Ûroria îgûrû rîa Endomu
35
1 Mwathani aaria naani ambîîra, 2 “Mwana wa muntû, raitha mbarî ya kîrîma kîa Seiri, ûkîîre, 3 ‘Ûûgû i bu Mwathani Mwene Inya akuuga: Ndî na ûthû naawe kîrîma gîa Seiri, na ngaataambûrûkia njara yakwa îgûrû rîaku na ngûtuîkithie îganjo. 4 Nkeenyangia taûni ciaku naawe ûgaatuîka îganjo. Rîru i rîo ûkaamenya i niû Mwathani.5 “ ‘Ûthû bwaku bûûkûrû na antû ba Isiraeri i bwatûmire ûbanenkanîra baûragwa na rûûyiû kagiitaani ga îkaanûkia rîao rîa mûthia. 6 Mwathani Mwene Inya ariuga, wa ta bûra ntûûraga mwoyo, gîkuû i gîgweteereete, na ûtiûmba gûgîkuthûka. Ûrî na mabîtia ma kûûragana, na kwoogu, gîkuû igîkûthingatîîte. 7 Ngaatuîkithia kîrîma gîa Seiri îganjo na ûra agaakûrûkîîra ku mmûûrage. 8 Nkaûyûria irîma biaku na ntungu, bara baûragîîtwe na rûûyiû bakaagwa irîmaani biaku na ibondeeni biaku na miurooni. 9 Ngagûtuîkitha îganjo tene na tene, na taûni ciaku itiitûûrwa kaîrî. Rîru i rîo ûkaamenya i niû Mwathani.
10 “ ‘N'ûntû uugîîte: “Nthîgûrû ya Isiraeri na ya Njunda igaatuîka ciakwa na rûgai rwaku” wana wegua niû Mwathani i ndaarî oogo. 11 Kwoogu, wa ta bûra ntûûraga mwoyo, i bu Mwathani Mwene Inya akuuga, ngagûkaanûkia kûringana na mûthûûro na rûmena rûra woonaniirie ûthûûni bwaku kîrî bo. Ngîgûkaanûkia ûkaamenya niû ndî ûû. 12 Rîru ûkaamenya niû Mwathani i mbîgîîtue irumi bionthe bira waugire îgûrû rîa irîma bia Isiraeri. Waugire, “I bituîkithîîtue maganjo na twanenkerwa bio tûbitembûranga.” 13 Wenkumîîrie na wambaria naaî ûtakwîgwata naani ndeegua mamu monthe. Ûkiuga ûgu, i ka wenkumagîria, na i mbîgîîtue mamu monthe. 14 Ûûgû i bu Mwathani Mwene Inya akuuga: Nthîgûrû yonthe îgaakena ndagûtuîkithia îganjo. 15 N'ûntû n'wakeneere rîra nthîgûrû ya antû ba Isiraeri îra ndaabanenkeere rûrî rûgai yaatuîkire îganjo, woogu i bu kinya woû ngaakûrûtha. Ûgaatuîka îganjo woû Kîrîma gîa Seiri, na Endomu yonthe. Rîru bakaamenya i niû Mwathani.’ ”