwîre taûni cia Isiraeri bakaumagara babue mîanki n'ûntû bwa kûbîîthia mathaga ma ndûa, rong'o i niini na inene, nta na mîgwî, mîîthîrî na matumo, na bakaabua mîanki yaayo bantû a mîanka mûgwanja. 10 Batiibatara i kuuna nkû kîeniini kana batema nwa mûtî mîthitûûni, n'ûntû bakaabuaga mîanki ya mathaga ma ndûa, bakaathara into bia bara baabatharire, na bataîre bara baabataîrîîre, i bu Mwathani Ngai akuuga.
Mathiko ma Gogu
11 “ ‘Ntugû înu nkaanenkera Gogu bantû a kûthikwa Isiraeri, kîguuruuni kîa Athii rûgendo mbarî ya uumîîro bwa riûa bwa îria. Nthiko înu îkainga njîra ya agendi, n'ûntû agu noo Gogu na mûkwîrî unthe wa antû baake bakaathikwa. Gîgeetagwa kîguuru kîa Amoni-Gogu. 12 Nyomba ya Isiraeri îkaathûkia mîeri mûgwanja kûbathika, kaingo batheria nthîgûrû. 13 Antû bonthe ba nthîgûrû bakabathika, bûbu bûkabareetera gîtîîyo ntugû îra nkoonania ûkumio bwakwa, i bu Mwathani Mwene Inya akuuga. 14 Bakaathuura antû ba mwanya ba kûriûnga gûntû kunthe rîonthe bakîthikaga anthû bara bakeegua batigeere ku, kaingo batheria nthî. Bakaarûtha ûûgû bantû a mîeri mûgwanja. 15 Wa aceria babu bakûrûkîîrîîte nthîgûrû, ûra akoona kîîndî kîa muntû oonanie na rwano agu rûteere rwakîo, mwanka athiki baaye bakîthike kîguuruuni kîa Amoni-Gogu.a 16 Taûni îgwîtwa Amona îgaakwa oogo. Ûgu i bu bakaatheria nthîgûrû.’ 17 Îîndî woû mwana wa muntû, Mwathani Ngai ariuga, Aria na nyoni, ndîi cia nyama cia mîthemba yonthe na kîrî nyamû cia kîthaka, ‘Îthîranaani bûûye, rîîkanaani kuuma nteere cionthe bûûye kîathooni gîa kîgongwana kîra nkûbûthuuranîra, kîatho kîînene gîa kîgongwana irîmaani bia Isiraeri, na bûkaarîa nyama na bûnyue nthakame. 18 Bûkaarîa nyama cia antû barî inya, na bûnyue nthakame ya anene ba nthî taka îrî ya, ng'ondu, ya ntûrûme, ya mbûri, ncamba cionthe iinoru cia kuuma Mbasani. 19 Bûkaarîa maguta mwanka bûganie, na bûnyue nthakame mwanka bûtogoone, kîathooni gîa kîgongwana kîra nkûbûthondekera. 20 Na bûkaabaa bûrî meethaani yakwa kuumania na mbaraathi na athiithia ba nkaarî cia ndûa, arûi na mîthemba yonthe ya acikaarî,’ i bu Mwathani Mwene Inya akuuga.
Isiraeri îgaacookanîîrua nthîgûrû yao
21 “Nkoonania ûkumio bwakwa gatîgatî ka mîgongo yonthe, na mîgongo yonthe îkoona îkaanûkia na inya yakwa îra ndaatûmîîre kûrûtha ûgu. 22 Antû ba Isiraeri bakaamenya atî ndî Mwathani Ngai wao, kuuma ntugû înu kûthi mbere. 23 Na mîgongo îkaamenya atî antû ba Isiraeri baatairwe n'ûntû bwa meeyia maao, n'ûntû bataarî eetîgua. Kwoogu, ndaitha ûthiû bwakwa kuuma kîrî bo na ndabaneekanîra njaraani cia anthû baao, na bonthe baûragwa na rûûyiû. 24 Ndaabaturire kûringana na mûgiro na mabîtia maao, na ndaitha ûthiû bwakwa kuuma kîrî bo.
25 “Kwoogu, ûûgû i bu Mwathani Mwene Inya akuuga. Îîndî ngaacookanîria mîkarîre ya Njakubu, na mbîgîîrue kîao nyomba yonthe ya Isiraeri, naani nkaatheteera riîtwa rîakwa rîîtheru. 26 Bakaariganîrua n'îgi rîao, na kûrega wîtîgîka kwao kîrî n'yû rîra bagaatûûra mayîîga gûtarî na muntû wa kûbaguayia. 27 Rîra ndabaruta na ndabacookia kuuma mîgongooni ya antû na mbeethîranie kuuma nthî cia anthû baao, na gûkûrûkîîra bo i mbonanîîtie ûtheru bwakwa meethooni ma nthî inyiingî. 28 Rîru bakaamenya atî i niû Mwathani Ngai wao n'ûntû i ndaabairire ûkombooni nthî ciingî, ndacooka ndabeethîrania nthî yao kaîrî. Ntiitiga nwa ûmwe wao nyuma, 29 na ntiitha ûthiû bwakwa kuuma kîrî bo kaîrî, rîra ngeetûûra kîrundu wakwa îgûrû rîa antû ba Isiraeri, i bu Mwathani Mwene Inya akuuga.”