Ûroria îgûrû rîa Turo
26
1 Ntugû ya mbere ya mweri, mwanka wa îkûmi na ûmwe kuuma tûkûthaamua gwetû, Mwathani aaria naani ambîîra, 2 “Mwana wa muntû, taûni ya Turo nîgûkeneera kûgwa kwa Njerusaremu, îrîtheka îkiugaga, Njerusaremu taûni îra mîgongo îrakûrûkagîîra îkîringa biacaara, n'îroomorirwe! Tûgaatonga îîndî n'ûntû Njerusaremu îkwînyangua. 3 Kwoogu, ûûgû i bu Mwathani Mwene Inya akuuga: Îîndî nkaarûa naawe woû Turo. Ngakûretera mîgongo îmiingî îrûe naawe, nabo bakaaya ta makûmbî ma îria. 4 Bakomborania nthingo cia Turo na boomore ibayo biayo, ngaakûmîîria mûthetu wayo na mmîtuîkithie rwara rwa iiga. 5 Turo igaatuîka bantû a gûtaandîkaga neeti Îriani, n'ûntû i niû Mwathani Mwene Inya nkuuga. Îgaataîgwa i mîgongo, 6 na antû ba ntûûra ciayo ira irî akubî na îriaa bakaathirua na rûûyiû. Rîru i rîo bûkaamenya i niû Mwathani.7 “N'ûntû ûûgû i bu Mwathani Mwene Inya akuuga. Kuuma mbarî ya neegûrû nkaareeta Nebukandinesa mûnene wa Mbabironi, mûnene ûra mûnene kîrî bara bangî, arî na mbaraathi na nkaarî, na athiithia ba mbaraathi na njûûrî ciake inene. 8 Akaathiria antû ba ntûûra ciaku ira irî akubî na îria na rûûyiû, acooke aake nthingo cia gûgûcîgîîria, aûyûrie kîthûmba kîa mûthetu nthingooni ciaku na akwithûkîre aûkîîrîîtie rong'o ciake. 9 Akaagaiga into biake bia kwomora mbere ya nthingo ciaku na oomore ibayo biaku na mathaga maake ma ndûa. 10 Mbaraathi ciake inyiingî mûno igagûkunîkîra na tîîri yacio. Nthingo ciaku ikainaina n'ûntû bwa gîtuma kîa mbaraathi, nkaarî cia ndûa na nyûmbû rîra ûkeegua akîthûûngîra mwîrîgaani waku ta bûra antû bathûngagîra taûni gûkûrûkîîra kîrumuuni. 11 Ncûûga cia mbaraathi ciake igaakinyaanga njîra ciaku cionthe, akaûraga antû baaku na rûûyiû, na itugî biaku bira birî na inya abigwîthie nthîgûrû. 12 Bakaathûkia ûtonga bwaku na batae into biaku bia biacaara yaku, bakoomora nthingo ciaku na beenyangie nyomba ciaku inthongi na bate matigari ma into bira wakîîte nabio, maiga maaku, mbaaû na marebûrû ma into bira wakîîte nabio nyomba Îriani. 13 Ngaakiria nyîmbo ciaku, na nyîmbo cia wandîndî cia ndigi inyingî ciaku itiîguîka kaîrî. 14 Ngagûtuîkithia rwara rwa iiga, ara ategi bagaatandîkaga neeti. Ûtiakwa kaîrî, n'ûntû i niû Mwathani nkwaria, i bu Mwathani Mwene Inya akuuga.
15 “Ûûgû i bu Mwathani Mwene Inya akuuga îgûrû rîa Turo, antû bara batwîre akubî na îria bakainaina beegua gîtuma gîa kûgwa gwaku na kîrîro kîa ûrûrû na gîa antû bakîûragwa gatîgatîîni keenu. 16 Anene bonthe bara barî rûteere rwa îria bakauma itîîni biao bia ûnene na barute nguo ciao inthongi. Bagaakara nthîgûrû bakiinainaga n'ûguaya bamakîîte n'ûntû bwa mantû mara ûkeegua ûkûrûkîîrîîte. 17 Rîru bagakwinîra rwîmbo rûrû rwa kîeba.
N'ata wînyangîîtue, woû taûni îrî îgweta,
woû warî na inya îriani,
woû amwe na antû baaku,
waretera antû bonthe ûguaya!
18 Îîndî nthîgûrû ira irî îkumbo rîa îria ikainaina
ntugû ya kûgwa gwaku.
Icîgîîria bia îria
bikaamaka n'ûntû bwa kwînyangua gwaku.
19 “Ûûgû i bu Mwathani Mwene Inya akuuga, rîra ngaatuîkithia taûni ya Turo îganjo, ta taûni îtarî na antû, na rîra ngaakûretera rûûyî rwa mborokero cia îria îgûrû rîaku, na rûûyî rwingî rûgûkunîkîre, 20 rîru ngakwîndamia amwe na bara ûkeegua beendamîîte mûrinyaani, ntûme ûthi kîrî antû bara baatûûraga karaaya. Ngaatûma ûtûûre mbarî ya ruungu ya nthîgûrû, bantû ara kwarî îganjo kuuma karaaya, amwe na bara beendamîîte îrinyaani na ûtiicooka kana wîgua ûrî na kaanya nthîgûrû cia bara barî mwoyo. 21 Ngagûtuîkithia gîntû gîa kûmakania, na ûtiîgua ûrî oogo kaîrî. Ûgaacwîwa na ûtionekana kaîrî, i bu Mwathani Mwene Inya akuuga.”