Ûroria îgûrû rîa Gogu
38
1 Mwathani aaria naani ambîîra, 2 “Mwana wa muntû, raitha Gogu, wa nthîgûrû ya Magogu, mûnene ûra aathaga nthîgûrû ya Meseki na Tubari na ûmûrorerie 3 ûmwîîre, ‘Ûûgû i bu Mwathani Mwene Inya akuuga. Ndî na ûthû naawe woû Gogu, mûnene wa Meseki na Tubari. 4 Ngakûthiûrûûkia na ngwîkîre ndwano ntheani ciaku na nkûrute ome na njûûrî yaku yonthe, ûgu i ta kuuga mbaraathi ciaku, athiithia ba mbaraathi, beebogeete mathaga monthe ma ndûa na gîkundi kîînene gîa antû, barî na rong'o iinene na i niini, bonthe bakîmenamenagia ndûûyiû ciao. 5 Pasia, Kusi na Puti bonthe barî na rong'o na nkoobia bakeeringanîra amwe naawe, amwe na mathaga maao ma ndûa. 6 Wana Ngomeri na njûûrî yayo, Bethi-Togarima kuuma bwa mbarî ya neegûrû buru na njûûrî yayo yonthe, mîgongo îmiingî ûkeegua îrî amwe naawe.7 “ ‘Îîthuuranîre woû na njûûrî yaku yonthe, na ûtuîke mwathi wao. 8 Nyuma ya ntugû inyiingî, ûgeetwa wîthuuranîra n'ûntû bwa ndûa. Ntugû ciiyîîte bûkaithûkîra nthîgûrû îra îîcookanîîrîîtie kuuma ndûani, îra antû baayo beethîraniirue kuuma mîgongo îmiingî mwanka irîmaani bia Isiraeri, bira gwa kagiita kaaraaya biarî maganjo. Barutîîtwe kuuma kîrî mîgongo înu, na îndî bonthe batûûraga barî mayîîga. 9 Woû na njûûrî yaku na mîgongo înu miingî ûrî n'yo yonthe ûgeetia, ûthiîte mbere ta kîbuubani. Ûkeegua bûkari ta îtu rîkunîkîrîîte nthîgûrû.
10 “ ‘Ûûgû i bu Mwathani Mwene Inya akuuga, ntugû înu mathûgaania magakûûyîîra na ûkaabanga mûbango ûmûthûûku. 11 Ûkauga, “Nkaithûkîra nthîgûrû ya taûni itarî mbirigîre, mbuumbuthûre antû batwîre na ûkiri barî mayîîga, bonthe batwîre taûni itarî mbirigîre, na batarî na mîrîîgo kana mîrango.” 12 Nkaathi noogo ntae, ntuunyane na mbithûkîre antû bara baacookire gûtûûra taûni ira ciarî imboomokaangu. I beethîranîîtue kuuma mîgongo mwanya mwanya na îndî barî na nyamû cia ndîîthia na into biingî, bagîtûûraga gatîgatî ka nthîgûrû. 13 Antû na Seba na Ndendani na abiacaara ba Tarisisi na ntûûra ciayoa cionthe bagakûûria, “Ûûyîîte gûtaa? Wîthîranîîtie njûûrî yaku iithûka, îkamata thaabu na fetha, na îthûkia nyamû cia ndîîthia na into na gûtaa into biingî nkûrûki?” ’
14 “Kwoogu, Mwana wa muntû, roria na wîre Gogu, ‘Ûûgû i bu Mwathani Mwene Inya akuuga: Ntugû înu, rîra antû baakwa ba Isiraeri bakeegua barî mayîîga, ûtiimenya mantû mama? 15 Ûkauma gwaku kûûraaya bwa neegûrû, woû amwe na mîgongo îmiingî, bwinthe bûthithîîtie mbaraathi, njûûrî înene na îrî na inya. 16 Naawe ûkaithûkîra antû ba Isiraeri ta îtu rîra rîkunîkagîra nthîgûrû. Kagiita gaku gaakinya woû Gogu, ngaatûma withûkîre nthîgûrû yakwa, kaingo mîgongo yonthe îmenya rîra nkoonania ûtheru bwakwa gûkûrûkîîra woû meethooni maao.
17 “ ‘Ûûgû i bu Mwathani Mwene Inya akuuga. Ti woû ndaaragîîria kagiita kaaraaya gakûrûku gûkûrûkîîra aruti ngûgî baakwa iroria ba Isiraeri? Kagiita gaku baaroriirie gwa kagiita kaaraaya atî ngakûreeta kaingo withûkîra antû ba Isiraeri. 18 Ûûgû i bu gûgaakarîka ntugû înu Gogu aithûkîra antû ba Isiraeri, mûthûûro wakwa ûkaumbuthûrwa, i bu Mwathani Mwene Inya akuuga. 19 N'ûntû bwa wîîru na rûriitho rwakwa, ntugû înu gûkeethîrwa kûrî na kwinaina kûûnene kwa nthîgûrû ya Isiraeri. 20 Makûyû ma îria, nyoni cia îgûrû, nyamû cia kîthaka, nyamû cionthe ira ciîkururagia, amwe na antû bonthe ba nthîgûrû, bakainaina mbere yakwa. Irîma bigaakuûranua, mpara ikoomokaanga na nthingo cionthe igwe nthî. 21 Ngaatûma antû ba Gogu barwîra îgûrû rîa irîma biakwa bionthe, i bu Mwathani Mwene Inya akuuga. Woora ûmwe akaagarûkîra ûra ûngî waciao na rûûyiû rwake. 22 Ngaakaanûkia Gogu na mûrimo na mbûragano, nkaurithia mbura înyiingî, mbura ya maiga, mwanki na ya ûbiriti îgûrû rîake na kîrî njûûrî yake na mîgongo îmiingî îra îrî amwe n'we. 23 Na kwoogu nkoonania ûnene bwakwa na ûtheru bwakwa na ntûme mmenyekane mbere ya mîgongo îmiingî. Rîru i rîo bakaamenya i niû Mwathani.’