Kîrîro îgûrû rîa Faraû
32
1 Ntugû ya mbere ya mweri wa îkûmi na îîrî, mwanka wa îkûmi na îîrî, nyuma ya kûgwatwa kwa Njeoyakini, Mwathani aambarîria ambîîra, 2 “Mwana wa muntû, rîrîra Faraû mûnene wa Miisiri na ûmwîre:Wîthûkagia ta cimba gatîgatî ka mîgongo,
îndî ûkari ta njoka îra nene îriani,
ûbutagîra miurooni yaku
ûgîkunjugûraga rûûyî na magûrû maaku
rûkagwata rûko.
3 Ûûgû i bu Mwathani Mwene Inya akuuga,
Mbere ya kîrîndî kîa mîgongo îmiingî
nkaamba neeti yakwa,
na bagûkuuyie ûrî ku.
4 Ngagûta nthîgûrû îmbûmo
na nkûgere kîeniini.
Ngaatûma nyoni cionthe cia îgûrû inogoke îgûrû rîaku
na nyamû cia kîthaka cia nthîgûrû yonthe irîe nyama cia mwîrî waku.
5 Ngaataandîka nyama ciaku irîmaani
na mbûyûrie iboonde na matigari maaku.
6 Nkaariinda nthîgûrû na nthakame yaku
mwanka irîmaani,
na tûguuru tûkaûyûra nthakame yaku.
7 Rîra nkooria taa yaku, ngaakunîkîra îgûrû
ntûme nthata igîe mwindu,
ngaakunîkîra riûa na îtu,
na mweri ûtiitharara.
8 Werû bunthe bûra bûthararaga îgûrû
nkabutuîkithia mwindu îgûrû rîaku,
nkaareeta mwindu nthîgûrû yaku,
i bu Mwathani Mwene Inya akuuga.
9 Nkaanyamaaria nkoro cia antû baingî
rîra nkaamenyithia mîgongo mantû ma kwînyangua gwaku,
gûkûrûkîîra nthîgûrû ira ûtaiyî.
10 Ngaatûma mîgongo îmaka n'ûntû bwaku,
na anene baao bakainaina n'ûntû bwaku
rîra ngaakûûra rûûyiû rwakwa mbere yao. Ntugû ya kûgwa gwaku
woora muntû akainaina
îgiita rionthe akîmakîra ûtûûro bwake.
11 “N'ûntû ûûgû i bu Mwathani Mwene Inya akuuga:
Rûûyiû rwa mûnene wa Mbabironi
rûkaaya îgûrû rîaku.
12 Ngaatûma acikaarî baaku ba ndûa baûragwa
na rûûyiû rwa ncamba cia ndûa
bara bathûûku mûno ba mîgongo yonthe.
Bakaathiria rwîkumia rwa Miisiri, na antû baake bonthe bakaathirua.
13 Nkeenyangia ng'ombe ciake cionthe
kuuma rûteere rwa rûûyî rwingî.
Rûtiinainua i rwayo rwa muntû kaîrî
kana ncûûga cia ng'ombe ciruîkîra rûko.
14 Rîru ngaatûma rûûyî rûkirîîrie
na ntûme tuuro twake tûthi bwega ta maguta,
i bu Mwathani Mwene Inya akuuga.
15 Rîra ngaatuîkithia Miisiri îganjo
na into biayo bionthe bithûkue
na bara bonthe batwîre ku baûragwe,
i rîo bakaamenya i niû Mwathani.
16 “Rûrû i ru rwîmbo rwa kîeba rûra bakaamwinîra. Aarî ba mîgongo bakarwina, bainîre Miisiri na antû baake, i bu Mwathani Mwene Inya akuuga.”
