Rwîmbo rwa kîîthikîîro
19
1 Mwathani ambîîra mbine rwîmbo rûrû rwa kîeba îgûrû rîa anene ba Isiraeri2 nkiugaga, “Nyûkwe aarî cimba îrî îgweta!
Amaami gatîgatî ka biunga bia cimba,
na aarera aana baake.
3 Aarerire mwana ûmwe wake kîrî aana baake,
na mwana ûyu aatuîka cimba î ng'entu mûno.
Eerutana kûgwîma na kûûraga nyamû
na atua kûrîa antû.
4 Mîgongo yeegua mantû maake,
na aagwatwa i mûtego wao kîrinyaani,
Baatûmîra ndwano na bamwira nthî ya Miisiri.
5 Gina akwona wana amweteera atikûûya,
na wîrîgîîro bwa kûmwona bwathira,
aathûkia mwana ûngî wake
amûtuîkithia cimba îrî na inya.
6 Agûkûra,
aanjîîria kûthiiyania amwe na cimba ira iingî.
Na aanjîîria kûûraga nyamû,
na aatuîka cimba ya kûrîa antû.
7 Oomoranga nyomba cia ûnene
na kwînyangia taûni ciao.
Nthîgûrû na bara baatwîre ku
baaguaya n'ûntû bwa kûruma gwake.
8 Mîgongo yamuumîîra
kuuma mbarî cionthe,
bamûgwîkîra na neeti ya kûmûgwata,
na agwatîrwa kîrinyaani kîao.
9 Baatûmîra ndwano kûmûkuuyia na kûmwîkîra kanyombaani kaao
na bamûreeta kîrî mûnene wa Mbabironi.
Bamwîngîra nceera,
na mûrurumo wake ûteeguîka kaîrî
irîmaani bia Isiraeri.
10 Nyûkwe aakari ta mûcabiibû mûndaani,
wandîîtwe akubî na rûûyî,
warî na matunda na mpoong'i inyiingî
n'ûntû bwa rûûyî kwingîa.
11 Mpoong'i ciaû ciarî na inya,
ira ciarî mîraagi ya anene.
Mûcabiibû ûyu waakûrire na gûkûrûka mîtî îra îîngî yonthe,
Antû baakaatha ûraaya bwau
na wingî bwa mpoong'i ciau.
12 Îndî, nwakûûrirwe n'ûntû bwa mûthûûro,
na wateegwa mûthetuuni.
Ruuo rûûnene rwa mbarî ya uumîîro bwa riûa rwacuûmia,
matunda maau maûrûrûka,
na mpoong'i ciaû ira ciarî na inya ciaûma.
Na mwanki waubîthia.
13 Na îîndî waandîîtwe rwanda,
nthîgûrû îmbûmo îtarî na rûûyî.
14 Mwanki waumîîra ruungu rwa mpoong'i,
wabîîthia matunda na mpoong'i ciau.
Mpoong'i ciau itiîgua irî na inya nwa aniini,
na itibua kwîgua irî mîraagi ya anene.”
Rûrû i rwîmbo rwa kîeba, na rwinagwe rûrî rwa kîeba.