Rûûyiû rwa Mwathani rwa kûgiita îgamba
21
1 Mwathani aaria naani ambîîra, 2 “Mwana wa muntû, raitha mbarî ya Njerusaremu, ûtûmîîrie îgûrû rîa Nyomba ya Ngai. Roria îgûrû rîa nthîgûrû ya Isiraeri. 3 Na ûmîîre, ‘Mwathani Mwene Inya ariuga ûûgû, ndî mûnthû waku, woû Isiraeri. Ngaakûûra rûûyiû rwakwa kuuma njûraani na mbûrage antû bonthe, beega na baathûûku. 4 Îî, nkaûraga bara beega na bara bathûûku! Ngaacomora rûûyiû rwakwa mbithûkîre antû bonthe nthîgûrû înu kuuma mbarî ya naiti mwanka ya neegûrû. 5 Rîru i rîo antû bakaamenya atî niû Mwathani ngûkûûra rûûyiû rwakwa kuuma njûraani, na ntirûcookia kaîrî.’6 “Kwoogu, îîndî mwana wa muntû kaya! Kaya mbere yao na kîeba kînene. 7 Na bakûûria, ‘I mbi n'ûntû ûgûkaya?’ Ûbeere, ‘N'ûntû bwa ntheto ira ciiyîîte. Wa îra nkoro îgaatemûka n'ûntû bwa ûguaya na wa kîra njara îthire inya, muntû wonthe agirîke, na maru marigooye makare ta marî na rûûyî.’ Mwathani Mwene Inya ariuga, ‘N'îyîîte! Îrî njîraani.’ ”
‘Rûûyiû, îî rûûyiû,
rûûnoore na rûûtenderie.
10 Rûnooreetwe rwa kûthînja,
Rûûtenderie rûkwenia ta rweni!’
“Tûgaakûngwîra na twîgwatie mûraagi wa wathani wa mwana wakwa mûnene wa Njunda? Rûûyiû rûkaabûthia mûraagi wa mwana wakwa, wa ta bûra rûbûthagia woora mûtî. 11 Rûûyiû îîndî ka rûkûnoorwa na gûtenderua, mûûragani arugwate na njara.
12 Rîra nainya na ûkaye woû Mwana wa muntû,
n'ûntû rûûyiû rûrû rûkeegua rûrî îgûrû rîa antû baakwa,
na îgûrû rîa atongoria ba Isiraeri bonthe.
Bakaûragwa na rûûyiû
amwe na antû baakwa.
Kwoogu, ringaringa kîbara n'ûntû bwa kîeba.
13 “Mwathani Mwene Inya ariuga, ‘Na mma magerio makaaya. N'ata gûgaakarîka ûkaaya kwîgua mûraagi wa ûnene wa Njunda ûra rûûyiû rûbûthîîrîîtie ûkeegua ûtarî oogo?’a
14 Kwoogu, îîndî mwana wa muntû, roria
na ûringe mpî.
Tiga rûûyiû rûteme maita maîrî,
wana maita mathatû.
I rûûyiû rwa kûthînja,
rûûyiû rwa kûûragana kûûnene,
rûthiûrûkîîte mbarî cionthe.
15 Kwoogu, baingî bagaakua nkoro
na baingî bagwe,
mbaigîîte rûûyiû rwa kûthînja
mîîrîgaani yao yonthe.
Rûrîenia ta rweni,
rûgwetwe n'ûntû bwa kûthînja.
16 Woû rûûyiû, temangaga bwa mbarî ya ûrîo,
na bwa ûmotho,
wa naara mbarî ya ûûgî îgaacûûba.
17 Wana niû nkaaringa mpî,
na nthirie mûthûûro wakwa naabi.
I niû Mwathani nkwaria.”
