Kîbonde kîa mîîndî îmîûmo
37
1 Inya ya Mwathani n'yarî îgûrû rîakwa, ndaakamatwa i Kîrundu wa Mwathani aankinyûkia kîbondeeni kîaûyûrîîte mîîndî. 2 Aantongoreria aandiûngia akubî n'yo na ndamîthiûrûûka ndoona mîîndî îmiingî na îmîûmo kîbondeeni gîku. 3 Ambûûria, “Mwana wa muntû, mîîndî îno nwa îtûûre mwoyo?”Ndauga, “Woû Mwathani Mwene Inya gwenka i woû wiyî.”
4 Rîru ambîîra, “Roreria mîîndî îno na ûmîîre, ‘Biû mîîndî îmîûmo îguani mûgambo wa Mwathani!’ 5 Ûûgû i bu Mwathani Mwene Inya akwîîra mîîndî îno, nkabûbuîrîîra na ntûme ûtûûre kaîrî. 6 Nkabwîkîra nyama na mîkiia na mbûkunîkîre na nkoonde, nkabwîkîra mîruke na bûgaacooka gûtûûra. Rîru bûkaamenya i niû Mwathani.”
7 Kwoogu, ndaaroria wa ta bûra ndaathîîtwe. Na nkîroragia i kwarî na gîtuma ta into biaringanangaga na mwîndî wacooka mwîndîîni ûra waumîîte. 8 Wa ndaithîîte, mîîndî înu yakunîkîrwa i mîkiia, nyama na gîkonde îndî îtaarî na mîruke.
9 Rîru ambîîra, “Roreria ruuo, mwana wa muntû, roriaa ûmîîre, ûûgû i bu Mwathani Mwene Inya akuuga. Ncû kuuma nteere cionthe cia nthîgûrû, woû ruuo, na ûbuîrîîre biimba bibi kaingo bitûûra mwoyo.” 10 Kwoogu, ndaaroria wa ta bûra aambathîîte na mîruke yabathûûngîra, baagîa mwoyo na barûngama na magûrû maao. Yaarî njûûrî înene mûno.
11 Rîru ambîîra, “Mwana wa muntû, mîîndî îno n'antû bonthe ba Isiraeri yonthe. Baugaga, ‘Mîîndî yetû n'îmîûmo na wîrîgîîro bwetû i bûthiru, tûrî baathiru.’ 12 Kwoogu, barorerie ûbeere, ûûgû i bu Mwathani Mwene Inya akuuga. Biû antû baakwa i nthiîte gûkunûra nthiko cienu na mbûrute ku, mbûcookie nthîgûrû ya Isiraeri. 13 Rîru biû antû baakwa bûkamenya i niû Mwathani, rîra nkaarugûra nthiko cienu na mbûrute ku. 14 Ngeekîra kîrundu wakwa kîrî biû na bûgatûûra mwoyo na ûcooke mûciî nthîgûrû yenu. Rîru bûkamenya i niû Mwathani. Bûkoona ndûthîîte mantû monthe wa ta bûra ndeeranire. I niû Mwathani nkwaaria.”
Njunda na Isiraeri îgaatuîka ûnene bûmwe
15 Mwathani aaria naani ambîîra, 16 “Mwana wa muntû, thûkia kamûtî na ûkaandîke, ‘Gaka i ka Njunda na Aisiraeri bara bagwetanagîrua n'we.’ Ûcooke ûthûkie kamûtî kaangî ûkaandîke, ‘Ka Njosebu, kamûtî ka Eburaimu na antû ba Isiraeri bonthe bara bagwetanagîrua n'we.’ 17 Ringanîra tûrî twîrî kaingo tûtuîke kamûtî kamwe njaraani ciaku.
18 “Antû ba nthî yeenu bakûûria, ‘Ûtitwîra bûra mantû mamu makuuga?’ 19 beere, ûûgû i bu Mwathani Mwene Inya akuuga, nkaathûkia kamûtî ka Njosebu kara karî njaraani cia Eburaimub na ka mîîrîga ya Isiraeri îra îgwetanagîrua nwe nkagwatithanie na kamûtî ka Njunda ntutuîkithie kamûtî kamwe natu tûgaatuîka kamûtî kamwe njaraani yakwa. 20 Rîru ûgwatîîre tûmîtî tûtu twîrî wandîkîîte na ûreke antû batuone. 21 Rîru ûbeere, Mwathani Mwene Inya ariuga, nkaaruta antû ba Isiraeri kuuma kîrî mîgongo îra baathiire. Mbeethîranie kuuma gûntû kunthe mbacookie nthîgûrû yao yongwa. 22 Nkabatuîkithia mûgongo ûmwe nthîgûrû înu, irîmaani bia Isiraeri. Gûkeethîrwa kûrî na mûnene ûmwe wao bonthe na batiîthîrwa barî mîgongo îîrî kaîrî kana bagaûkana batuîka moonene maîrî kaîrî. 23 Batiîgwatithia mûgiro kaîrî na ngai ciao cia ûrongo na mîbuanaano îrî njici kana meeyia mangî, n'ûntû nkaboonokia kuuma meeyiani maao mara mabacookagia nyuma. Bagaatuîka antû baakwa, naani ntuîke Ngai wao.
24 “Mûruti ngûgî wakwa Ndaundi agaatuîka mûnene wao, na bonthe bakeegua barî na mûrîîthi ûmwe. Bakaathingata mawatho maakwa na baige maathana maakwa. 25 Bagaatûûra nthîgûrû îra ndaaneenkeere mûruti ngûgî wakwa Njakubu, nthîgûrû îra ba abaagu baatûûraga. Bo na aana baao na aana ba aana baao bagaatûûra noogo tene na tene, na mûruti ngûgî wakwa Ndaundi agaatuîka mûnene wao tene na tene. 26 Naani nkaarûtha kîrîîkanîro gîa ûkiri nabo, gîkeethîrwa kîrî kîrîîkanîro gîa tene na tene. Nkabanenkera nthîgûrû yao na mbathagayie, na mbaige bantû aakwa atheru gatîgatîîni kaao tene na tene. 27 Ngaatûûra noogo nabo. Nkeegua ndî Ngai wao, nabo beegue barî antû baakwa. 28 Rîru mîgongo yonthe îkaamenya atî, niû Mwathani, i niû ntûmaga antû ba Isiraeri batuîka baatheru, rîra bantû akwa ara atheru agaatûûra kîrî bo tene na tene.”