Meeyia ma Njerusaremu
22
1 Mwathani aaria naani ambîîra, 2 “Mwana wa muntû, ûkaagambithia? Ûkaagambithia taûni îno ya ûûragani? Mûmenyithie mîkarîre yake îrî njici yonthe 3 na ûmwîre, ûûgû i bu Mwathani Mwene Inya akuuga: Woû ûrî taûni îra yûûragaga antû baayo yongwa na kwîbîkîra mûgiro na kûrûtha ngai cia mîbuanaano, kwoogu îgiita rîaku rîa gûkaanûkua rîrî akubî. 4 Ûrî na mabîtia kuumania na nthakame îra gwîtûûrîîte na wekîrwa mûgiro i mîbuanaano îra ûrûthîîte. Kwoogu, kagiita gaaku ga îkaanûkia karî akubî na ntugû ciaku cia mûthia i gûkinya. Kwoogu, ngagûtuîkithia gîntû gîa kûbûthîîrua i mîgongo na kûthekeerwa i nthîgûrû cionthe. 5 Bara barî akubî na bara barî kûraaya bagakûthekeera. Wînenkereete nkuma înthûûku yûûyûrîîte kînyamaara.6 “Atongoria bonthe ba Isiraeri bara barî gwaku batûmagîra inya yao naaî kûûragana. 7 Gwaku, beethe na bagina ba antû ka babûthagîîrua, mûgeni ga atuunyagwa into biake, twana tûkîa na ntigwa bakanyamaarua. 8 I bûbûthîîtie into biakwa biitheru na bûtiathîkagîra ntugû ciakwa cia Sabatû. 9 Gatîgatî keenu kûrî na antû baaragia ûrongo. Gatîgatî keenu kûrî na antû baûraganaga, barîîyaga irio bira birutîrîîtwe ngai cia ûrongo irîmaani, na bakaruta ngûgî cia ûmaramari. 10 Kûrî bamaamaga na eekûrû ba beethe na gûkaîrîîria eekûrû kûmaama nabo kagiita kara mwekûrû arî na nyambura ciake. 11 Gatîgatî keenu kûrî na arûme bara barûthaga mantû marî njici na eekûrû ba atûûri baao, bangî bakarûtha ûntû bwa îgi bakamaama na aka ba aana baao, na bangî bakagwata aaragina kîa inya. 12 Mwathani Mwene Inya ariuga, gatîgatîîni keenu kûrî na antû barîagwa kaingo baûragana. Bûkoobithanagia mbia kaingo bûrîwa na maciaro na bûkeenda kwona baita înene, bûkîenda kûgîta na njîra ya kwenia atûûri beenu. Na bwandiganîrua. 13 Nkûnjîîte nkundi yakwa n'ûntû bwa baita înu ûkûgwata na njîra îtarî ya mma na nthakame înu bwîtûûrîîte gatîgatî gaaku. 14 Nkoro yaku ûkeegua îrî na kûûmîîria kana njara ciaku wîgua irî na inya, ntugû îra nkoonana naawe? Niû Mwathani nkwaria, na nkaarûtha ûgu ndauga. 15 Nkabûnyagaaria gatîgatî ka mîgongo na ka nthîgûrû, na nthirie mûgiro ûra ûrî ndeeni yaku. 16 Rîra ûkeebira îgi mbere ya mîgongo, i rîo ûkaamenya atî i niû Mwathani.”
17 Rîru Mwathani ambarîria ambîîra, 18 “Mwana wa muntû, antû ba Isiraeri bakari ta rûko kîrî niû. Bonthe bakari ta rûko rwa cuuma ya rûthuku, îbaati, îthaga na cuuma îra îrûthaga mbûrûbûrû rûra rûtigaraga mwankiini rîra fetha îgûkembûrwa. 19 Kwoogu, ûûgû i bu Mwathani Mwene Inya akuuga, n'ûntû bwinthe bûtuîkîîte rûko, nkabwîthîrania bwinthe Njerusaremu. 20 Wa ta bûra muntû eethîranagia fetha, cuuma ya rûthuku, îbaati, îthaga kana cuuma îra îrûthaga mbûrûbûrû ageekîra mwankiini, kaingo ikembûrwa, nwa ta bu nkaabwîthîrania na mûthûûro wakwa mbûkembûre. 21 Nkabwîthîrania, na mbûbuîrîîre na mwanki wa mûthûûro wakwa, naabi bûkanjûke bûrî naagu ndeeni ya taûni. 22 Wa ta bûra fetha îkaanjûkaga îrî riiko, nwa ta bu bûgaakaanjûkîra taûniini înu, na i rîo bûkaamenya atî niû Ngai ngwîtûûra mûthûûro wakwa kîrî biû.”
23 Mwathani ambarîria kaîrî auga, 24 “Mwana wa muntû, îra antû ba Isiraeri: Biû bûrî nthîgûrû îra îtoorotherua kana yuurîrwa i mbura ntugû ya mûthûûro wakwa. 25 Atongoria baayoa bakari ta cimba îkîruruma îgîteembûraanga nyamû. Baûragaga antû, bagatuunya antû ûtonga na into biao bia goro, na kwongeera wingî bwa ntigwa taûni. 26 Athînjîri baayo ba Ngai i baunîîte mawatho maakwa na beekîra into biakwa biitheru mûgiro. Kîrî bo, batiathûranaga into biitheru na bitarî bitheru na batirutanaga antû mwanya wa mantû maatheru na mara matarî matheru. Babûthagîîria ntugû ciakwa cia Sabatû kaingo riîtwa rîakwa rîîtheru rîtatîîywa gatîgatî kaao. 27 Atongoria baayo bakari ta ncûûgi, ira itembûraangaga nyamû, beetûûraga nthakame na kûûraga antû kaingo boona baita na njîra îra îtaagîrîîte. 28 Iroria biayo birîkunîkîra meeyia mama na njîra ya bioneki na kûringia kwa ûrongo. Baugaga, ‘Ûûgû i bu Mwathani Mwene Inya akuuga’ rîra Mwathani ataarîîtie kinya mûgambo nwa ûmwe. 29 Antû ba nthîgûrû înu barî na ûgîti na ûtuunyani, bainyagîîria nkîa na bara barî na ûbatu na bakathîînia ageni, batakûbarûthîra ûmma.