Ûroria îgûrû rîa irîma bia Isiraeri
36
1 “Woû mwana wa muntû, roreria irîma bîa Isiraeri na uuge, ‘Biû irîma bia Isiraeri, îguani mûgambo wa Mwathani, 2 ûûgû i bu Mwathani Mwene Inya akuuga: Mûnthû augire îgûrû rîaku, “Guri, guri! Gûntû kûra gûûkîîru wa tene gûtuîkîîte wetû.” ’ 3 Kwoogu, mwana wa muntû, nenkera irîma bîa Isiraeri ntûmwa îno kuuma kîrî Mwathani Mwene Inya. ‘Anthû baaku i baakwithûkîîre na bakûthoontoria kuuma mbarî cionthe, na îîndî mîgongo înu îîngî yegwatîra biû. Bûtuîkîîte antû ba kûthekeerwa na gûtuîrîîrwa. 4 Kwoogu, biû irîma bia Isiraeri, îguani mûgambo wa Mwathani Mwene Inya. Ûûgû i bu Mwathani Mwene Inya akwîra irîma na tûrîma, iguuru na iboonde, maganjo na taûni ira ciathaamirwe ciataîgwa into na ciathekeerwa i mîgongo îra îîngî îkûthiûrûkîrîîte. 5 Ûûgû i bu Mwathani Mwene Inya akuuga, i mbarîîtie îgûrû rîa mîgongo îno na mûno mûno Endomu yonthe ndî na wîîru bûgwankana ta mwanki n'ûntû i boonaniirie kînyararo na ûgîti nkorooni ciao rîra baathûkiirie nthîgûrû yakwa bamîtuîkithia yao kaingo bataa ndîîthia ciayo. 6 Kwoogu, roria îgûrû rîa nthîgûrû ya Isiraeri na wîre irîma na tûrîma, iguuru na iboonde, ûûgû i bu Mwathani Mwene Inya akuuga. Ndîaria na wîîru na mûthûûro n'ûntû i bûthekeereetwe i mîgongo. 7 Kwoogu, ûûgû i bu Mwathani Mwene Inya akuuga. Nkûthiîtia mbûkîîrîîtie njara atî mîgongo yonthe îra îkûthiûrûkîrîîte wa n'yo îkaathekeerwa.8 “ ‘Îndî biû irîma bia Isiraeri, mîtî yaku îkaagîa na mpoong'i na îciare matunda ma antû baakwa Isiraeri, n'ûntû gwa kagiita gatarî karaaya bakaaya mûciî. 9 Ndî na bata naawe na nkaaya gûgûteethia. Nthîgûrû yaku îkaarîmwa na yaandwe. 10 Nkaathagayia antû bonthe, antû ba Isiraeri yonthe. Taûni ciaku igaatûûrwa kaîrî na ira ciomorangirwe ciakwe kaîrî. 11 Nkaathagayia antû na nyamû ira irî nthîgûrû yaku. Igaaciarana na ciongeereke, îndî wana nyamû ciaku ikaathagaya. Woû irîma bia Isiraeri, nkaareeta antû batûûre kîrî biû kaîrî. Ngaatûma bûkara bwega nkûrûki ya mbereeni. Rîru bûkaamenya i niû Mwathani. 12 Ngaatûma antû baakwa Isiraeri bathiîra îgûrû rîenu. Bakeegwatîra biû na bûgaatuîka baao, na aana baao batiikwîra n'yûra îgûrû rîaku kaîrî.
