Kûrega gwîtîgîka kwa Njerusaremu
16
1 Mwathani aaria naani ambîîra, 2 Mwana wa muntû, îra Njerusaremu mantû ma njici mara arûthîîte. 3 Îra Njerusaremu Mwathani Mwene Inya arîmwîra ûûgû, kaumo gaaku i nthîgûrû ya Kanaani na inoogo waciarîîrwe, abaagu aarî Mûamori na nyûkwe aarî Mûiti. 4 Ntugû îra waciarirwe, mûkou waku ûtaagiitwa na ûthambua na rûûyî, ûtaakwa mwonyo kana ûguîkwa na nguo. 5 Gûtirî we aakwîgîîrua kîao akûrûthîra mantû mama, îndî gwagerirwe naagu ome. Wamenirwe ntugû îra waciarirwe.6 Rîru ndaakûrûkîîra agu ndoona ûkîgaragara nthakameeni. Ûkîgaragaraga agu ndakwîra, “Tûûra!” 7 Ndaatûmire ûkûra ta mûtî kîthakaani. Naawe wakûra na waraayîa watuîka mwarî ûmûgima. Nyonto ciaku ciakûra na ntundu wanacio ciakûra îndî warî ûtheri ce.
8 Nkûrûkîrîîte agu kaîrî, ndakwona. Kagiita gaku, warî ûgûtuîka ûmûgima wa kwendwa. Ndagûkunîkîra na nguo yakwa kaingo mbitha ûtheri bwaku. Ndakûthiîtîria ûgaatuîka wakwa na twagwatanîra. I bu Mwathani Mwene Inya akuuga.
9 Ndaacooka ndaathûkia rûûyî, ndakûthambia nthakame îra warî n'yo na ndagwaka maguta. 10 Ndagwîkîra nguo îngemie na iraatû bia ngooci. Ndagwîkîra gatani înthongi na ndakûguîka na nguo cia goro. 11 Ndakûthongamia na into bia kwîgemia ndagwîkîra mbangiri njara, mîkathî ya nkingo, 12 na ndagwîkîra mbete nyiûrû, mina cia matû na nthûmbî înthongi kîongo. 13 Kwoogu wagemua na thaabu na fetha, nguo ciaku ciarî cia gatani înthongi, ngoora ya goro na gîtambaa kîîgemie. Irio biaku biarî mûtu ûmwinyu, ûkî, na maguta ma mîceituuni. Wathongama mûno nkûrûki na wakara ta mûnene wa mûka. 14 Nkuma yaku yataamba mîgongooni yonthe n'ûntû bwa ûthongi bwaku, n'ûntû mwago ûra ndaagûpeere nwatûmire ûthongama kûrû. I bu Mwathani Mwene Inya akuuga.
15 Îndî wegwatia ûthongi na nkuma yaku na wanjîîria kûringa marwaya n'ûntû bwa nkuma yaku. Wathi ûkîmaamaga na muntû woora ûkeethîra ûthongi bwaku bûgatuîka bwake. 16 Wathûkia nguo imwe ciaku wacitûmîra kûgemia bantû aaku ara aûkîîru a kûgongera, na agu noogo warutagîra ngûgî ya ûmaraaya. Mantû ta mama mataaro makarîka kaîrî na matibatîîrue makarîka kaîrî. 17 Wathûkiirie into biakwa bia kwîgemia bia thaabu na fetha bira ndaakûnenkereete werûthîra mîbuanaano ya antû arûme kaingo ûmaramara n'yo. 18 Watûmîra nguo ira ndaakûnenkereete cia goro gûkunîkîra mîbuanaano înu na wamîrutîra maguta maakwa na macoco maakwa mara ndaakûnenkereete. 19 Kinya irio biakwa bira ndaakûnenkereete, mûtu ûmwinyu, maguta ma mîceituuni na ûkî, warutire ta macoco mara manunkaga bwega kîrî mîbuanaano înu. Ûûgu i bu Mwathani Mwene Inya akuuga.
20 Na wathûkia nthaka na aarî bara wanciarîrîte wabaruta igongwana kîrî mîbuanaano. Ka bûtaarî bûganu woû gûtuîka îrwaya? 21 Wathînjire aana baakwa wabaruta barî kîgongwana gîa kûbîîthua kîrî ngai ciaku. 22 Ûkîrûtha meeyia marî njici na ûmaraaya bwaku, ûtaaririkana kagiita kara warî mwana, rîra warî ûtheri ûkîgaragaraga nthakameeni yaku.
