Bara beeyagia bagaakua
18
1 Mwathani aaria naani ambîîra, 2 “I kî n'ûntû antû bagûkara bakîgwetangaga njuno îno îgûrû rîa Isiraeri?‘I beethe baarîîre ncabiibû imbîthî
i kîo n'ûntû magego ma aana baao meegagua njiciûki?’
3 “Mwathani Mwene Inya ariuga, wa ta bûra ntûûraga mwoyo, bûtikooro bûgweta njuno îno Isiraeri kaîrî. 4 N'ûntû ûtûûro bwa antû bonthe i bwakwa, îthe wana mwana bonthe i baakwa. Kwoogu, ûra akeeyia nwe agaakua.
5 Ûkeegua kûrî na muntû ûmwagîru
ûra arûthaga mantû ma mma na bûra kûbatîîrue,
6 atirîîyagîra igongwana irîmaani
kana agonga ngai cia mîbuanaano cia antû ba Isiraeri.
Atiîkagîra mwekûrû wa mûtûûri wake mûgiro
kana amaama na mwekûrû kagiita kara arî na nyambura ciake.
7 Gûtirî muntû ainyagîîria,
acookagia kîra athûkîîtie kûrûngamîîra îrandû rîra akoobithanîîtie.
Atiiyaga,
îndî n'arûmagia bara babûûti biakûrîa
na akanenkera bara barî ûtheri nguo.
8 Akoobithanagia mbia ciake atakîrîîwa na baita,
kana athûkia baita înene.
Atiendaga kwinyanîîria
na n'agiitaga îgamba bûra kûbatîîrue.
9 N'athingataga maathana maakwa,
na kwathîkîra mawatho maakwa.
Muntû ûyu n'ûmwagîru,
na agaatûûra mwoyo.
I bu Mwathani Mwene Inya akuuga.
10 “Ûkaaya kwîgua muntû ûyu arî na mwana arî bitina kana mûûragani kana arûthaga mantû mama mangî, 11 (wana wegua îthe atimarûthaga)
arîîyaga igongwana irîmaani,
na ageekîra mwekûrû wa mûtûûri wake mûgiro.
12 Akainyîîria athîîni na bara barî na ûbatu,
akaiya,
aticookagia kîra athûkîîtie gîa kûrûngamîîra îrandû rîra akoobithanîîtie.
N'agongaga mîbuanaano
na kûrûtha mantû marî njici.
13 Akoobithanagia mbia ciake arîîwa na baita na ageetia baita înene.
“Muntû ta ûyu nwa atûûre? Arî! N'ûntû n'arûthîîte mantû mamu marî njici, agaakua na ûkeegua îrî îgûrû rîake.
14 “Î ûkeegua muntû ûyû wa baîrî arî na nthaka îra îkwona meeyia monthe mara îthe akûrûtha, na wana wegua n'akûmoona, atirûthaga mantû ta mama:
15 Atirîîyaga igongwana bira birutagwa irîmaani,
kana agonga ngai cia mîbuanaano cia antû ba Isiraeri.
Atiîkagîra mwekûrû wa mûtûûri wake mûgiro.
16 Atiinyagîîria muntû nwa ûrîkû,
kana athûkia gîntû gîa kûrûngamîîra îrandû rîra aakoobithania.
Atiiyaga
îndî anenkagîra bara batarî na gîakûrîa irio biake,
na akaneenkera bara barî ûtheri nguo.
17 N'athwîre kûrûtha meeyia,
atikoobithanagia kaingo oona baita na atithûkagia baita înene.
N'aathîkagîra mawatho maakwa na akathiingata watho bwakwa.
“Ûyu atiikua n'ûntû bwa meeyia ma îthe, îndî agatûûra mwoyo. 18 Îndî îthe agaakua n'ûntû bwa meeyia maake, n'ûntû bwa kwinyîîria antû, n'ûntû bwa kwiya antû na kûrûthîra antû mantû maathûûku.
19 “Îndî i bûkûûria, ‘I kî n'ûntû mwana atagûkaanûkua n'ûntû bwa meeyia ma îthe?’ N'ûntû mwana n'arûthîîte ûmma na bûra kûbatîîrue na n'arathingataga mawatho maakwa monthe bwega, na mma agaatûûra. 20 Ûra akaarûtha meeyia n'we agaakua. Mwana atiikaanûkua n'ûntû bwa meeyia ma îthe kana îthe akaanûkua n'ûntû bwa meeyia ma mwana. Antû baagîru bakaarîwa n'ûntû bwa wega bwao na antû baathûûku bakaarîwa n'ûntû bwa ûthûûku bwao.
21 “Îndî muntû ûra arûthaga mantû maathûûku agatiga kwîyia na akaathîkîra mawatho maakwa na akarûtha bûra kûbatîîrue, agaatûûra mwoyo na atiikua. 22 Moothûûku monthe mara arûthîîte matiiririkanwa. N'ûntû bwa mantû mara maagîru arûthîîte, agatûûra. 23 Mwathani Mwene Inya arîûria, anga i nkenagîîra gîkuû kîa muntû mwîyia? Arî. Anga niû ntiendaga arekana na njîra ciake inthûûku kaingo atûûra?
24 “Îndî muntû ûmwagîru akaaya kuuma wagîruuni bwake agatua kwîyia na kûrûtha meeyia marî njici ta mara muntû ûyu mûthûûku ararûthaga, agatûûra? Gûtirî nwa bûmwe bwa wagîru bûra arûthîîte bûkaaririkanwa. Agaakua n'ûntû bwa kûrega gwîtîgîka gwake na meeyia mara arûthîîte.
25 “Îndî biû buugaga bûra Mwathani akûrûtha ti bwega! Thikîîriani îîndî biû antû ba Isiraeri, î bûra nkûrûtha ti bwega? Mara biû bûkûrûtha i mo matarî meega. 26 Muntû ûmwagîru akaaya kuuma wagîruuni bwake na akaanjîîria kwîyia, agaakua n'ûntû bwa ûgu, n'ûntû bwa meeyia mara arûthîîte agaakua. 27 Îndî muntû ûmûthûûku akaaya gûtigana na mantû mathûûku mara arûthîîte, na akanjîîria kûrûtha ûmma na bûra kûbatîîrue, akoonokia mwoyo wake. 28 N'ûntû n'athûgaanîîtie na gûtigana na moothûûku mara ararûthaga monthe, na mma agaatûûra na atiikua. 29 Îndî biû antû ba Isiraeri bûriuga, ‘Mara Mwathani akûrûtha matiagîrîîte!’ Biû antû ba Isiraeri, buugaga njîra ciakwa ti cia mma? Mara biû bûkûrûtha i mo mataagîrîte.
30 “Kwoogu, biû antû ba Isiraeri nkaagiitîra woora ûmwe wa cienu îgamba kûringana na mîtugo yake. I bu Mwathani Mwene Inya akuuga. Îîrireeni! Tiganaani na moothûûku meenu monthe, kaingo meeyia matabûgwîthia. 31 Tiganaani na meeyia monthe mara bûrûthaga, na bwîbîkîre wîîru na nkoro înjerû. Bûgaakua i kî biû antû ba Isiraeri? 32 N'ûntû ntikenagîîra gîkuû kîa muntû nwa ûrîkû, îîrireeni na bûtûûre. I bu Mwathani Mwene Inya akuuga.”