29
1 Ntugû ya îkûmi na ciîrî ya mweri wa îkûmi mwanka wa îkûmi, nyuma ya mûnene Njoakini agûtaîgwa Mwathani aaria naani ambîîra, 2 “Mwana wa muntû, garûkîra Faraû mûnene wa Miisiri na ûrorie îgûrû rîake na îgûrû rîa nthîgûrû ya Miisiri yonthe. 3 Mwarîrie na ûmwîre: Ûûgû i bu Mwathani Mwene Inya akuuga,‘Ndî na ûthû naawe, Faraû mûnene wa Miisiri,
woû njoka îra nene ya îria ûmaami muurooni.
Uugaga, “muuro wa Naero n'wakwa,
I niû ndeerûthîîre u.”
4 Îndî ngeekîra ndwano ntheani ciaku
na ntûme makûyû ma miuro yaku marûmîîre magokooni maaku.
Ngakûruta rûûyîîni rûru
na makûyû monthe marûmîîrîîte magokooni maaku.
5 Ngakûyugayugîria rwanda,
na makûyû monthe ma muuro waku.
Ûkaagwa kîeniini
na ûtiîthîranua kana woywa.
Ngakûnenkanîra ta irio
kîrî nyamû cia kîthaka na kîrî nyoni cia îgûrû.’
6 “Rîru bara bonthe batûûraga Miisiri bakaamenya i niû Mwathani. Wîthîrîîtwe ûkari ta mûraagi wa rûthanje kîrî antû ba Isiraeri. 7 Bagûkûgwata na njara ciao, waunîkire na wabatembûranga ituro biao, bagwîtiira naawe, waboboreka na mîgongo yao yeenia.a
8 “Kwoogu, ûûgû i bu Mwathani Mwene Inya akuuga: Ngakwithûkîra na rûûyiû na mbûrage antû baaku na nyamû ciao. 9 Miisiri îgaatuîka îganjo na îtuîke rwanda. Rîru i rîo bakaamenya ndî Ngai.
“N'ûntû waugire, ‘Muuro wa Naero nwakwa, i niû ndaacurûthire,’ 10 kwoogu, ndî na ûthû naawe na miuro yaku, ngaatuîkithia nthîgûrû ya Miisiri rwanda na îtarî na gîntû, kuuma Migindori mwanka Siene, mwanka mîankaani ya Kusi. 11 Gûtirî muntû kana nyamû îgaakûrûkîîra ku, gûtirî we agaatûûra ku bantû a mîanka mîrongo îna. 12 Ngaatuîkithia nthîgûrû ya Miisiri îganjo, gatîgatî ka nthîgûrû ira maganjo, na taûni ciake igaatuîka maganjo gatîgatî ga taûni ira maganjo gwa kagiita ka mîanka mîrongo îna. Na nkaanyagaaria antû ba Miisiri gatîgatî ka mîgongo yonthe gûkûrûkîîra nthîgûrû.
13 “Ûûgû i bu Mwathani Mwene Inya akuuga: Mûthiani wa mîanka mîrongo îna nkeethîrania antû ba Miisiri kuuma nthîgûrû ira banyagaarîîtue. 14 Nkabaruta ûkombooni na mbacookie nthîgûrû ya Pathurosi rûteere rwa iti rwa Miisiri, nthî yao îra baumire. Naagu ûkeegua kûrî na ûnene bûûkai. 15 Bûkeegua bûrî ûnene bûra bûkai mûno kîrî mîgongo yonthe, na îtikooro îîbûkîîria kaîrî îgûrû rîa mîgongo îra îîngî. Nkaamîthiria inya bûra îtakaaro yûûmba kwatha mîgongo îra îîngî. 16 Antû ba Isiraeri batiîgwatia Miisiri kaîrî, îndî bakaaririkana meeyia maao rîra baagarûkîîre Miisiri îbateethia. Rîru bakaamenya ndî Mwathani Mwene Inya.”
17 Ntugû ya mbere ya mweri wa mbere, mwanka wa mîrongo îîrî na mûgwanja, Mwathani aaria naani ambîîra, 18 “Mwana wa muntû, mûnene Nebukandinesa wa Mbabironi airire njûûrî yake yaarûa na Turo ndûa înene mûno. Biongo bia acikaarî ba ndûa biagîa mpanda na ituro biagîa matooyo. Amwe na ûgu, Nebukandinesa na njûûrî yake gûtirî kîewa boona kuumania na ngûgî îra barutîîte kuumania na Turo. 19 Kwoogu, ûûgû i bu Mwathani Mwene Inya akuuga, nthiîte kûnenkanîra Miisiri kîrî Nebukandinesa mûnene wa Mbabironi akamate ûtonga bwa yo bunthe. Akaabagwata mîgwate na atae into biayo, nabio bituîke marîi ma njûûrî yake. 20 Nkûmûnenkera nthîgûrû ya Miisiri ta kîewa n'ûntû bwa îriî rîa ngûgî îra we na njûûrî yake baarutire bantû aakwa. I bu Mwathani Mwene Inya akuuga.
21 “Ntugû înu ngaatûma antû ba Isiraeri bagîa na inya kaîrî na ngakûûmbithia kwaria gatîgatî kaao, woû Esekieri, rîru bakaamenya i niû Mwathani.”