RUUTHU
Mantû ma îbuku rîrî
Gûtiiyîkeene n'ûû waandîkire îbuku rîrî. Mantû mara marî îbukuuni rîrî maatuîkîkire îgiitaani rîa atongoria bara beetagwa Agiiti Magamba. Kûringana na rûgono rwa nciarwa ira irî îbukuuni rîrî, rîandîkirwe nyuma ya kagiita ka Ndaundi.
Îbuku rîrî rîrîaria mantû ma mwekûrû Mûmoabu ûra waayire gûtuîka mwekûrû Mûisiraeri ûrî îgweta na aatua kûgonga Ngai wa Isiraeri.
I kwagîîre yûûra taûniini ya Bethireemu na Erimereki na mwekûrû wake Naomi na nthaka ciao irî ciîrî Maaroni na Kirioni baunîka baathi Moabu gûtûûra noogo. Erimereki aakuîra noogo. Maaroni na Kirioni baagûra aarî ba naagu Moabu, ûmwe eetagwa Oriba ûra ûngî Ruuthu. Maaroni na Kirioni nabo baakua. Kwoogu Naomi aatigwa na aka ba aana baake barî baîrî bonka. Rîra Naomi eegiirue Mwathani n'athaarimîîte antû baao na maketha aabanga gûcooka Bethireemu. Eera aka ba aana baake batigwe n'aagu Moabu bacerie akûrû bangî îndî Ruuthu aabanga gûtuîka mwîtîgua kîrî Naomi athiyania n'we bwa Isiraeri.
Bagûcooka Bethireemu i baagîîre na gîkeno kaîrî.
Kaingo twerewa îbuku rîrî bwega, nwa mwanka tûmenye mantû ma ngûrano cia Isiraeri kagiitaani gaku. Muntû akîgûrana na agakua atarî na mwana, mûruagina n'we abatîîrue athûkia mwekûrû ûyu aciarîra mûruagina ûyu mûkuû aana. Muntû akeegua atarî na mûruagina, muntû wa mûciî wao ûra arî akubî n'we kîî mûciî nwa athûkie mwekûrû ûyu agaciarîra muntû ûyu mûkuû aana.
Naomi na Ruuthu bagûkinya Bethireemu, Ruuthu n'eetîgîîrue kûringa rûûa mûndaani wa Mboasi. Mboasi aarî wa rûkore rwa ba Erimereki. Naomi eera Ruuthu acûûgie oone kana Mboasi akamûgûra. I kwarî na muntû ûngî aarî akubî na Naomi kîî mûciî nkûrûki ya Mboasi ûra kûringana na kîîwîthîre kîao aabatîîrue eegua arî mûrîokua wa Erimereki. Îndî n'ûntû muntû ûyu ateendaga kûgûra Ruuthu, Mboasi atuîka mûkûrû wa Ruuthu.
Bakûgîa na kaana kara geetirwe Obendi, Naomi n'eegiirue arî na gîkeno kaîrî aamenya akeegua arî na nciarwa.
Îbuku rîrî rîrîonania bwega, ûmwe wa rûrîîyo rwa Obendi aarî mûnene Ndaundi. Kwoogu Ruuthu n'atuîkire mwekûrû ûrî gîtûmi mûno Isiraeri n'ûntû Nyumaani itûkwona riîtwa rîake rîkîgwetwa rûrîîyooni rwa Yiesû îbukuuni rîa Mathayo.
Mantû mama monthe maakarîkire n'ûntû Ruuthu n'athuurire kwîgua arî mwîtîgua kîrî Naomi na kîrî Ngai wa Isiraeri. Ûûgû i bu eerire Naomi,
“Wa ara ûkaathi i noogo nkaathi,
ara ûgatûûra, noogo ngaatûûra,
antû ba mûciî wenu i bo bagaatuîka beetû,
Ngai waku agaatuîka Ngai wakwa.
Ngaakuîra wa ara ûgaakuîra
na kûthikwa wa ara ûkaathikwa.
Gûtirî kîo gîgaatûma twathûkana tatiga gîkuû.
Mwathani aroonkaanûkia ndaarega kûûyûria wîrane bûbu.” (Ruuthu 1:16-17)
Gwookubî îbuku rîrî rîkari ûûgû:
Erimereki na mûciî wake baathi Moabu (1:1-5)
Naomi na Ruuthu baacooka Bethireemu (1:6-22)
Ruuthu aaruta ngûgî mûndaani wa Mboasi (2:1-23)
Ruuthu arî rwaraani (3:1-18)
Mboasi aagûra Ruuthu (4:1-12)
Naomi aaciarîrwa mwana (4:13-17)
Rûrîîyo rwa Peresi, kuuma Peresi mwanka Ndaundi (4:18-22)