Ûtûûro bwa Njerusaremu ta îrwaya
23 “Irû! Irû! Yîî kûrû!” I bu Mwathani Mwene Inya akuuga. Nyuma ya kûrûtha mamu monthe, 24 waarûthire gûntû kûra gûûkîîru, tûtûmbî twa kûgongera ngai cia mîbuanaano bieniini bionthe bia taûni. 25 Mwanjîîrioni wa barabara cionthe, gwaka gûntû gûûkîîru gwaku gwa kûgongera na waragaragia ûthongi bwaku na njîra ya kûmaama na antû bonthe, na ûmaraaya bwaku bwongeereka nkûrûki. 26 Warutire ngûgî ya ûmaramari na atûûri baaku ba Miisiri bara baaganu, wongeera ûmaramari bwaku, ûntû bûra bwanthûriirie. 27 Kwoogu, i mbûkîîrîîtie njara yakwa ngûkaanûkia na ndaagaûra nthîgûrû yaku, ndakûnenkanîra kîrî Afirisiti bara bakûthwîre, bara beegiirue nthoni n'ûntû bwa mîtugo yaku îmîthûûku. 28 Ûkûrega kûganîrwa, waruta ngûgî ya ûmaramari na antû ba Asîîria. Amwe na ûgu, ûtaaganîrwa. 29 Weruta wengwa ûtûmîrwa n'antû ba Mbabironi, bara barutaga ngûgî cia biacaara! Îndî amwe na ûgu, ûtaaganîrwa.
30 Ga nkoro yaku îrî mbayie ata rîra ûkûrûtha mantû mama monthe, ûkîrûthaga ta îrwaya rîtarî nwa nthoni? I bu Mwathani Mwene Inya akûûria. 31 Rîra waarûthire tûtûmbî mîthiani ya barabara, na gûntû kûra gûûkîîru gwa kûgongera ngai ciaku cia mîbuanaano bieniini bionthe bia taûni, woû ûtaakari ta îrwaya rîa wîthîre n'ûntû wana ûteetagia mbia. 32 Woû mûka mûthûngîîri ûmaamaga na ageni bantû a mûkûrû waku. 33 Ta wîthîre, marwaya ka marîagwa, îndî woû ga ûkûnenkera anyaanya baaku biewa kûbagukuma kaingo baaya kuuma gûntû kunthe kaingo bamaama naawe. 34 Kwoogu, kîrî ngûgî yaku ya ûmaraaya, ûtikari ta marwaya mara mangî, gûtirî we aayaga gûgûceria kaingo amaama naawe. Ûrî na mwanya mûno n'ûntû ûnenkanagîra mbia îndî gûtirî cio woû ûnenkagîrwa.
35 Kwoogu, woû îrwaya rîrî, thikîîria kiugo kîa Mwathani. 36 Ûûgû i bu Mwathani Mwene Inya akuuga. N'ûntû woû nwonanîîtie bata yaku ya kûmaramara na n'ûkûmîrîte anyaanya baaku bonthe nguo, n'ûntû n'ûgongeete ngai cia mîbuanaano irî njici cionthe, na n'ûntû n'ûragîîte aana baaku barî igongwana kîrî ngai inu cia mîbuanaano, 37 kwoogu ûûgû i bu nthiîte kûrûtha, nkeethîrania anyaanya baaku bonthe, bara wîkenagia nabo, bara wendeete na bara ûtendeete, nkabeethîrania kuuma nteere cionthe, nkûrute nguo ûtigwe ûtheri mbere yao kaingo boona ûtheri bûbu. 38 Ngakûnenkera îkaanûkia ta rîa eekûrû bara bathûngagîîra, kana bara baûraganaga, na n'ûntû bwa mûthûûro na rûriitho rwakwa, i ngaakûûraga! 39 Ngakûnenkanîra kîrî anyaanya baaku, na boomorange tûtûmbî twaku twa kûgongera gûntû kunthe kûra wakîîte gwa kûgongera ngai cia mîbuanaano. Bagakûruta nguo na bathûkie into biaku bia kwîgemia na bagûtige ûrî ûtheri na ûtarî gîntû. 40 Bagakûretera kîrîndî kîra gîgaakûringa na maiga na bakûgiitange na ndûûyiû ciao. 41 Bakaabîîthia mîciî yenu na babûkaanûkie mbere ya eekûrû baingî. Ngaatiga ndoona ûgûtiga ngûgî yaku ya ûmaraaya na ûtige kûrea anyaanya baaku. 42 Rîru i rîo mûthûûro wakwa ûkaathira, na rûriitho rûthire na ntiithûûra kaîrî.
