Rwîmbo rwa kîrîro rwa Turo
27
1 Mwathani aaria naani ambîîra, 2 “Mwana wa muntû, inîra Turo rwîmbo rûrû rwa kîrîro, 3 taûni îra îrî mûthûngîîrooni wa îria, îra îrutaga biacaara na mîgongo îmiingî ya îkumbo, ûbeere, Mwathani Mwene Inya ariuga,Woû Turo, ûrîîkumia
ûkiugaga, ‘Ndî ûmûthongi mûno.’
4 Mûciî waku ûrî îriani ndeeni.
Aaki baaku bakûrûthîîte ta meeri îthongi mûno.
5 Aaki baaku baatûmîîre mîtî ya mîtarakwa kuuma Seniri.
Baathûkiirie mîthithinda kuuma Rebanoni
gûkûthondekera gîtugî.
6 Baathûkiirie mîtî ya mîpuru kuuma Mbasani,
bakûrûthîra mîîko ya meeri,
na bakûrûthîra gîkunîki gîaku woû meeri na mîthithinda îgemeetue na mîguongo.
7 Gatani înthongi îngemie kuuma Miisiri n'yo wogagîîrwa kaingo ûtiindîkwa i ruuo ûthi,
na n'yo yaatûmaga ûmenyekanîra kûûraaya.
Mûgunye waku warûthîîtwe na gatani inthongi ya mburuu na ûkûyû kuuma makumbo ma Erisaa.
8 Atea bara baakûthiithagia na mîîko baarî ba kuuma Sindoni na Aribandi,
na antû baaku woû Turo i bo baakûrûngamîîrîîte meeri.
9 Akûrû baûgî ba kuuma Ngebari na atea baao baarî naawe, na i bo baingaga irumu bia meeri.
Meeri cionthe cia îria na athiithia baacio warî nacio,
kaingo bariinga biacaara naabi.
10 “Antû ba Pasia, Rundi na Puti baarî njûûrîîni yaku ta acikaarî ba ndûa, baacuuragia rong'o na nkoobia kîrî wou, na bagatûma ûkagîa na mwago. 11 Antû ba Aribandi na Eresi baakaragia nthingo ciaku nteere cionthe, antû ba Ngamandi baarî ibayooni biaku. Baacuuragia rong'o ciao kûthiûrûkîîria nthingo ciaku bagatûma ûthongi bwaku bûkinyanîra. 12 Tarisisi yaringaga biacaara naawe n'ûntû bwa ûtonga bwaku bwa mîthemba yonthe. Baakûreaga into biaku na fetha, cuuma, tini, na Rendi. 13 Ngiriki, Tubari, na Meseki baaringire biacaara naawe, bagûkûûranîria into bia ûtonga bwaku na nkombo na rûthuku. 14 Bethi-Togarima baakûûranagia into biaku na mbaraathi cia kûruta ngûgî, mbaraathi cia ndûa na nyûmbû. 15 Antû ba kuuma Rundesi baariingaga biacaara naawe, nthî inyingî cia makumbo ciarî thoko ciaku. Baakûrîaga na mîguongo, na Mwengo. 16 Endomu yaringaga biacaara naawe n'ûntû bwa wingî bwaku bwa into. Baagûkûûranagîria into biaku na Emarandi, ûkûyû, wîra ingemie, gatani înthongi, kooro na Agate. 17 Njunda na nthî ya Isiraeri baariingaga biacaara naawe, baagûkûûranagîria into na ngano cia kuuma Minithi, nceituuni na nkûyû cia mbere, ûkî, maguta, na mbamu. 18 Ndamasiki yaringaga biacaara naawe n'ûntû bwa into biaku biingî na ûtonga bwaku bûûnene bagîkûreaga na ndibei ya kuuma Eroboni, na guaya ya kuuma Saara, 19 Andani na Angiriki bakuuma Usaro ibaagûraga into biaku. Baakûreaga na cuuma îmbûûmithie, tûnyamû twa kûnunkia irio bwega na karamasi. 20 Ndendani yarûthaga biacaara ya nguo cia gûkarîrwa n'athiithia ba mbaraathi. 21 Arîbia na anene bonthe ba Kendari baarî abiacaara baaku, baakûreaga na ng'ondu, ntûrûme, na mbûri. 22 Abiacaara ba Seba na Raama baariingaga biacaara naawe, baakûûranagia into biaku na mîthemba yonthe ya tûnyamû tûra tûnunkagia irio bwega, maiga ma goro na thaabu. 23 Arani, Kane, Endeni, na ariingi biacaara ba Seba, Asîîria na Kirimadi baariingaga biacaara naawe. 24 Baba baariingaga naawe biacaara ya nguo cia kûthuura, nguo cia mburuu na wîra ya kûgemia, na kapeti i mbake rangi, ciogwa na mîkanda na ciamenyeerwa, na bibi i bio baakûreaga nabio. 25 Meeri cia Tarisisi i cio ciakamataga into bia biacaara ciaku. Kwoogu, waûyûrîîtie mûno gûku ûrî gatîgatî ka îria. 26 Athiithia beenu bakûbûreeta mariani mara manene. Ruuo rwa uumîîro bwa riûa rûkûbûthûûkîria meeri gatîgatî ka îria. 27 Ûtonga bwenu, into bienu, na into bia biacaara, akaria ba meeri na athiithia beenu, athiingi ba marumu ma meeri beenu, eendia bara beendagia into bienu bia biacaara, na antû beenu bonthe ba ndûa bara bûrî nabo, na antû bonthe bara bûrî nabo gatîgatî keenu, bikoorokera ndeeni ya îria ntugû ya kûthirua waku. 28 N'ûntû bwa kayû ga kîrîro gîa antû bara barî meeriini, nteere cia nthî ikainaina. 29 Bara bonthe bathiithagia meeri na mîîko bagaatiganîria meeri ciao. Antû ba meeri bonthe na athiithia baacio bakaarûngama rûteere rwa îria 30 baminûke n'ûntû bwaku, na barîre na ûrûrû mûno. Bakeegerera tîîri biongo na bagaragare muuni. 31 Bakeenja biongo biao n'ûntû bwaku, na beekîre nguo cia makunia. Bakaaminûka barî na ûrûrû bwa nkoro, na barîre na ûrûrû. 32 Kûminûkaani kwao bakaina rwîmbo rwa kîrîro n'ûntû bwaku bakiugaga, ‘N'ûû waro enyaangua ta Turo gatîgatî ka îria?’ 33 Rîra into biaku biayaga kuuma îriani, i bwabaithagia antû baingî, na gûkûrûkîîra ûtonga bwenu bûûnene na into bia biacaara i bwatongiirie anene ba nthîgûrû. 34 Îîndî i bwînyangîîtue n'îria, mborokerooni ya ndûûyî, into bienu bia biacaara na antû bonthe bara baarî meeriini baariama amwe naawe. 35 Antû bonthe bara batwîre makumbo ma îria i bamakîîte mûno i biû, na anene baao baamaka mûno, na moothiû maao maakûnjara. 36 Itonga bia biacaara bira birî antûûni i ka bikûbûnyûrûûnta. Bûgûkinya mûthia na bûtikooro bwonekana kaîrî rî kana rî.”