Ûthûngîîri bwa aarî baîrî
23
1 Mwathani aaria naani ambîîra. 2 “Mwana wa muntû i kwarî na aarî baîrî bagina ûmwe. 3 Baatuîkîîre marwaya Miisiri. Barî nthîgûrû înu i baatongagwa i bara na bagaataatwa nyonto. 4 Mwarî ûra mûkûrû eetagwa Oora,a na mwaragina aarî Ooriba.b Ndaabagûrire, banciarîra nthaka na aarî. Ndîaria îgûrû rîa Samaria na Njerusaremu, n'ûntû Oora i Samaria na Ooriba Njerusaremu.”5 Oora aanjîîrie ûmaraaya wa arî mwekûrû wakwa, na aatua kwîrirîria anyaanya baake acikaarî ba Asîîria. 6 Beekîrîîte nguo inthongi cia mburuu, mangabana na anene ba acikaarî, bonthe baarî nthaka inthongi, na athiithia ba mbaraathi. 7 Oora aarûthire ûmaraaya na atongoria bonthe bara baarî îgweta ba Asîîria, na eegwatithia mûgiro na njîra ya kûgonga ngai cia mîbuanaano cionthe cia antû bara aamaramaraga nabo. 8 Aathiire na mbere na ûmaraaya bûra aanjîîrîîtie Miisiri, n'ûntû kagiita ka ûnyi bwake arûme baamaamire nwe na bamwataata nyonto bamûtûmîra ta îrwaya.
9 Kwoogu, ndamûnenkanîra kîrî anyaanya baake Asîîria, bara eeriragîria mûno. 10 Baamûrutire nguo, bamûûraga na baakamata aana baake ta nkombo ciao. Riîtwa rîake rîamenyekanire i mwekûrû wonthe wa nthîgûrû înu ta mwîyia ûra aagwatire îkaanûkia rîra abatîîrue.
11 Wana nyuma ya mwaragina Ooriba kwona mama monthe, wîrirîîria bwake na ûmaraaya bwake bwakûrûka bwa mwaragina na atuîka mûmaramari ûmûthûûku nkûrûki ya mwaragina. 12 Neeriragîria antû ba Asîîria kinya mangabana na anene ba acikaarî beekîrîîte nguo cia wîra na bonthe baarî nthaka inthongi, na athiithia ba mbaraathi. 13 Ndoona wana we aarî akwîbaka rûko bonthe baathi njîra îmwe.
14 “Îndî aatororeria na ûmaraaya bwake. Oona mbica cia antû ba Karindea ira ciacooreetwe nthingooni, ciakîîtwe rangi întuune, 15 irî na mîcibi kauna, na iremba biongo biao, bonthe baakari ta athiithia ba mbaraathi ba Mbabironi atûûri ba Karindea. 16 Agûciona, eerirîria bo, aatûma atûmwa kîrî bo baathi Karindea. 17 Rîru antû arûme babu ba Mbabironi baaya kîrî we, baamaama n'we na bamûgwatithia mûgiro. Bakûmûgwatithia mûgiro, eebathûra kuuma kîrî bo i mariiri. 18 Akûthi na mbere na ûmaraaya atakwitha na ûtheri bwake bûkîonagwa, ndamûtiganîria i mariiri wa ta bûra ndaatiganîîrie mwaragina. 19 Amwe na ûgu aathi na mbere gûtororeria ûmaraaya bwake wa ta bûra aarûthaga kagiita ka wîthî bwake, rîra aarî îrwaya Miisiri. 20 Neeriragîria mûno kûmaama na anyaanya baake bara baarî na icuncî bia ûciari bigana bia îng'ooi na bara beetûûraga mbeû ya ûciari ta ya mbaraathi. 21 Na eerirîîria kagiita ka wîthî bwake rîra aarî îrwaya Miisiri, naara Amiisiri baataataga nyonto ciake na bakamaama nwe.”
22 Kwoogu, Ooriba, ûûgû i bu Mwathani Mwene Inya akuuga, “Ngaatûma anyaanya baaku bara waatiganîîrie i mariiri bakwithûkîre, nkabareeta bakwithûkîre kuuma mbarî cionthe. 23 Antû arûme ba Mbabironi, na ba Karindea bonthe, Pekondi, Soa na Koa, amwe na antû ba Asîîria bonthe, nthaka inthongi, bonthe mangabana na atongoria, athiithia ba nkaarî cia mbaraathi na antû ba gîtîîyo, bonthe batwete mbaraathi. 24 Bagakuumîîra na mathaga ma ndûa, na nkaarî cia ndûa na cia mîrigo, batongorereetie gîkundi kîînene gîa antû. Bagagûcîgîîria mbarî cionthe barî na rong'o inene na i niini na nkoobia cia cuuma. Nkabaneenkera inya ya gûgûkaanûkia, na bagagûkaanûkia kûringana na mawatho maao. 25 Nkoonania mûthûûro wakwa kîrî woû, na bagakûrûtha mantû ma mûthûûro. Bagakûgiita nyiûrû na matû, na antû baaku bara bagaatigara bakaûragwa na rûûyiû. Bakaathûkia aana baaku ba aarî na nthaka, na antû baaku bara bagaatigara bakaabîîthua na mwanki. 26 Bagakûruta nguo ciaku na bagûtuunye into biaku bia kwîgemia. 27 Kwoogu, nkaathiria ûmaramari na ûmaraaya bûra wanjîîrie Miisiri. Ûtiiraitha mîbuanaano nwa îrîkû kana ûthûgaanîria nthîgûrû ya Miisiri kaîrî.
