Ûroria îgûrû rîa Amoni
25
1 Mwathani aaria naani ambîîra, 2 “Mwana wa muntû, raitha bwa mbarî ya nthîgûrû ya Amoni na ûrorie îgûrû rîayo. 3 Îra antû ba Amoni ûûgû, ‘Îguani kiugo kîa Mwathani.’ Ûûgû i bu Mwathani Mwene Inya akuuga n'ûntû i bwathekaga bwona Nyomba ya Ngai îgîakwa mûgiro, na nthîgûrû ya Isiraeri îkîînyangua, na bwathekeera antû ba Njunda bathiîte ûkombooni, 4 kwoogu nthiîte kûbûnenkanîra kîrî antû ba mbarî ya uumîîro bwa riûa bûtuîke baao. Bakaamba marema maao na barûthe gîkaro kîao nthîgûrû yenu. Bakaarîa matunda meenu na banyue îria rîenu. 5 Ngaatuîkithia taûni ya Rabaa bantû a kûrîîthagua nkamîîra na Amoni bantû a kûnogokaga ng'ondu. Rîru i rîo bûkaamenya i niû Mwathani. 6 N'ûntû ûûgû i bu Mwathani Mwene Inya akuuga, n'ûntû i bwaringire mpî bûgîtûûbaga i gîkeno n'ûntû bwa ûthûûku bwa nkoro n'ûntû bwa mantû maathûûku mara maakarîkire îgûrû ya nthîgûrû ya Isiraeri, 7 ngaataambûrûkia njara yaakwa îgûrû rîenu na mbûnenkanîre kîrî mîgongo îîngî. Nkabûrutaruta oogo bwîgue bûtirî mûgongo kaîrî kana nthîgûrû kaîrî na mbûthirie. Rîru i rîo bûkaamenya i nîû Mwathani.”Ûroria îgûrû rîa Moabu
8 Ûûgû i bu Mwathani Mwene Inya akuuga, “N'ûntû Moabu na Seirib baugaga antû ba Njunda i bûmwe na mîgongo yonthe, 9 kwoogu ngaatûma taûni ira irigîîrîîtie mîanka ya Moabu ciînyangua. Taûni ira nthongi cia Bethi-Njesimothi, Mbaari-Meoni na Kiriathaimu. 10 Nkaanenkanîra Moabu amwe na nthîgûrû ya Amoni kîrî antû ba uumîîro bwa riûa, kaingo antû ba Amoni bataririkanwa gatîgatî ka mîgongo. 11 Na ngaakaanûkia Moabu. Rîru bakaamenya i niû Mwathani.”
Ûroria îgûrû rîa Endomu
12 Ûûgû i bu Mwathani Mwene Inya akuuga, “N'ûntû antû ba Endomu i beerîîrîîtie nyomba ya Njunda na barî na mabîtia mûno n'ûntû bwa kûrûtha ûgu, 13 Mwathani Mwene Inya ariuga, ngaatambûrûkia njara yaakwa îgûrû rîa nthîgûrû ya Endomu na mbûrage antû na nyamû ciao. Nkamîtuîkithia gîntû gîtarî na gîtûmi, na kuuma taûni ya Temani mwanka taûni ya Ndendani antû bakaûragwa na rûûyiû. 14 Ngaatûma antû baakwa ba Isiraeri baandîîrie kîrî Endomu, nabo bakaarûtha mantû kûringana na marûrû na mûthûûro wakwa. Rîru i rîo bakaamenya bûra ndîagia. I bu Mwathani Mwene Inya akuuga.”
Ûroria îgûrû rîa Firisitia
15 Ûûgû i bu Mwathani Mwene Inya akuuga, “N'ûntû Afirisiti ibarwîte na antû ba Njunda kaingo beerîîria kûrû na babathiria n'ûntû bwa bûra batwîre babameneete, 16 Mwathani Mwene Inya ariuga, ndî akubî gûtaambûrûkia njara yaakwa îgûrû rîa Afirisiti, na nthirie antû ba Kerethic na bara batigarîîte mbarî ya îkumbo rîa îria. 17 Nkaarîia nainya mbakaanûkie na mûthûûro wakwa. Rîru bakaamenya i niû Mwathani woona ndaîrîîria.”