Mûthithinda wa Rebanoni
31
1 Ntugû ya mbere ya mweri wa îthatû, mwanka wa îkûmi na ûmwe, nyuma ya kûgwatwa kwa mûnene Njoakini Mwathani ambarîria ambîîra, 2 “Mwana wa muntû, îra Faraû mûnene wa Miisiri na antû baake:N'ûû ûûmba kûganaanua naawe kîî ûnene?
3 Raitha Aramu yarî mûthithinda Rebanoni,
na mpoong'i inthongi irî na mûgunye mûthitûûni,
na yarî na ûraaya bûûnene,
na kathûmbîri kaau akubî gatongithia matu.
4 Rûûyî rwacuthongamia,
ithima bia nthîgûrû ruungu biatûma ûraayîa,
tuuro twaraga
nteere cionthe cia ruungu
na twatûma mîthîîra yaatu
kîrî mîtî yonthe ya mûthitû.
5 Kwoogu, waraayîa
nkûrûki ya mîtî yonthe ya mûthitû,
na mpoong'i ciaingîa na cianenea,
igîtaambaga n'ûntû bwa wingî bwa rûûyî.
6 Nyoni cionthe cia îgûrû ciaka ntara cia cio mpoong'iini,
na nyamû cia mûthitû cionthe ciaciarîra ruungu rwa mpoong'i inu,
mîgongo yonthe îmînene
yatûûra ruungu rwa mûgunye wau.
7 Warî ûmûthongi
na mpoong'i inyagaarîîte
n'ûntû mîri yau n'athiîte nthî
mwanka rûûyîîni rwingî.
8 Mîthithinda mûndaani wa Ngai
îtikîbuanaana nau,
kana mîtarakwa
îganaana na mpoong'i ciau
kana mûbaaû maguta
ûbuanaanua na mpoong'i ciau
gûtirî mûtî mûndaani wa Ngai
ûkîbuanaanua na ûthongi bwau.
9 Ndauthongamiirie
na mpoong'i inyiingî,
na weguîrwa rûriitho i mîtî îra îîngî yonthe ya Endeni
mûndaani wa Ngai.
10 “Kwoogu, ûûgû i bu Mwathani Mwene Inya akuuga, n'ûntû n'warî ûmûraaya mûno, kathûmbîri kaau kaarî îgûrû matuuni na n'ûntû n'wekumagîria ûraaya bwau, 11 ndacunenkanîra kîrî mûnene wa mîgongo, kaingo aukaanûkia kûringana na ûthûûku bwau. Ndacuta rûteere n'ûntû bwa mathûûkia maau. 12 Na antû ba mîgongo îmîgeni bacutema na bacutiganîria. Mpoong'i ciau ciagwa irîmaani na ibondeeni. Ciaunîkanga ciagwa tuurooni tunthe twa nthîgûrû. Mîgongo yonthe ya nthîgûrû yauma mûgunyeeni wau na gûcutiganîria. 13 Nyoni cionthe cia îgûrû ciatûûra mûtîîni ûyu mûgwîthu, na nyamû cionthe cia kîthaka ciaarî gatîgatî ga mpoong'i inu. 14 Kwoogu, mûtî unthe ûrî akubî na rûûyî, ûtikeebûkîîrie n'ûntû bwa ûraaya bwau, kana ûkinyithia kathûmbî kaau matuuni. Gûtirî mûtî ûngî ûgaakunda rûûyî bwega ûkinyîra ûraaya ta bûbu, n'ûntû mûthia wau i gîkuû, îkeendama îrinyaani gatîgatî ga antû bara bakuû.
15 “Ûûgû i bu Mwathani Mwene Inya akuuga: Ntugû îra mûtî ûyû wendamire îrinyaani, i ndaatûmire inyaka bicukunîkîra rûrî rwano rwa gûcurîrîra, ndaabwethia miuro yake rûûyî rûra rwetîgaga ndarutigithia gwîtîga. N'yo Rebanoni yacurîrîra, na mîtî yonthe kîthakaani yaûma. 16 Ndaatûmire nthîgûrû ciinaina n'ûntû bwa mûrurumo wa kûgwa kwau rîra ndaacureetire nthî îrinyaani amwe na bara baathiîte nthî îrinyaani. Rîru mîtî yonthe ya Endeni, mîtî îra mîthongi ya Rebanoni na mîtî yonthe îra yaatûûrîrîîtue rûûyî bwega, îra yarî îkwîndama îrinyaani yaakeneera kûgwa kwau. 17 Bara baatwîre mûgunyeeni wau, mîgongo îra yarî acoore baao ba ndûa, bonthe baathi nthikooni, baungana na bara baûragîîtwe na rûûyiû.
18 “Îîndî rî, i mûtî ûrîkû wa Endeni ûûmba kûbuanaanua naawe kî ûthongi na ûnene woû Miisiri? Îndî kinya woû ûkeendamua amwe na mîtî ya Endeni mwanka nthîgûrû, ûkaamaama gatîgatî ka bara batarî bataane, amwe na bara baûragirwe na rûûyiû.
“Ûyû i Faraû na antû baake bonthe. I bu Mwathani Mwene Inya akuuga.”