Ûroria îgûrû rîa mûnene wa Turo
28
1 Mwathani aaria naani ambîîra, 2 Mwana wa muntû, îra mûtongoria wa Turo, ûûgû i bu Mwathani Mwene Inya akuuga.“Woû ûrî na rwîkumia rwa nkoro
na ûriuga, ‘Ndî ngai,
na nkarîrîîte gîtî kîa ûnene kîa ngai
gatîgatî ka îria.’
Îndî woû ûrî muntû na ti ngai,
wana wegua ûrîîkumia ûkiugaga ûkari ta ngai.
3 Ka ûrî na ûûme nkûrûki ya Ndanieri?
Ûthûgaanagia gûtirî ûntû ûtaiyî.
4 N'ûntû bwa ûûme na gûciûkîrwa waku
n'wîcwîrîîte ûtonga,
na weebîthîranîria thaabu na fetha
wacigaiga igîînaani.
5 N'ûntû bwa ûmenyo bwaku biacaaraani,
n'wongeereete ûtonga bwaku,
na n'ûntû bwa ûtonga bwaku
wagîa na rwîkumia.”
6 Kwoogu, ûûgû i bu Mwathani Mwene Inya akuuga.
N'ûntû ûrîthûgaania ûrî na ûûme ta ngai,
7 ngakûretera anthû bakwithûkîre
antû ba mîgongo îra îtarî kîao nwa aniini,
bakeenyangia into biithongi bionthe bira bûcwîte na waara na ûûme,
na ngagûtuunya ûthongi bwaku.
8 Bagakwîndamia nthîgûrû ya bara bakuû
ûkue gîkuû kîa thîîna,
gatîgatî ka Îria.
9 Ûkaathi na mbere na kuuga, “Ndî ngai”
gatîgatî ka bara bagaakûûraga?
Ûkeegua ûrî muntû, îndî ti ngai, njaraani cia bara bagaakûûraga.
10 Ûgaakua gîkuû ta kîa bara batarî bataanea
njaraani cia ageni.
I bu Mwathani Mwene Inya akuuga.
11 Mwathani aaria naani ambîîra, 12 “Mwana wa muntû, inîra mûnene wa Turo rwîmbo rwa kîrîro. Ûûgû i bu Mwathani Mwene Inya akuuga,
warî ngerekano înkinyanîru,
waûyûrîîtwe n'ûûme na ûthongi bûûkinyanîru.
13 Warî Endeni, mûndaani wa Ngai,
ugemeetue na mîthemba yonthe ya maiga ma goro;
rubi, topaci na emerandi,
kiricorite, carindioni na njacipa,
cabire, takwici na beriri. Warî na magemio ma thaabu.
Wabanganîrîîtue mama monthe ntugû îra waûmbirwe.
14 I ndaathuurire Kerubi* wa gûgûkaria,
waatûûrire kîrîmaani kîîtheru kîa Ngai,
wathiîra îgûrû rîa twiga twa mwanki.
15 Ûtaarî ûguute mûtûûrîreeni waku,
kuuma ntugû îra waûmbirwe
mwanka rîra ûthûûku bwonekanire ndeeni yaku.
16 N'ûntû bwa biacaara yaku îmbariî,
n'waûyûrirwe i bitina, na weyia.
Kwoogu, ndaakwîngatire na njîra ya îgi kuuma kîrîmaani kîîtheru kîa Ngai,
na Kerubi ûra aagûkaragia akwîngatia kuuma twigaani tûra twa mwanki.
17 Nkoro yaku yaagîa rwîkumia
n'ûntû bwa ûthongi bwaku,
na wenyangia ûûme bwaku n'ûntû bwa ûthongi bwaku.
Kwoogu, ndakûgera nthîgûrû,
na ndagûtuîkithia gîntû gîa kûgegwa na kûmeneerua mbere ya anene.
18 N'ûntû bwa wingî bwa meeyia maaku na kûrega gwîtîgîka biacaaraani,
nwîkîrîîte irombero biaku mûgiro.
Kwoogu ndaatûma mwanki uuma ndeeni yaku,
na wa kûbîîthia waathira,
na ndagûtuîkithia muu nthîgûrû
mbere ya antû bonthe bara baaraithîîte.
19 Mîgongo yonthe îra yaakwiyî
îkaamaka n'ûntû bwaku,
ûgûkinya mûthia na ûtikooro wonekana kaîrî rî kana rî.”
Ûroria îgûrû rîa Sindoni
20 Mwathani aaria naani ambîîra, 21 “Mwana wa muntû, raitha bwa mbarî ya taûni ya Sindoni, ûmîrorerie 22 na uuge, ûûgû i bu Mwathani Mwene Inya akuuga,
ndî na ûthû naawe Sindoni,
na ngaakumua n'ûntû bwaku.
Bakaamenya niû ndî Mwathani,
rîra ngaagûkaanûkia
na nkwonie ûtheru bwakwa.
23 Nkamûtûmîra mûrimo ûmûthûûku
na ntûme nthakame îîtîge njîraani ciake.
Bara baûragîîtwe bakaagwa gatîgatî gaake,
bathirîîtue na rûûyiû kuuma mbarî cionthe.
Rîru i rîo bakaamenya ndî Mwathani.
24 “Antû ba Isiraeri batiîgua barî na atûûri bakari ta mîgaa kana mîîgua îmîthongoku bara bakûbabûthîîria. Rîru i rîo bakaamenya i niû Mwathani Mwene Inya. 25 Ûûgû i bu Mwathani Mwene Inya akuuga. Ndeethîrania antû ba Isiraeri kuuma mîgongooni îra banyagaarîîtue, nkoonania ûtheru bwakwa meethooni ma mîgongo. Rîru bagaatûûra nthîgûrû yao, îra ndaanenkeere mûruti ngûgî wakwa Njakubu. 26 Bagaatûûra ku mayîîga na bagaaka nyomba na baande mînda ya mîcabiibû. Bagaatûûra mayîîga ndaakaanûkia atûûri bonthe bara bababûthagîîria. Rîru bakaamenya i niû Mwathani Ngai wao.”