43 Na n'ûntû n'ûriganîrîtue i mara ndaakûrûthîîre ûrî mwana, wanthûûria na kûrûtha mantû mama mathûûku monthe, ngakûrea kûringana na meeyia maaku, i bu Mwathani Mwene Inya akuuga. Anga tika wongeere ûmaramari îgûrû rîa meeyia mama marî njici?
44 Ûra wonthe atûmagîra njuno, agaatûmîra njuno îno îgûrû rîaku, wa bûra gina akari, nwa ta bu mwarî wake akari. 45 Ûmma ûrî mwarî wa mma wa nyûkwe ûra ameneete mûkûrû wake na aana baake, ûrî mwaragina wa mma wa aaranyûkwe, bara bameneete akûrû na aana baao. Nyûkwe aarî Mûiti na abaagu i Mûamoni. 46 Mwaranyûkwe ûra mûkûrû aarî Samaria, ûra aatûûraga na aarî baake mbarî ya neegûrû, na mwaranyûkwe ûra mûniini, ûra aatûûraga mbarî ya naiti na aarî baake, aarî Sondomu. 47 Ti kûthingata akî wathingatire mîkarîre na mîtugo yao îrî njici, îndî nyuma ya kagiita gaakai, mîkarîre yaku yonthe n'yathûûkire nkûrûki ya yao. 48 Mwathani Mwene Inya ariuga, wa ta bûra ntwîre mwoyo, mwaranyûkwe Sondomu na aarî baake batooro barûtha bûra woû na aarî baaku bûrûthîîte.
49 Îîndî, meeyia ma mwaranyûke Sondomu i maama, we na aarî baake baarî eekumia na i baarî na irio biingî na i baarî baaganîre îndî bataateethia nkîa kana bara baarî na ûbatu. 50 I beekumagia na baûmia biongo na baarûtha mantû mara niû nthwîre, kwoogu ndabathiria nkûmoona. 51 Wana Samaria îtaarûtha nucu ya meeyia maaku. N'ûrûthîîte mantû marî njici nkûrûki yabo, watûma aaranyûkwe booneka barî baagîru n'ûntû bwa mantû marî njici mara ûrûthîîte. 52 Kamatana na îgi rîaku n'ûntû i taka ûkûtheteera aaranyûkwe. N'ûntû meeyia maaku marî njici nkûrûki ya ma aaranyûkwe, mwanka boonekana barî baagîru nkûrûki yaku. Kwoogu îîndî conoka mûno na ûkamate îgi rîaku, n'ûntû n'ûtûmîîte aaranyûkwe boonekana barî baagîru.
53 Ngaacookia ûtonga bwa Sondomu na bwa aarî baake na bwa Samaria na bwa aarî baake na ngagûcookeria ûtonga bwaku nkîbacookeria, 54 kaingo wîgua nthoni na ûconoka n'ûntû bwa mara monthe ûrûthîîte, bo bakoona ta barî kaaba. 55 Aaranyûkwe, Sondomu na Samaria amwe na aarî baao bagaakara bwega wa ta mbereeni, na kinya woû na aarî baaku bûgaakara wa bûra bwakari mbereeni. 56 N'ûntû bwa wîkumia bwaku, nwabûthagîîria mwaranyûkwe Sondomu, 57 mbere ûthûûku bwaku buumbûka. Îndî îîndî ûgu, ûmeneereetue n'aarî ba Endomu na atûûri bonthe, na aarî ba atûûri baaku Afirisiti bara bakûthwîre. 58 Mwathani Mwene Inya ariuga, “Rîrî i rîo îkaanûkia n'ûntû bwa ûmaramari bwaku na mantû marî njici mara ûrûthîîte.”
59 Ûûgû i bu Mwathani Mwene Inya akuuga, “Nkabûkaanûkia bûra kûbatîîrue, n'ûntû n'ûbûthîîtie muuma wakwa na wauna Kîrîîkanîro. 60 Îndî nkaaririkana Kîrîîkanîro kîra ndaarîîkanîîre naawe kagiita ka wîthî bwaku, na nkaiga Kîrîîkanîro naawe tene na tene. 61 Naawe ûkaaririkana mîtugo yaku na wîgue nthoni rîra ngaakûnenkera aaranyûkwe, bara bakûrû kîrî woû na bara baniini. Ngaakûnenkera bo ta aarî baaku îndî t'ûntû bwa Kîrîîkanîro gîakwa naawe. 62 Kwoogu, nkaiga Kîrîîkanîro naawe, na ûkaamenya i niû Mwathani. 63 Ngakûrekera mara monthe ûrûthîîte. Naawe waririkana mamu ûrûthîîte monthe ûkaamaka na ûkire n'ûntû bwa nthoni na ûtiitumûra mûromo waku uuga nwa ata. I bu Mwathani Mwene Inya akuuga.”