17 Ntugû ya îkûmi na itaano ya mweri wa ûyu mwanka wa îkûmi na îîrî, Mwathani ambarîria anjîîria, 18 “Mwana wa muntû, rîrîra antû ba Miisiri na ûbeendamie nthîgûrû ya antû bara bakuû amwe na mîgongo îra îîngî îrî inya, bathi naagu amwe na bara beendamîîte îrinyaani. 19 Beere, ‘Ka bûrî beendeere nkûrûki ya bara bangî? Îndamaani bûkamaamue amwe na bara batarî bataane.’ 20 Bakaagwa gatîgatî ka bara baûragirwe na rûûyiû. Rûûyiû i rwîthuuranîîre kûûraga Miisiri amwe na antû baayo baingî. 21 Barî nthîgûrû ya bara bakuû anene bara barî inya bakauga ûûgû îgûrû rîa Miisiri na acoore baayo ba ndûa, ‘Bakwîndama na bamaami na antû batarî bataane, na bara baûragirwe na rûûyiû.’
22 “Asîîria arî oogo na njûûrî yake yonthe, athiûrûkîîrîîtwe i nthiko cia bonthe bara baûragirwe na rûûyiû. 23 Nthiko ciao irî mborokerooni na njûûrî ithiûrûkîrîîte nthiko yake. Bonthe bara beekagîra imakania nthîgûrû ya bara barî mwoyo, i baûragirwe na rûûyiû.
24 “Eramu îrî oogo, na antû baake bonthe bathiûrûkîîrîîte nthiko yake. Bonthe i baûrage, na baathirua na rûûyiû. Bonthe bara baataambiirie imakania nthîgûrû ya bara barî mwoyo beendamire îrinyaani batarî bataane. Îîndî barî na îgi bûmwe na bara beendamaga mwanka îrinyaani. 25 N'arûthîrîîtwe ûrîrî gatîgatî ka bara bakuû, amwe na antû baake bonthe bathiûrûkîîrîîte nthiko yake. Bonthe ti bataane, na baûragirwe na rûûyiû. N'ûntû îmakania rîao i rîatambîîte nthîgûrû ya bara barî mwoyo, barî na îgi amwe na bara beendamîîte îrinyaani, bamaamîîtue gatîgatî ka bara baûrage.
26 “Meseki na Tubari barî oogo, na antû baao bonthe bathiûrûkîîrîîte nthiko ciao. Bonthe ti bataane, baûragirwe na rûûyiû n'ûntû bwa gûtambia imakania nthîgûrû ya bara barî mwoyo. 27 Anga batimaamaga amwe na ncamba itarî ntaane ira ciagwîre, ciendama nthikooni na mathaga maao ma ndûa, bara ndûûyiû ciao ciaigîîrwe ruungu rwa biongo biao? Kagiita kamwe, imakania bia ncamba ino i biatambîîte nthîgûrû ya bara barî mwoyo, îndî îîndî, îkaanûkia rîa meeyia maao rîrî mîîndîîni yao.
28 “Wana woû, Miisiri, ûkaathontorua na ûmaamue gatîgatî ka bara batarî bataane, na bara baûragirwe na rûûyiû.
29 “Endomu îrî oogo, anene na aathani baayo bonthe. Amwe na ûnene bwao, bamaamîîtue amwe na bara baûragirwe na rûûyiû. Bamaamîîte amwe na bara batarî bataane na bara beendamaga îrinyaani.
30 “Aathani bonthe ba mbarî ya neegûrû na antû ba Sindoni bonthe barî oogo, bonthe beendamanîîrie amwe na bara baûragîîtwe barî na îgi wana wegua kagiita kamwe i baareeteete imakania na inya yao. Bamaami na bara batarî bataane na bara baûragirwe na rûûyiû na barî na îgi na bara beendamaga îrinyaani.
31 “Faraû na njûûrî yake yonthe bakaboona na agaakirakirua n'ûntû bwa antû baake bonthe bara baûragirwe na rûûyiû, i bu Mwathani Mwene Inya akuuga. 32 Wana wegua indaarekire batambia imakania nthîgûrû ya bara barî mwoyo, Faraû amwe na antû baake bonthe bakaamaama amwe na bara batarî bataane, na bara baûragirwe na rûûyiû, i bu Mwathani Mwene Inya akuuga.”