Kûregana na watho kwa Aisiraeri
20
1 Kwarî ntugû ya îkûmi ya mweri wa îtaano mwanka wa mûgwanja rîra akûrû ba Isiraeri baayire kûromba Mwathani ûkûrû, baakara mbere yaakwa.2 Rîru kiugo kîa Mwathani kîambûyîîra, 3 “Mwana wa muntû, arîria akûrû ba Isiraeri na ûbeere, Ûûgû i bu Mwathani Mwene Inya akuuga, ‘Ka bwaaya kûndoomba ûkûrû? Wa ta bûra ntûûraga mwoyo, ntireka bûndomba ûkûrû, i bu Mwathani Mwene Inya akuuga.’
4 “Ûkabagiitîra îgamba, ûkabagiitîra îgamba mwana wa muntû? Bagiitîre îgamba ûbeere mantû mara marî njici booyûûe baao barûthîîte. 5 Beere Mwathani Mwene Inya ariuga ûûgû: Ntugû îra ndaathuurire Isiraeri, ndaathiîtîîrie rûrîîyo rwa Njakubu na ndeemenyithania kîrî bo nthîgûrû ya Miisiri. Ndabathiîtîria ndabeera, ‘Niû ndî Mwathani Ngai wenu.’ 6 Ntugû înu ndaabathiîtîîrie kûbaruta nthîgûrû ya Miisiri na kûbaira mwanka nthîgûrû îra ndaabathuurîîre, nthîgûrû yûûyûrîîte îria na ûkî na nthîgûrû înthongi kîrî nthîgûrû cionthe. 7 Ndabeera, ‘Woora ûmwe wa cienu nate mîbuanaano îrî njici îra araithaga îgûrû. Bûtikeebake rûko na mîbuanaano ya Miisiri. Niû ndî Mwathani Ngai wenu.’
8 “Îndî baaregana na watho bwakwa na bateenda kûnthikîîria, gûtirî we aatigana na mîbuanaano yake, kana atigana na mîbuanaano ya Miisiri. Kwoogu ndauga nkabeetûûrîria mûthûûro wakwa na mboonie bûra marûrû maakwa magana, wa barî naagu Miisiri. 9 Îndî ndeerigîîria kûrûtha ûgu giria ngeekîra riîtwa rîakwa îgi mbere ya mîgongo îra yoonire nkîonania inya yakwa kîrî Isiraeri rîra ndaabarutire Miisiri. 10 Kwoogu, ndabaruta Miisiri na ndabareeta rwanda. 11 Ndabanenkera maathana na mawatho maakwa mara muntû akaathingataga, agatûûra. 12 Kinya ndabanenkera Sabatû îrî ntugû ya kûnogoka rûrî rwano gatîgatî gaakwa nabo, kaingo bamenya i niû Mwathani ndaabatheriirie.
13 “Îndî antû ba Isiraeri i bambûûmîîrie kîongo barî rwanda. Bataathingata mawatho maakwa, baarega mawatho maakwa mara muntû akaathingataga agatûûra, na baarega gûtîîya Sabatû. Kwoogu ndaabanga kûbeetûûrîria mûthûûro wakwa na kûbathiria barî rwanda. 14 Îndî ndeerigîîria kûrûtha ûgu n'ûntû antû ba mîgongo batigîtîîya riîtwa rîakwa nyuma yao kwona nkîruta Aisiraeri Miisiri. 15 Amwe na ûgu, ndabathiîtîria barî rwanda atî ntibareeta nthîgûrû îra ndaabeerîrîte, nthîgûrû yûûyûrîîte îria na ûkî, nthîgûrû îra nthongi nkûrûki ya ira iingî cionthe. 16 N'ûntû i baaregire kûthingata mawatho na baarega gûtîîya Sabatû ciakwa, na n'ûntû beerutîîte na nkoro ciao cionthe kîrî mîbuanaano yao. 17 Îndî i ndaabeegîîrue kîao na ntaabanyamaarîria rwanda. 18 Ndaakaania aana baao naara rwanda ndabeera, ‘Bûtikathingate mawatho ma ba abaagu, bûtikathikîîrie na bûtikaathingate njîra ciao kana bwîgwatithia mûgiro na mîbuanaano yao. 19 Niû ndî Mwathani Ngai wenu. Thingataani mawatho maakwa na bwathîkîre maathana maakwa. 20 Gaigaani Sabatû yakwa îrî ntugû întheru, n'ûntû i rwano gatîgatî geetû rwa kûbûririkanagia atî niû ndî Mwathani Ngai wenu.’
