Arîîthi
34
1 Mwathani aaria naani ambîîra, 2 “Mwana wa muntû roria îgûrû rîa arîîthi ba Isiraeri, roria na ûbeere, ‘Ûûgû i bu Mwathani Mwene Inya akuuga: Bûkoona thîîna, biû arîîthi ba Isiraeri bûkwîmenyeera bwingwa! Anga arîîthi tika bamenyagîîra Ng'ondu? 3 Bûnyuunyaga îria, bûgeekîra nguo cia guaya na bûkathîînja nyamû ira noru, îndî bûtimenyagîîra ndîîthia. 4 Bûteekîra inya bara batarî na inya kana bworia bara baayie, kana bwoga maringangîrwa ma bara batoonyangîîtwe. Bûtaacookia bara baumîîte njîraani kana bûceria bara baûrîîte. Îndî bûbaathîîte na inya na kûbainyîîria. 5 Kwoogu ng'ondu cianyagaarua n'ûntû bwa kwaga mûrîîthi, na ikûnyagaarua ciatuîka irio bia nyamû cionthe cia kîthaka. 6 Ng'ondu ciakwa ciariûngaga irîmaani bionthe na tûrîmaani tunthe tûûraaya. Cianyagariirue nthîgûrû yonthe na gûtirî we aathi gûcicûa.7 “ ‘Kwoogu, biû arîîthi, îguani mûgambo wa Mwathani. 8 Wa ta bûra ntûûraga mwoyo, i bu Mwathani Mwene Inya akuuga, i bûtiganîrîîtie ng'ondu ciakwa na bwatûma irîîgwa i nyamû cia kîthaka. Bwarî arîîthi baakwa îndî bûtaaceria ng'ondu ciakwa rîra ciaûrîîte. Bwemenyeere bwingwa na bwatiganîria ng'ondu ciakwa irî na yûûra. 9 Kwoogu biû arîîthi, îguani mûgambo wa Mwathani, 10 ûûgû i bu Mwathani Mwene Inya akuuga, inthûûri n'ûntû bwa arîîthi na nkabarandûka ng'ondu ciakwa. Nkaarutaruta arîîthi ûrîîthiini bwa ng'ondu ciakwa, na batiûmba kwîrera kaîrî. Nkoonokia ng'ondu ciakwa kuuma tûnyuani twao, kaingo itakîîgua irî irio biao kaîrî.
11 “ ‘N'ûntû ûûgû i bu Mwathani Mwene Inya akuuga: Niû ningwa ngaaceria ng'ondu ciakwa na ncimenyeere. 12 Wa ta bûra mûrîîthi amenyagîîra ng'ondu ciake inyagaarîîte, nwa ta bu nkaamenyeera ng'ondu ciakwa. Ngacionokia kuuma mbarî cionthe naara cianyagaarîîtue ntugû ya matu na mwindu. 13 Ngaciruta kîrî mîgongo na nciîthîranie kuuma nthîgûrû mwanya mwanya, na ncireete nthîgûrû yacio yongwa. Ngacirîîthia irîmaani bia nthîgûrû ya Isiraeri, tuurooni na gûntû kunthe kûra gûtûûragwa nthîgûrû. 14 Ngacirîîthia ndîîthiani îmbega, na irîma bira biraaya bigaatuîka gûntû gwa cio gwa kûrîîthua. Naagu ikaamaamaga ndîîthiani imbega, na ikaarîîyaga ndîîthiani înoru irîmaani bia Isiraeri. 15 Mwathani Mwene Inya ariuga, n'yû ningwa ngacirîîthia, na ntûme imaame. 16 Ngaaceria ira ciûrîîte na ncookie ira ciathûkîrîîte. Nkooga ira igurarîîtue na ira itarî na inya nciîkîre inya, îndî ira noru na ira irî na inya ngaciînyaangia. Nkaarîîthia ng'ondu bûra kûbatîîrue.
17 “ ‘Naabi ûrîîthi bwakwa, ûûgû i bu Mwathani Mwene Inya akuuga, nkaagiita îgamba gatîgatî ka ng'ondu na ng'ondu îra îîngî, na gatîgatî ga ntûrûme na nthenge. 18 Ka bûtarî bûganu kîrî biû kûrîa ndîîthiani îîndirimu? Nwa mwanka bûkinyange ndîîthia înu îîngî na magûrû? Ti bûganu bwenu kûnyua rûûyî rûûtheru? Nwa mwanka bûkunjugûre na magûrû meenu? 19 Nwa mwanka ng'ondu ciakwa irîe bira ûkinyangîîte na inyue rûûyî rûra ûkunjugûrîîte na magûrû maaku?
20 “ ‘Kwoogu ûûgû i bu Mwathani Mwene Inya akûbeera: Niû nkaagiita îgamba gatîgatî ka ng'ondu inoru na i nceng'u. 21 Bûtiindîkaga na mbaru na ituro, na gûtûnga ng'ondu ira itarî na inya na ngoci mwanka ikauma akubî, 22 kwoogu nkoonokia ng'ondu ciakwa na itiinyamaarua kaîrî. Nkaagiita îgamba gatîgatî ka ng'ondu îmwe na îra îîngî. 23 Nkaiga mûrîîthi ûmwe îgûrû rîacio atuîke mûnene wacio, mûruti ngûgî wakwa Ndaundi. Agacimenyeera na atuîke mûrîîthi wacio. 24 Niû Mwathani ûkeegua ndî Ngai wao, na mûruti ngûgî wakwa Ndaundi akeegua arî mûtongoria wao. I niû Mwathani ndauga.
25 “ ‘Nkaarûtha kîrîîkanîro gîa ûkiri nabo na ndutarute nyamû cionthe ira nthûûku kuuma nthîgûrû, kaingo ng'ondu ciakwa itûûra rwanda na imaama mûthitûûni itarî na ûgwati. 26 Ngacithaarima na gûntû kunthe kûra kûthiûrûkîrîîte kîrîma gîakwa. Nkabaurithîria mbura îgiita rîayo, n'yo îkeegua îrî mbura ya ithaarimo. 27 Mîtî îgaaciara matunda, nthîgûrû îrute imera biayo, na antû bonthe bagaatûûra barî bamenyeere nthîgûrû yao. Bakaamenya niû ndî Ngai rîra nkaunanga îcoki rîra rîbathaîkîîte na mboonokie kuuma njaraani cia bara babatuîkithîîtie nkombo. 28 Batiituunywa into biao i mîgongo kaîrî, kana barîîgwa i nyamû cia kîthaka kaîrî. Bagaatûûra mayîîga gûtarî we akûbamakia. 29 Nkabanenkera nthîgûrû îrî îgweta n'ûntû bwa maketha maayo kaingo batanyamaara i yûûra kana bathekeerwa i mîgongo îra îîngî kaîrî. 30 Rîru bakaamenya niû, Mwathani Ngai wao ndî amwe nabo, nabo antû ba Isiraeri n'antû baakwa, i bu Mwathani Mwene Inya akuuga. 31 Biû ng'ondu ciakwa, ng'ondu cia ndîîthia ciakwa, bûrî antû baakwa, naani ndî Ngai wenu. I bu Mwathani Mwene Inya akuuga.’ ”