Ngerekano ya nyûngû ya kûruga
24
1 Ntugû ya îkûmi, mweri wa îkûmi, mwanka wa kenda, kiugo kîa Mwathani kîambûyîîra, 2 “Mwana wa muntû, andîka tarîki cia ntugû ya îmunthî, n'ûntû îmunthî i ntugû îra mûnene wa Mbabironi aanjîîrîîtie kwithûkîra Njerusaremu. 3 Îra antû baba baremu ngerekano îno ûbeere, ûûgû i bu Mwathani Mwene Inya akuuga,‘Tega nyûngû mwankiini
îkîra rûûyî ku,
4 îkîra inuku bia nyama ndeeni,
inuku bithuure ta kûgûrû na ituro.
Ûyûrîîria na mîîndî îra mîega mûno,
5 thûkia nyama înthongi ya ng'ondu
banga nkû ruungu rwa nyûngû.
Eteera îtherûke
na ûtherûkie kinya mîîndî.’
6 Ûûgû i bu Mwathani Mwene Inya akuuga:
Taûni îra îîtûraga nthakame îkoona thîîna.
Îkari ta nyûngû îrî na nganka
îra îtaûmba kûthera!
Ruta cionthe kînuku gwa kînuku
ûtagûtaara.
7 I kwîthîrwa nthakame îra eetûûrire wa nendî îrî gatîgatî gaake,
aamîtûûraga rwaraani rûûtheri,
ataamîîtûûraga nthîgûrû,
ara tîîri îkîmîkunîkîra.
8 Kaingo marûrû maûkua na kûrîua
nthakame yake mîgaigîîte rwaraani rûûtheri,
kaingo îtakunîkîrwa.
9 Kwoogu, ûûgû i bu Mwathani Mwene Inya akuuga:
Ûkoona thîîna woû taûni îra îtûûraga nthakame!
Wana niû nkaûmba mûrigo wa nkû.
10 Kwoogu, îkîra nkû inyiingî
na ûbue mwanki.
Ruga nyama bwega,
ûkiunganagia na tûnyamû tûra tûnunkagia irio bwega,
na ûruge mwanka mîîndî îrûngûre.
11 Ûcooke ûtege nyûngû înu ntheri makaraani
mwanka îbîe îtuunîe tunî
kaingo rûko rwayo rûkanjûka
na ngaanka ciayo i bîîthua.
12 Îndî i kwînogia mana,
ngaanka ciayo indito itirarutwa
wana mwanki ûtigûciruta.
13 Îndî, ûmaramari bwaku i bûgwakîîte rûko.
N'ûntû ngereetie gûkûthambia îndî ûtithera kuumania na rûko rwaku,
ûtiithera kaîrî mwanka rîra ngeetûûra mûthûûro wakwa unthe îgûrû rîenu.
14 “I niû Mwathani ndaaria. Kagiita gagûkinya gaakwa ga kûrûtha. Ntiicûûba nyuma, ntiîgua kîao kana ngarûra mathûgaania maakwa. Ngakûgiitîra îgamba kûringana na mîkarîre na mîtugo yaku, i bu Mwathani Mwene Inya akuuga.”
Mwekûrû wa Esekieri aakua
15 Mwathani aaria naani ambîîra, 16 “Mwana wa muntû, kwa îringa rîmwe, ndî akubî kûthûkia mwekûrû waku, kîra gîkenagia meetho maaku. Îndî ûtikoonanie kîeba kana ûrîra kana wîtûûra meethori. 17 Kayagîra ndeeni mpoora, ûtikaarîrîre ûra akuîte. Oga kîremba gîaku, na wîkîre iraatû biaku, ûtigeekunîkîre ûthiû bwaku kana ûrîa irio bia bara bakûrîra.”
18 Kwoogu, ndaarîria antû rûkîîrî na ûgoro mwekûrû wakwa aakua. Rûûni rûkîîrî ndaarûtha wa ta bûra ndaathîîtwe.
19 Antû bambûûria, “Ûntû bûbû ûkûrûtha bûrîonania ata?”
20 Ndabeera, “Kiugo kîa Mwathani kîambûyîîre gîkiugaga, 21 ‘Îra antû ba Isiraeri, ûûgû i bu Mwathani Mwene Inya akuuga: Ngeekîra bantû aatheru aakwa mûgiro,a ara bwîkumagîria, kîra meetho meenu makenagîîra. Aana bara bwatigire nyuma bakaûragwa na rûûyiû. 22 Naabi bûkaarûtha wa ta bûra ndaarûthire, bûtiikunîka mîromo yenu, kana bûrîa irio bia antû bara barî na kîeba. 23 Bûkooga iremba bienu biongo na bwîkîre iraatû magûrû. Bûtikoonanie kîeba kana bûrîra îndî bûgaaceng'a n'ûntû bwa meeyia meenu na bûgaakayanagîra. 24 Esekieri akeegua arî kîoneeria kîrî biû, bûkaarûtha wa ta bûra aarûthire. Ûntû bûbû bwakarîka, i rîo bûkaamenya niû ndî Mwathani Mwene Inya.’ ”
25 Mwathani ambîîra, “Mwana wa muntû, ntugû îra nkaarutaruta wîbithob bwao oogo, gîkeno na ûkumio bwao, mawîrirîîria ma nkoro ciao na kîra gîkenagia meetho maao, na aana baao kinya bo nkabarutaruta oogo, 26 ntugû înu, ûra akaamonyoka akaaya gûkwîra bûra gwakarîka. 27 Ntugû înu, kanyua gaaku gakaarugûka, ûkaaria n'we na ûtiitiga kwaria kaîrî. Kwoogu ûkeegua ûrî kîoneeria kîrî antû baba, na bakaamenya niû ndî Mwathani.”