21 “Îndî, wana aana i baûmiirie biongo. Bataathingata mawatho maakwa, bataingia maathana maakwa, wana wegua ûra amaathîkagîra agaatûûra. Na baarega gûtîîya Sabatû yakwa. Kwoogu, ndauga ngeetûûra mûthûûro wakwa kîrî bo naagu rwanda. 22 Îndî ndeerigîîria kûrûtha ûgu n'ûntû antû ba mîgongo batigîtîîya riîtwa rîakwa nyuma yao kwona nkîruta Aisiraeri Miisiri. 23 Ndabathiîtîria tûrî rwanda atî nkabanyagaaria gatîgatî ka mîgongo yonthe, 24 n'ûntû bataathingata mawatho maakwa na bataatîîya Sabatû yakwa na baagonga ngai cia mîbuanaano cia beethe. 25 Naani ndabarekanîîria na mawatho matarî meega na maathana mara mataûmba gûteethia muntû gûtûûra mwoyo, 26 na ndaarekeeria beebîkîra mûgiro gûkûrûkîîra biewa biao, na baaruta biîmbere biao bionthe kaingo bamakania bamenya atî niû ndî Mwathani.
27 “Kwoogu, mwana wa muntû, arîria antû ba Isiraeri na ûbeere, ûûgû i bu Mwathani Mwene Inya akuuga: Biûyûûyû bienu biandumire na njîra ya kwîthîrwa batarî eetîgua kîrî niû. 28 N'ûntû rîra ndaabairire nthîgûrû îra ndaabeerîrîte, baaruta igongwana na macoco irîmaani biiraaya na ruungu rwa mûtî woora boonaga ûrî mûnene. Baûkia mûthûûro wakwa rîra baarutagîra ngai ciao igongwana. Baareeta maguta mara manunkaga bwega na macoco na bacirutîra igongwana bia biakûnyua. 29 Ndabaûria, bantû agu aûkîîru bûkûthi kûrîîtwa ata? Baguîta Bamaa mwanka îmunthî.
30 “Kwoogu, îra antû ba Isiraeri ûûgû i bu Mwathani Mwene Inya akuuga, ‘Ka bûkeebaka rûko wa ta bûra ba abaagu baarûthire na kûringa marwaya na mîbuanaano îrî njici? 31 Rîra bûkûbarutîra biewa na kûbarutîra aana beenu ta igongwana bia kûbîîthua, ka bûkwîgwatithia mîgiro na mîbuanaano yonthe mwanka îmunthî. Nkabwîtîgîîria bûndombe ûkûrû biû antû ba Isiraeri? wa ta bûra ntûûraga mwoyo, ntiîtîgîîria bûndomba ûkûrû. I bu Mwathani Mwene Inya akuuga.’
