Esekieri mûkaria
(Esek 3:16-21)
33
1 Mwathani aaria naani ambîîra, 2 “Mwana wa muntû, arîria antû beenu na ûbeere, ‘Rîra nkaarekeeria mûnthû nthîgûrû abwithûkîra, na antû ba nthîgûrû bathuure ûmwe wa antû baao bamûtuîkithie mûkaria wao, 3 na oone mûnthû ayîîte kwithûkîra nthîgûrû na ariinge rûgoci gûkaania antû, 4 ûkaaya kwîgua kûrî we akeegua rûgoci na atiîgua nkaanua, anthû bamûûrage, gîkuû gîake gîkeethîrwa kîrî îgûrû rîake we mwene. 5 N'ûntû n'eeguire rûgoci na atireegua nkaanua, gîkuû gîake gîkeethîrwa kîrî îgûrû rîake. Ûkeegua n'aathûkiirie îtagaaria, akîonokia mwoyo wake. 6 Îndî mûkaria akoona anthû baayîîte na arege kûringa rûgoci akaania antû na anthû baûrage muntû ûmwe, muntû ûyu aûragwa akeethîrwa aûragîîtwe n'ûntû bwa meeyia maake, na nkaagambithia mûkaria n'ûntû bwa gîkuû gîake.’7 “Mwana wa muntû, ngûgûtuîkithia mûkaria wa Isiraeri. Kwoogu, rîra ûkeegua ndakwîra ûntû ûnkaanîrie bo. 8 Nkeera muntû ûmûthûûku, ‘Woû muntû ûmûthûûku na mma ûgaakua,’ îndî ûtimwarîria atigana na mîtugo yake îmîthûûku, muntû ûyu agaakua n'ûntû bwa meeyia maake, îndî ngakûgambithia n'ûntû bwa gîkuû gîake. 9 Îndî ûkaaya gûkaania muntû ûyu mûthûûku kuuma njîraani ciake na akarega gûkwathîkîra, agaakua n'ûntû bwa meeyia maake, îndî woû ûkeegua ûkwonokia ûtûûro bwaku.”
10 Mwana wa muntû, îra antû ba Isiraeri, “Ûûgû i bu bûkuuga, ‘Mabîtia na meeyia meetû imagûtûritwîra, na i magûtûma tûtaûkîrwa n'ûntû bwa mo. N'aata îndî tûgaatûûra?’ 11 Beere, ‘Wa ta bûra ntûûraga mwoyo, i bu Mwathani Mwene Inya akuuga, ntikenagua i gîkuû kîa muntû ûmûthûûku, îndî mbeendaga atigana na mîtugo yake îmîthûûku, kaingo atûûra. Îîrire! Îîrire kuuma ûthûûkuuni bwaku. I kî n'ûntû ûgaakua, woû Isiraeri?’
12 “Kwoogu, mwana wa muntû, îra antû ba nthîgûrû yaku ûûgû, ‘Wagîru bwa muntû ûmwagîru bûtimwonokia rîra eeyia, na ûthûûku bwa muntû ûmûthûûku bûtitûma agwa rîra agarûka kuuma kîrî bu. Muntû ûmwagîru akeeyia, atiîtîgîîrua gûtûûra n'ûntû bwa ûtheru bwake bwa mbereeni.’
13 “Nkaaya kwîra muntû ûmwagîru atî na mma agaatûûra, îndî ageetîgia wega bwake na akarûtha mantû maathûûku, gûtirî bu bwa mantû mara arûthîîte bûkaaririkanwa, agaakua n'ûntû bwa meeyia maake. 14 Na nkeera muntû ûmûthûûku, ‘Na mma ûgaakua,’ Îndî agatiga kûrûtha meeyia na akarûtha bûra bûrî bwa mma na bûbatîîrue, 15 agacookia kîra kîarûgamîrîîte îrandû, agacookia kîra aiyire, akathiingata mawatho mara mareetaga mwoyo, na atarûthe mantû maathûûku, agaatûûra na atiikua. 16 Meeyia maake monthe mara arûthîîte matiiririkanwa. Wee arûthîîte mantû meega na ma mma, kwoogu namma agaatûûra mwoyo.
