RUUTHU
Erimereki na mûciî wake baathi Moabu
1
1 Kagiita kamwe rîra agambi baathanaga nthîgûrû ya Isiraeri, i kwagîîre na yûûra rîînene mûno ku. Muntû ûmwe kuuma ntûûra ya Bethireemu naara Njunda naathaamire gwake amwe na mwekûrû wake na nthaka ciake irî ciîrî, baathi gûtûûra gwa kagiita gaakai nthîgûrû ya Moabu. 2 Muntû ûyu eetagwa Erimereki, mwekûrû wake nwe eetagwa Naomi. Nthaka îmwe yake yetagwa Maaroni na îra îngî Kirioni. Baarî ba mwîrîga wa Eburathi ûra watûûraga Bethireemu nthîgûrû ya Njunda. Bagûkinya nthîgûrû ya antû ba Moabu, baatûûra ku.3 Nyuma ya kagiita kaganoona, Erimereki mûkûrû wa Naomi aakua. Kwoogu Naomi barî na nthaka ciake irî ciîrî baatigwa bonka. 4 Nthaka inu ciagûra aarî ba mûgongo wa Moabu. Mwarî ûmwe eetagwa Oriba na ûra ûngî eetagwa Ruuthu. Naomi na nthaka ciake i baatûûrire Moabu kagiita ta ka mîanka îkûmi. 5 Nthaka ciake Maaroni na Kirioni, nacio ciakua. Kwoogu Naomi atigwa atarî mûrûme kana mwana.
Naomi na Ruuthu baacooka Bethireemu
6 Naomi atwîre wa naagu Moabu, eegua Mwathani narathaarimire antû baake ba Isiraeri na irio kaîrî. Rîru we na aka ba aana baake beethuuranîra bauma naagu baacooka kwao. 7 I rîo Naomi na aka ba aana baake baumire agu baatûîre baanjîîria rûgendo rwa gûcooka Njunda.
8 Îndî Naomi we eera aka ba aana baake, “Bi'ana! Wa muntû neebînûkîre, cookaani wa muntû kwao. Mwathani aroobwîgîîrua kîao ta bûra bwambîgîîrue kîo, niû na akûrû beenu. 9 Mwathani nabûthaarime bûgûrwe n'arûme bangî na bûgîte mîciî îmîega.” Naomi abacunca abeera ibatigwe bwega. Oriba na Ruuthu baanjîîria kûrîra nainya. 10 Bamwîra, “Arî tûticooka, tûrîthi naawe bwa kwenu.”
11 Naomi abeera, “Bi'ana baakwa cookaani, ka bûkwenda kûnthingatîra mbi? Bûriuga nwa nciare nthaka ingî ikabûgûra? 12 Itû aarî baakwa înûkaani. Ntiigûrwa kaîrî, indaakûrire. Naka wana nkagûrwa ta îmunthî na ngaciara nthaka 13 i bûkwona taka mma bûbeeteera bagakûra bakabûgûra? Tamenya bûrûtha ûgu rûyiî bi'aarî baakwa. Mûtûûrîre wakwa ûratuîkire wa ûrûrû bûtheri n'ûntû Mwathani nandeterete thîîna na i kîo bûkûthîîna n'ûntû bwakwa. Mwanka agu Mwathani nandeterete kînyamaara.”
14 Eekûrû babu baarîranîra kaîrî. Na gûûka Oriba we aacunca Naomi amwîra nathi bwega îndî Ruuthu aarega kwathûkana na Naomi. 15 Naomi eera Ruuthu ata rî, “I ka ûtakwona mwîruugu nacookeete gwa antû baao, na kîrî ngai ira bagongaga? Cookania n'we.”
16 Îndî Ruuthu amûcookeria amwîra,
“Tamenya ûnkinyîîria gûgûtiga.
Tiga nthiiyanie naawe itû.
Wa ara ûkaathi i noogo nkaathi,
ara ûgaatûûra, noogo ngaatûûra,
antû ba mûciî wenu i bo bagaatuîka beetû,
Ngai waku agaatwîka Ngai wakwa.
17 Ngaakuîra wa ara ûgaakuîra
na kûthikwa wa ara ûkaathikwa.
Gûtirî kîo gîgaatûma twathûkana tatiga gîkuû.
Mwathani aroonkaanûkia ndaarega kûûyûria wîrane bûbu.”
18 Rîra Naomi oonire Ruuthu ataarî na mathee neendaga bathiiyania, aarekana n'we.
19 Kwoogu Naomi na Ruuthu baagwata njîra mwanka Bethireemu. Bagûkinya, antû ba taûni bonthe babeethîranîra. Eekûrû baûranagia, “I Naomi ûyû waabu?”
20 Naomi abeera, “Tamenya bûmbîta Naomi, mbîtagaani gana, n'ûntû Mwathani Mwene Inya atûmîîte ûtûûro bwakwa bûgîta gana ntheri. 21 Nkiuma aaga gûtirî kîo ntaarî nakîo, îndî Mwathani ancookia maara mpî. N'ata bûûmba kûmbîta Naomi îîndî na nwabu Mwathani andeterete thîîna îmbîî. Mwene Inya n'andeterete kînyamaara.”
22 Kwoogu ûgu i bu Naomi na mûk'wamwan'wake ûra eetagwa Ruuthu wa kuuma mûgongo wa Moabu, baacookangire Bethireemu kuuma nthî ya antû ba Moabu. Baakinyire Bethireemu kagiita ka maketha ma kîmera kîra gîkari ta ngano gîîtagwa sayiri.