28 “N'ûntû ûûgû i bu Mwathani Mwene Inya akuuga, ndî akubî gûkûnenkanîra kîrî bara ûthwîre, kîrî bara watiganîîrie i mariiri. 29 N'ûntû bwa bûra bakûthwîre, bagagûtuunya bionthe bira ûrutîrîîte ngûgî. Bagagûtiga ûrî ûtheri ûtarî na nguo, na nthoni cia ûmaraaya bwaku bwanîkwe. Ûmaramari bwaku na ûmaraaya bwaku 30 bûgûkûreetera mama monthe, n'ûntû n'ûringîîte ûmaraaya na mîgongo yonthe na wegwatithia mûgiro na ngai ciao cia mîbuanaano. 31 Wathingatire makinya ma mwaranyûkwe, na kwoogu ngakûnenkera gîkombe wa kîra gîa îkaanûkia.”
32 Ûûgû i bu Mwathani Mwene Inya akuuga,
“Ûkaanyuîra gîkombeeni kîa mwaranyûkwe,
gîkombe kîînene na kîrî na ûriku.
Antû bagakûthekeera na bagakûnyûrûnta,
n'ûntû gîkombe i kîûyûri mûno.
33 Gîkombe kîa mwaranyûkwe Samaria i gîkombe gîa kûthirua na kwînyangua.
Gîgagûtogoonia na gîkûreetere kwîthikîîra kûûnene mûno;
34 ûgaakînyua na ûkîthirie kûrû,
na ûgaakîthithira kîng'enyûkange tûng'enyûrû
na ûtembûrange nyonto ciaku natu. I niû Mwathani Mwene Inya ndaaria.”
35 “Kwoogu, ûûgû i bu Mwathani Mwene Inya akuuga, n'ûntû n'ûndiganîrîîtue na wambûndûkîria mûgongo, ûkaagwata îkaanûkia rîa ûmaramari na ûmaraaya bwaku.”
36 Mwathani ambîîra, “Mwana wa muntû, ûkaagiitîra Oora, na Ooriba îgamba? Beere mantû ma mîtugo îrî mûgiro mara barûthîîte, 37 n'ûntû i barûthîîte ûthûngîîri na kûûragana. Baarûthire ûthûngîîri na ngai ciao cia mîbuanaano, wana kinya kûruta aana baao bara banciarîrîîte barî igongwana. 38 T'ûûgu bunka! I bagwatithîîtie Nyomba ya Ngai mûgiro na baarega gûtîîya Sabatû ciakwa. 39 Ntugû îra yongwa baarutire aana baao igongwana kîrî ngai ciao cia mîbuanaano, baathûngîîre nyomba yaakwa întheru na kûmîaka mûgiro. Ûgu i bu baarûthire nyomba yakwa.”
40 Wana i baatûmire atûmwa beeta antû bara baumîîte kûraaya, na bagûkinya, aarî babu barî baîrî baathaamba n'ûntû bwao, beegemia meetho na beekîra into biao bia kwîgemia. 41 Baacooka bwakara nabo ûrîrî bwarî bûûthoongi, na meetha îrî mbere yenu îrî na maguta ma mîceituuni na macoco maakwa.
42 “Na kweguîka gîtuma gîa gîkundi gîa antû bataamakaga n'ûntû nwa bûrîku, gîkundi kîa maruruuthi ma areebi kîra kîareetirwe kuuma rwanda, na beekîra mwekûrû ûyu na mwaragina mbangiri njara na nthûmbî inthongi biongo biao. 43 Ndaacooka ndauga îgûrû rîa ûra aarî akwînyangua n'ûthûngîîri, ‘Bakaathi na mbere kûmaramara nwe, nwe amaramare nabo?’ 44 Na baamaama nabo. Wa ta bûra antû bamaamaga na marwaya, nwa ta bu baamaamire na Oora na Ooriba, bara baarî aka baamaramaru. 45 Îndî antû bara baagîru bakabanenkera îkaanûkia rîa eekûrû bara athûngîîri na aûragani, n'ûntû bo n'athûngîîri na aûragani.”
46 Ûûgû i bu Mwathani Mwene Inya akuuga, “Reteeni gîkundi gîa antû kîînene kîbaithûkîre kîbamakie na kîbaiye into biao. 47 Gîkundi gîku gîa antû gîkabaringa na maiga, kîbaithûkîre na kîbatemange na ndûûyiû na kîûrage aana baao na babîîthie nyomba ciao.