Kûrîrîra Miisiri
30
1 Mwathani aaria naani ambîîra, 2 “Mwana wa muntû, roria uuge, Ûûgû i bu Mwathani Mwene Inya akuuga,‘Rîraani bûkiugaga,
“Ûi n'ûntû bwa ntugû înu!
3 N'ûntû ntugû îrî akubî,
ntugû ya Mwathani îrî akubî,
ntugû ya matu,
kagiita kara mîgongo îgaakaanûkua.
4 Rûûyiû rûkaaya îgûrû rîa Miisiri,
na îtemekia rîîye îgûrû rîa Kusi,
rîra bara baûrage bakaagwa Miisiri,
ûtonga bwa yo bûthûkue
na mîcingi yaayo yomorwe.”
5 “ ‘Kusi, Puti, Rundi, na nthîgûrû yonthe ya Aarabu,a Kubub na antû ba kîrîîkanîroc bakaathiranîrua amwe na Miisiri na rûûyiû.”
6 “ ‘Ûûgû i bu Mwathani akuuga:
Acoore ba ndûa ba Miisiri bakaagwa
na rwîkumia rwa inya yake rûkaathira.
Kuuma Migindori mwanka Siene
bakaûragwa na rûûyiû
i bu Mwathani Mwene Inya akuuga.
7 Miisiri îgaatuîka îganjo
gatîgatî ka nthîgûrû ira irî maganjo
na taûni ciao ikaagwa
gatîgatî ga taûni ira cienyangiirue.
8 Antû ba Miisiri bakaamenya ndî Ngai,
rîra Nkaamuntia Miisiri mwanki
na mbînyangie acoore baayo ba ndûa bonthe.
9 “ ‘Ntugû înu, ngaatûma atûmwa na meeri kûmakia antû ba Kusi bara beebonaga barî mayîîga. Bakaagwatwa i kîmako ntugû înu ya kwînyangua kwa Miisiri, n'ûntû ntugû înu n'îyîîte.
10 “ ‘Ûûgû i bu Mwathani Mwene Inya akuuga:
Ngaatûma Nebukandinesa, mûnene wa Mbabironi,
kûthiria ûtonga bwa nthîgûrû ya Miisiri.
11 Wee na njûûrî yake, mûgongo ûra ûtarî kîao nwa aniini,
bagaatûmwa kwînyangia nthîgûrû.
Bagaakûûra ndûûyiû ciao barûe na antû ba Miisiri
na baûyûrie nthîgûrû na biimba.
12 Nkaabwethia muuro wa Naero
na mbendie nthîgûrû înu kîrî antû baathûûku,
gûkûrûkîîra njara cia ageni.
Nkeenyaangia nthîgûrû ya Miisiri na kîonthe kîra kîrî ku.
I Niû Mwathani nkuuga.
13 “ ‘Ûûgû i bu Mwathani Mwene Inya akuuga:
Nkeenyangia ngai cia ûrongo
na mîbuanaano ya Memufisi.
Gûtiîthîrwa kûrî na mûnene Miisiri kaîrî,
na nkaareeta ûguaya nthîgûrû ya Miisiri yonthe.
14 Ngaatuîkithia Pathirosi îganjo,d
mmuntie taûni ya Soani mwanki,
na nkaanûkie taûni ya Thebesi.
15 Ngeetûûra mûthûûro wakwa kîrî Perusiamu,
wîbitho bwa Miisiri
na mbînyangie ikundi bia Thebesi.
16 Nkaamuntia nthîgûrû ya Miisiri mwanki.
Perusiamu îkeegua îrî na ûrûrû bûûnene.
Thebesi îkoomorwa,
Memufisi igaatûûra na kîmako kîînene.
17 Nthaka cia taûni cia, Erioporisi na Pi-Besethi
bakaûragwa na rûûyiû,
na taûni ciao ciongwa ikaathi ûkombooni.
18 Naagu Tapanesi, mûthenya ûkeegua ûrî na mwindu
rîra nkaunangîra gîcoki kîa Miisiri noogo,
rîru i rîo agaatiga wîkumia n'ûntû bwa inya yake.
Îtu rîgaakunîka nthîgûrû ya Miisiri,
na antû baayo bakaathi ûkombooni.
19 Kwoogu, nkaanenkera Miisiri nthînje,
na bakaamenya niû ndî Ngai.’ ”
20 Ntugû ya mûgwanja ya mweri wa mbere, mwanka wa îkûmi na ûmwe, Mwathani ambarîria ambîîra, 21 “Mwana wa muntû, nkuuna njara ya Faraû mûnene wa Miisiri. Îtiroogwa kaingo yoora kana yîîkîrwa ndawa kaingo îgîa na inya ya kûgwata rûûyiû. 22 Kwoogu, ûûgû i bu Mwathani Mwene Inya akuuga, ndî na ûthû na Faraû mûnene wa Miisiri. Nkauna njara ciake irî ciîrî, îra îtarî mbunîku na îra mbunîku, na ntûme rûûyiû rûgwe kuuma njaraani yake. 23 Nkaanyagaaria antû ba Miisiri kîrî mîgongo îra îîngî na mbanyagaarie nthîgûrû ira ciingî. 24 Ngeekîra njara cia mûnene wa Mbabironi inya na mbîkîre rûûyiû rwakwa njaraani ciake, îndî, nkauna njara cia Faraû, na agaakaya mbere ya mûnene wa Mbabironi ta muntû ûmûtonyange. 25 Ngeekîra njara cia mûnene wa Mbabironi inya, îndî njara cia Faraû ikaaregera. Rîru antû bonthe bakaamenya i niû Mwathani, rîra ngeekîra rûûyiû rwakwa njaraani cia mûnene wa Mbabironi na aruûkîîrie îgûrû rîa Miisiri kûmîînyangia. 26 Nkaanyagaaria antû ba Miisiri kîrî mîgongo îra îîngî na mbanyagaarie nthîgûrû ira ciingî. Rîru bakaamenya i niû Mwathani.”