32 “Biû bûriuga nkorooni cienu, ‘Tûrîenda gûkara ta mîgongo îra îîngî, ta antû ba nthîgûrû ira ingî, bara bagongaga mîtî na maiga.’ Îndî ûgu bûkûthûgaania na mma bûtiikarîka. 33 Wa ta bûra ntwîre mwoyo, i bu Mwathani Mwene Inya akuuga, nkabwaatha na njara îrî na inya na mbwîtûûrîrie mûthûûro wakwa. 34 Nkabûruta kuuma kîrî mîgongo na mbwîthîranie kuuma nthîgûrû ira iingî naara bwanyagaariirue. Na inya yakwa îînene, ntaambûrûkîîtie njara na mûthûûro wakwa. 35 Nkaabwira rwanda rwa mîgongo, na naagu nkabûgiitîra îgamba tûcûûbeene. 36 Wa ta bûra ndaagitîîre ba abaagu îgamba rwanda rwa nthîgûrû ya Miisiri, nwa ta bu nkabûgiitîra. I bu Mwathani Mwene Inya akuuga. 37 Ngatûma bûkûrûkîîra ruungu rwa mûraagi wakwa, na ntûme bwathîkîra kîrîîkanîro gîakwa. 38 Nkabaathûrana na bara batambathîkagîra na bara bareganaga na watho bwakwa. Nkabaruta nthîgûrû îra batûûraga ta agwate, îndî batiithûngîra nthîgûrû ya Isiraeri. Rîru bûkamenya niû ndî Mwathani.
39 “Naabi antû ba Isiraeri, ûûgû i bu Mwathani Mwene Inya akuuga: Îthiini na mbere kûgonga ngai cienu cia ûrongo, îndî nyumaani, bûkanthikîîria na bûtiira riîtwa rîakwa îgi kaîrî na biewa bienu na ngai cia ûrongo. 40 N'ûntû kîrîmaani gîakwa kîîtheru, kîrîma kîîraaya gîa Isiraeri, antû bonthe ba Isiraeri bûgantûmîkîra ku, i bu Mwathani Mwene Inya akuuga. Naagu, nkabeetîgîîria na ngeeteera bûndetere maruta meenu, biewa bienu bira biega mûno amwe na igongwana bienu biitheru. 41 Ndabûreeta mûciî kuuma nthîgûrû ira bwanyagarîîtue, nkabûkeneera wa ta bûra nkeneete i mûruke wa ntoogo kuuma igongwanaani bienu, naani nkeebonania ndî ûmûtheru gatîgatîîni keenu mbere ya mîgongo yonthe. 42 Rîru bûkaamenya niû ndî Mwathani, rîra nkaabûreeta nthîgûrû ya Isiraeri, nthîgûrû îra ndathiîtîîtie kûnenkera biûyûyû bienu. 43 Naagu i noogo bûkaaririkanîra mîtugo na mîkarîre yenu yonthe îra bwegwatithiirie n'yo mûgiro, naabi bûkeemena n'ûntû bwa mantû mamu mathûûku bwarûthire. 44 I rîo bûkaamenya niû ndî Mwathani rîra nkaabûrûthîra îndî n'ûntû bwa gûtîîya riîtwa rîakwa na ti kûringana na mîtugo na mîkarîre yenu îmîthûûku biû antû ba Isiraeri. I bu Mwathani Mwene Inya akuuga.”
45 Mwathani aaria naani ambîîra, 46 “Mwana wa muntû, raitha bwa mbarî ya naiti, tûmîîria mbarî ya naiti na ûrorie îgûrû rîa mûthitû wa mbarî ya naiti. 47 Îra mûthitû wa mbarî ya naiti, ‘Thikîîria kiugo kîa Mwathani. Ûûgû i bu Mwathani Mwene Inya akuuga, ndî akubî gûcinia mwanki, na mwanki ûyu ûkaabîîthia mîtî yonthe, îmîîthî kana îmîûmo. Gûtirî kîo gîkaûmba kworia ndîrîmbî cia mwanki ûyu rîra ûkeegua ûgîtaamba kuuma rûteere rwa iti mwanka rûteere rwa îgûrû na ûbîîthie kîonthe kîra ûkeegua kîrî njîraani înu. 48 Antû bonthe bakoona i niû Mwathani ndaabua mwanki ûyu, na ûtioreka.’ ”
49 Ndauga, “Îî Mwathani Mwene Inya, barîmbaria bakiugaga, ‘Muntû ûyû aaragia na njuno rîonthe.’ ”