17 “Antû beenu bariuga, ‘Njîra cia Mwathani ti cia ûmma.’ Îndî i njîra ciao itarî cia ûmma. 18 Muntû ûmwagîru agatigana na njîra ciake cia wagîru na akarûtha mantû maathûûku, agaakua n'ûntû bwa meeyia maake. 19 Na muntû ûmûthûûku agatigana na mantû maake maathûûku na akarûtha mantû meega na ma ûmma, agaatûûra n'ûntû bwoogu. 20 Îndî biû antû ba Isiraeri bûriuga, ‘Njîra ya Mwathani t'ya ûmma.’ Îndî nkaagiitîra woora ûmwe weenu îgamba kûringana na njîra ciake wengwa.”
Kûgwa kwa Njerusaremu gwataûrwa
21 Ntugû ya itaano ya mweri wa îkûmi, mwanka wa îkûmi na îîrî, kuuma tûgûtaîgwa, muntû ûra atoorokeete kuuma Njerusaremu aaya kîrî niû ambîîra, “Taûni îkûgwa!” 22 Ûgorooni mbere muntû ûyu atiraaya rûûni rûkîîrî, inya ya Mwathani yambûyîîra, na gûkunûra kanyua gaakwa. Kwoogu, kanyua gaakwa gaakunûrwa na ndaatua kwaria kaîrî.
23 Rîru Mwathani aaria naani ambîîra, 24 “Mwana wa muntû, antû bara batûûraga maganjooni mamu nthîgûrû ya Isiraeri bariuga, ‘Îburaîmu aarî muntû ûmwe akî, na eegwatîra nthîgûrû. Îndî tûrî baingî, na mma tûneenkeretwe nthîgûrû îno twîgwatîra yoo.’ 25 Kwoogu beere, ‘Ûûgû i bu Mwathani Mwene Inya akuuga, bûrîîyaga nyama irî na nthakame, bûkagonga mîbuanaano na bûgeetûûra nthakame, îîndî rî, ibûbatîîrue kwîgwatîra nthîgûrû? 26 Bwîgwatagia rûûyiû rwenu, bûkarûtha mantû marî njici, na wora ûmwe wa cienu akagwatithia mwekûrû wa mûtûûri wake mûgiro. Ibûbatîîrue kwîgwatîra nthîgûrû?’
27 “Beere, ‘Ûûgû i bu Mwathani Mwene Inya akuuga, wa ta bûra ntûûraga mwoyo, bara baatigarire taûni îra yombokanire bakaûragwa na rûûyiû, bara barî rûriîni barîîgwe i nyamû cia kîthaka na bara barî wîbithooni na makurunguuni bagaakua i mîrimo. 28 Ngaatuîkithia nthîgûrû înu îganjo, na inya yao îra îtûmaga beekumia îgaakinya mûthia na irîma bia Isiraeri biomorangwe kaingo muntû nwa ûrîkû atakûrûkîîra ku. 29 Rîru i rîo bakamenya i niû Mwathani, rîra ngaatuîkithia nthîgûrû maganjo n'ûntû bwa mantû mathûûku marî njici mara barûthîîte.’
30 “Naawe mwana wa muntû, antû ba nthîgûrû yenu barîkwaaria barî nthingooni na mîîrîgaani ya nyomba. Beeranaga ‘Ncûûni bwîgue ntûmwa îra yaaya kuuma kîrî Mwathani.’ 31 Antû baakwa baayaga kîrî woû, wa ta bûra baayaga na bagakara mbere yaku kûthikîîria mîgambo yaku, îndî batirûthaga bûra beeragwa. Baaragia mantû ma wendo na tûnyua twao îndî nkoro ciao irî na îtanûka rîa gûtonga na njîra itarî mbega. 32 Namma kîrî bo, ûkari ta mwini ûra ainaga nyîmbo cia wendo na kayû kaathongi na kûringa wandîndî bwega, n'ûntû beegagua biugo biaku îndî batibîathîkagîra.
33 “Rîra mama monthe magaakarîka, n'ûntû mo magaakarîka, rîru bakamenya kîroria i kîraarî gatîgatî kaao.”