18 Mwathani aaria naani ambîîra, 19 “Mwana wa muntû, îkîra njîra ciîrî rwano ara rûûyiû rwa mûnene wa Mbabironi rûgaakûrûkîîra. Njîra irî ciîrî cianjîîrie nthîgûrû îmwe. Wîkîre kîbaaû gîa kwonania naara taûni îrî ara njîra îra yuumîîte Mbabironi yaathûkanîrîîte maita maîrî. 20 Njîra îmwe îthiîte Amoni taûni ya Raba, na îra îîngî gîteere kîa Njunda, na taûni imbirigîre, Njerusaremu. 21 Mûnene wa Mbabironi îîndî arûngi makomanooni ma njîra inu irî ciîrî. Akainainia mîgwî na kûraitha îtema akîûria mîbuanaano yake njîra îra akaathi n'yo. 22 Mûgwî ûra warî bwa njara yake ya kîmotho wonanagia Njerusaremu. Rîru into bia kwomora nthingo bithuuranîrwe na mûnene arute watho bwa kwithûkîra na kwomoranga nthingo. Acikaarî bagîkururaga nkururo cia ndûa baige into bibu bia kwomoranga nthingo mîîrîgaani ya taûni. Bakaathiûrûkîîria taûni na ithûmba bia mûthetu na baake irîngo kûthiûrûûka taûni kaingo bamiithûkîra na bathûngîra ndeeni. 23 N'ûntû antû ba Njerusaremu batiîtîgia atî mûnene wa Mbabironi akaithûkîra taûni yao. Barîthûgaania gûtirî bu akaabarûthîra bûûthûûku n'ûntû i baanyuîte muuma bauga bakamwathîkîra îndî bakaagwatwa i mûnene wa Mbabironi na bakaaririkanua bataarî eetîgua kîrî we.
24 “Kwoogu, ûûgû i bu Mwathani Mwene Inya akuuga, ‘Bûkaraga bûkîîndirikanagia meeyia na mabîtia meenu. Wana bûtigeragia kûmaitha. Kîrî mantû monthe mara bûrûthaga, gûtirî we atoonaga meeyia meenu. Kwoogu îîndî kagiita keenu ga gûkaanûkua i gaakinyu.’
25 “Woû mûtongoria ûmûthûûku na wa ngukumo wa Isiraeri, kagiita gaaku gagûkinya, 26 ûûgû i bu Mwathani Mwene Inya akuuga. Ruta kîremba gîaku na nthûmbî yaku. Gûtiîthîrwa gûkari bûra gwakari. Bara barî nthî bagaûkîîrua na bara barî îgûrû bakeendamua. 27 Wînyangia! Wînyangia! Nkeenyangia taûni îno! Îndî bûbû bûtiikarîka mwanka rîra ûra wengwa abatîîrue kûgiita îgamba akaaya. Rîru i rîo nkaamûnenkera taûni înu.”
28 “Naawe mwana wa muntû, roria na uuge, ûûgû i bu Mwathani Mwene Inya akuuga îgûrû rîa Amoni na irumi biao,
‘Rûûyiû, rûûyiû,
rûcomoreetwe n'ûntû bwa kûûragana,
rûnooreetwe rwa kûthiria,
rûkîenagia ta rweni!
29 Ariingi biama beenu
na iroria bienu bia ûrongo
ibanenkanîrîîte bioneki bia ûrongo
na baaria ûrongo îgûrû rîa rûûyiû.
Îndî îîndî, rûûyiû rûru rûkabûgwîra
biû antû baathûûku
n'ûntû ntugû yenu ya îkaanûkia n'îkinyîîte.’
30 “Cookia rûûyiû njûraani. Nkabûgiitîra îgamba bantû ara waûmbîîrwe, nthîgûrû îra waciarîîrwe. 31 Nkabwîtûûrîria mûthûûro wakwa na mbûbebeere mwanki wa mûthûûro wakwa. Nkabûneenkanîra njaraani cia abitina bara barî waara bwa ûthûûkangia. 32 Ûkeegua ûrî nkû cia mwanki, na nthakame yaku îgeetîga nthîgûrû yaku woû mwene. Ûtiiririkanwa kaîrî n'ûntû i niû Mwathani nkwaria.”