13 “ ‘Ûûgû i bu Mwathani Mwene Inya akuuga, n'ûntû antû bakwîraga, “I bûkûrîa antû na gûtuunya mûgongo wenu aana.” 14 Kwoogu, bûtiirîa antû kana bûtuunya mûgongo aana kaîrî, i bu Mwathani Mwene Inya akuuga. 15 Ntiireka wîgua irumi bia mîgongo kaîrî na ûtiinyamaarua i kînyararo gîa antû kaîrî. Na aana baao batiikuîra n'yûra îgûrû rîaku.a I bu Mwathani Mwene Inya akuuga.’ ”
16 Mwathani ambîîra, 17 “Mwana wa muntû, rîra antû ba Isiraeri baatûûraga nthîgûrû yao, ibaamîakire mûgiro na mîkarîre na ngûgî ciao. Mîkarîre yao yakari ta kwaga ûtheru kwa mwekûrû kagiita ka nyambura ciake. 18 Kwoogu, ndaabetûûrîîre mûthûûro wakwa n'ûntû ibeetûûrîîte nthakame nthîgûrû na n'ûntû i baarî bakûmîgwatithia mûgiro na mîbuanaano yao. 19 Ndaabanyagaariirie kîrî mîgongo ndabakaanûkia kûringana na mîkarîre na mîrûthîre yao. 20 Na kûra kunthe baathiiyaga kîrî mîgongo i beekagîra riîtwa rîakwa rîîtheru îgi, n'ûntû antû baugaga ibeerîîtwe, ‘Baba n'antû ba Mwathani, na atikîbaiga barî mayîîga nthîgûrû yao!’ 21 I ndaarî bata na riîtwa rîtheru rîra antû ba Isiraeri baakire rûko kîrî mîgongo îra baathiyaga.
22 “Kwoogu, îra antû ba Isiraeri, ‘Ûûgû i bu Mwathani Mwene Inya akuuga. T'ûntû bwenu biû antû ba Isiraeri nthiîte kûrûtha ûûgû, îndî nthiîte kûrûtha mantû mama n'ûntû bwa riîtwa rîakwa rîîtheru rîra bwakîîte rûko kîrî mîgongo yonthe îra bwathiire. 23 Nkoonania ûtheru bwa kwonania riîtwa rîakwa rîînene rîra bwakire rûko kîrî mîgongo, rîru mîgongo îkaamenya niû ndî Mwathani, i bu Mwathani Mwene Inya akuuga. Nkabûtûmîra kwonia mîgongo ndî ûmûtheru.
24 “ ‘N'ûntû nkabûcookanîria kuuma kîrî mîgongo yonthe na mbûreete nthîgûrû yenu. 25 Ngakûmincamincîria rûûyî rûûtheru, naawe ûkaathera, ngakûtheria kuuma kîrî rûko rwaku na mîbuanaano yaku. 26 Ngakûnenkera nkoro yaimbia na mbîkîre kîrundu waimbia ndeeni yaku, ngakûruta nkoro îmbûmo ta iiga na nkûnenkere nkoro îmbinyu ta nyama. 27 Ngeekîra Kîrundu wakwa ndeeni yenu, na ntûme bûthiingatage maathana na mawatho maakwa. 28 Bûgaatûûraga nthîgûrû îra ndaanenkeere biûyûûyû bienu, bûgaatuîka antû baakwa naani ntuîke Ngai wenu. 29 Nkabwonokia kuuma Migironi yenu yonthe. Ngaatûma mînda yenu îgîa irio na mbiingîyie na ntibûretera yûûra. 30 Nkabûnenkera maciaro maingî kuuma mîtîîni ya matunda na mîndaani, kaingo bûtarumangwa i mîgongo kaîrî n'ûntû bwa yûûra. 31 Rîru bûkaaririkana njîra cienu inthûûku na mîkarîre yenu îtarî mîega, na bwîmene bwingwa n'ûntû bwa meeyia meenu na mîtugo yenu îrî njici. 32 Ndîenda bûmenya ntikûrûtha mantû mama n'ûntû bwenu, i bu Mwathani Mwene Inya akuuga. Conokaani na bwîgue nthoni n'ûntû bwa mîtugo yenu, biû antû ba Isiraeri.
33 “ ‘Ûûgû i bu Mwathani Mwene Inya akuuga, ntugû îra nkaabûtheria kuuma meeyiani meenu, nkaareeta antû batûûre taûni cienu kaîrî, na naara kwombokanire gûgaakwa kaîrî. 34 Nthîgûrû îra yarî îganjo îkaarîmwa na bara bagaakûrûkîîra ku bationa îrî îganjo kaîrî. 35 Bakauga, “Nthîgûrû îno yarî îganjo îîndî îtuîkîîte ta mûnda wa Endeni. Taûni ira ciomokangîîte na ciarî maganjo îîndî irî na nthingo i nkamu na i ciûyûrîîte antû.” 36 Rîru mîgongo yonthe îra îkeegua îtigeere îkûthiûrûkîrîîte îkaamenya niû Mwathani i niû ndaakire taûni ira ciomorangîîtwe na ndaanda maganjooni. I niû Mwathani nkwaria, na nkarûtha ûgu.’