Ruuthu aaruta ngûgî mûndaani wa Mboasi
2
1 I kwarî na muntû wa mûciî wa ba Erimereki mwene wa Naomi. Muntû ûyu aarî gîtonga kîînene, na eetagwa Mboasi. 2 Ntugû îmwe, Ruuthu Mûmoabu eera Naomi atarî, “Tiga mbumîîre naara mîndaani, kwaûmbîka nkoona muntû akambîtîgîîria nkaringa rûûa, nkoona kana nkaabaara bira bikeethîrwa bitigîîtwe kûra bagûketha.”Naomi amwîra, “Na ûkathi mwar'wakwa.” 3 Kwoogu Ruuthu aathi anjîîria kûringa rûûa. Ûntû bwa kûrigaria mûnda ûyu warî wa Mboasi, muntû wa mûciî wa ba Erimereki.
4 Wagu wagu, Mboasi aakinya aumîîte bwa ntûûra ya Bethireemu, aakeethia aruti ngûgî baake, “Mwathani arookaraga amwe naabi bwinthe.”
Nabo bamûcookia, “Mwathani arookûthaarima.”
5 Rîru Mboasi aûria nthaka îra yaarûgamîrîte akethi baake, “I mwan'wa ûû ûûra?”
6 Nthaka înu yamwîra, “I mwekûrû mûgeni ûra Naomi aracookire n'we kuuma nthî ya antû ba Moabu. 7 N'ambîîrire mwîtîgîîrie aringe rûûa athingatîîte wa bûra akethi bagûketha. Aambîîrie kûruta ngûgî na inya wa rûkîîrî na anogokire bûûkai mathaa ma kûnogoka.”
8 Mboasi aathi akubî na Ruuthu amwîra, “Ga nkwîre mwan'wakwa, na ûtathi kûringa rûûa mûndaani wa muntû ûngî kaîrî, menya ûkauma aaga, karaga akubî na aarî baakwa ba ngûgî. 9 Raithaga, woona rûteere rûra baathi gûketheera ûkabathiingata noogo. Ngûkaania nthaka itigaagûcwîre ûgîti. Wegua bûûta, îthiiyaga ûkanyua rûûyî rûra rûkeegua rûrî nyûngûûni ira nthaka iira ikeegua itaîte.”
10 Rîru Ruuthu aaturia maru eenîka kîongo nthî mwanka gîatongithia mûthetu, aûria Mboasi rî, “I mbi n'ûntû ûkûndûthîra mantû meega ûûgû na ntirî wa mûgongo wa Isiraeri?”
11 Mboasi amwîra, “I mbîîrîîtwe wega bunthe bûra ûrûthîrîîte maciaraagu Naomi kuuma rîra mûkûrû waku akuire. I mbîîrîîtwe kinya bûra watigire abaagu na nyûkwe na wauma kûra waciarîîrwe waya gûtûûranîîra na antû ûtaiyî. 12 Mwathani Ngai wa Isiraeri, ûra ûûyîîte agûteethia arookûthaarima. Mwathani arookûrea na kîegwa kîra kîbatîîrue n'ûntû bwa bûra ûrûthîîte.”
13 Ruuthu amûcookia ûûgû, “N'ata aba wandûtha bwega rûyiî. Mîgambo înu wambîîra n'îmîega mûno îkûmbooreria wana kinya wegua ntirî ûmwe wa aandîkwa baaku.”
14 Mathaa ma kûrîa magûkinya, Mboasi eera Ruuthu ata rî, “Wana ûkaaya ûkarûma mûgaate ûgatombeka ndibeini ûkaboka n'yo.”
Kwoogu Ruuthu akaranîîra na aruti ngûgî bara bangî. Mboasi amûrûmia irio biakari ta mpempe imbokie aarîa mwanka abaa na atigaria. 15 Agûûka aathi kûringa rûûa, Mboasi eera aruti ngûgî baake, “Tamenya bûmûûria nakethûrie kinya ngano îra bwîthîranîîtie amwe. 16 Wana rîmwe na rîmwe rekagiani nthî ngano ira bûketheete rîru bûkamûreka akooya.”
17 Kwoogu Ruuthu aaringa rûûa mûndaani ûyu mûthenya uunthe. Ûgoro bûgûkinya aabûûra sayiri ira aarî akwona. Aarî akûbûûra ta ndebe îmwe ûgu. 18 Aakamata mûrigo wake aacooka bwa taûni aathi oonia maciarawe Naomi bûra aarî na sayiri îgana. Naamwere kinya irio bira eetwe arîa biatigara.
19 Naomi amûûria, “Yiî! I kû wauma kûringa rûûa îmunthî? Nûkûrutaga ngûgî kwa ûû? Mwathani aroothaarima muntû ûyu ûkwîgîîrue kîao mûthemba ûyû.”
Rîru Ruuthu n'we amûcookeria amwîra, “Ndîîrutaga ngûgî mûndaani wa muntû eetagwa Mboasi.”
20 Naomi auga, “Mwathani nathaarime Mboasi. Kîao kîa Ngai gîtithiraga kîrî bara barî mwoyo na bara bakuîte.” I rîo Naomi eerire Ruuthu ûûgû, “Ûmenye Mboasi nwa mûciî wetû, n'ûmwe wa bara baagîrîîtwe gûtûmenyeera.”
21 Ruuthu amwîra, “Wana tatiga ûgu îîndî, acookire ambîîra nthiiyage noogo nkaranagîre na aruti ngûgî baake nkîringaga rûûa rîonthe mwanka rîra maketha makaathira.”
22 Naomi amûcookeria amwîra, “I bwega ûthingatanage na aarî bara bakûmûkethera. Mîndaani ya antû bara bangî waûmba kwonera thîîna noogo.”
23 Kwoogu Ruuthu akarania na aarî bara baakethagîra Mboasi akîringaga rûûa kûra baakethaga sayiri mwanka rîra maketha maathirire. Ntugû inu cionthe baatûûraga na Naomi.