Ndiiû ciîrî na mûcabiibû
17
1 Mwathani aaria naani ambîîra, 2 “Mwana wa muntû, îra antû ba Isiraeri rûgono na ngerekano îno. 3 Ûbeere Mwathani Mwene Inya ariuga: I kwarî na ndiiû îmwe înene mûno, yarî na mathabu maanene na mbwî inyiingî indaaya cia rangi mwanya mwanya. Ndiiû înu yabuurûûkire mwanka kîrîmaani kîa Rebanoni, na gûtwa îgûrû rîa mûtî wa mûthithinda, 4 yaatua kathaambu kara kaarî îgûrû nkûrûki na yagakamata mwanka nthîgûrû ya ariingi biacaara, yakaanda taûni.5 “Yaathûkia mbeû imwe cia nthîgûrû ya naagu, na yacianda mûthetuuni warî ûmûnoru, gûntû kwarî na rûûyî rwingî. 6 Kîmera gîku gîakûra na gîatuîka mûcabiibû ûra ûtaambaga. Mpong'i ciakûra cierekereete naara ndiiû yarî, na mîri yaatigwa îrikîîtie mûthetuuni. Kwoogu, waatuîka mûcabiibû, na waruta mpong'i na mathangû.
7 “Îndî, i kwarî na ndiiû îîngî înene yarî na mathabu maanene na mbwî inyiingî. Kwoogu, mûcabiibû ûra waûndûra mîri yau, amwe na mpong'i ciau kuuma ara waandîîtwe wabierekeria kîrî ndiiû înu kaingo icutûûrîria rûûyî. 8 Mûcabiibû ûyu waandîîtwe bantû kwarî na mûthetu ûmûnoru na akubî na rûûyî rwingî, kaingo ûruta mpong'i, ûciara matunda na ûtuîka mûcabiibû ûmûthongi.
9 “Mwathani Mwene Inya arîûria, mûcabiibû ûyû ûgaakûra na ûtûûre? Mîri yau îtiikûûrwa na matunda matiituîgwa mabûûye? Mathangû maimbia makaabûûya. Gûtiendekana muntû arî na inya kana antû gûcukûûra na mîri mîene. 10 Wana ûkaandwa rî, ûgaakûra? Ûtiûma kûrû rîra ruuo rûkaabuutana kuuma mbarî ya uumîîro bwa riûa? Ûkaûma ûrî wagu waandirwe mûthetuuni ûmûnoru.”
Mwathani aataûra ngerekano înu
11 Mwathani ambarîria ambîîra ata rî, 12 “Ûria antû babu baûmo biongo wegua i bagûciûkîrwa i ngerekano înu. Beere, mûnene wa Mbabironi aayire Njerusaremu, aathûkia mûnene na atongoria baake, abaira Mbabironi. 13 Acooka aathuura muntû ûmwe wa kuuma mûciî wa mûnene na aiga kîrîîkanîro nwe, na amûnyuithia muuma. Aathûkia atongoria baangî ba nthîgûrû înu, 14 kaingo wathani bûthira inya na bûremwa i gûûkîîra kaîrî bathingatîîra kîrîîkanîro kîa mûnene wa Mbabironi kaingo bûûmba kûthi na mbere. 15 Îndî mûnene ûra waimbia aarega kwathîkîra mûnene wa Mbabironi na aatûma atûmwa baake Miisiri kûromba mbaraathi na njûûrî înene ya acikaarî. Mûnene ûyu akaûmbana? Ûra arûthîîte mantû mamu akaabuka? Akauna kîrîîkanîro na amonyie?
16 “Mwathani Mwene Inya ariuga, wa ta bûra ntûûraga mwoyo, agaakuîra Mbabironi taûni ya mûnene ûra aamûtuîkithiirie mûnene, na mûnene ûra mwene muuma ûra aabûthîîrie na mwene kîrîîkanîro kîra aunire. 17 Faraû amwe na njûûrî yake batiûmba kûmûteethia ndûani rîra antû ba Mbabironi bakaabaithûkîra na gwaka nthingo kaingo bathûngîra baûraga antû baingî. 18 Aabûthîîrie muuma na kuuna kîrîîkanîro kîra eeranîîte na njara yake wengwa, na kûrûtha mantû mama monthe, ûmma atiibuka.
19 “Kwoogu, ûûgû i bu Mwathani Mwene Inya akuuga, wa ta bûra ntûûraga mwoyo, n'ûntû bwa kûbûthîîria muuma waakwa na kuuna kîrîîkanîro gîakwa, nkamûkaanûkia. 20 Ngaakûnjûra neeti yakwa îgûrû rîake, n'we akagwatwa i mûtego ûyu wakwa. Nkamwira mwanka Mbabironi na mûtuîre îgamba noogo n'ûntû ataarî mwîtîgua kîrî niû. 21 Acikaarî baake bonthe bakaûragwa na rûûyiû, na bara bagaatigara bakaanyagaara mbarî cionthe. Rîru i rîo bûkaamenya atî i niû Mwathani nkwaria.”
22 Ûûgû i bu Mwathani Mwene Inya akuuga, “Niû ningwa nkaathûkia kathaambu ka îgûrû ka mûthithinda ûmûraaya na nkaande. Nkauna kayancaana kuuma kathambuuni kaau na nkaande kathûmbîriini ga kîrîma kîîraaya. 23 Kathûmbîriini ga kîrîma kîîraaya gîa Isiraeri i noo ngakaanda, gakauma mpoong'i, gaciare matunda na ûtuîke mûthithinda ûmwega. Nyoni cia mîthemba yonthe igaakara na ciake ntara mpong'iini ciau. 24 Mîtî yonthe ya kîthaka îkaamenya atî niû Mwathani i ngwîthagia mîtî îra mîraaya na ngatûma mîtî îra mîkubî îraayîa. I mbûûmagia mîtî îmîîthî na ngatûma mîtî îmîûmo îririma. I niû Mwathani ndauga, na nkarûtha ûgu.”