1 SAMWERI
Mantû ma îbuku rîrî
Samweri aaragîîria kagiita kaarî kaarigicanu gatîgatîîni ka wathani bwa agiiti magamba na bwa anene. Îbuku rîrî rîarîîtie mantû ma atongoria bathatû. Samweri ûra aarî kîroria na nwa we aarî wa mûthia kîrî agiiti magamba, Saûrû ûra aarî mûnene wa mbere wa Isiraeri na Ndaundi ûra rûgono rwake rûthûkîîtie nucu ya îbuku rîrî mwanka aatuîka mûnene. Mabuku ma Samweri marî maîrî maarî îbuku rîmwe na maarîîrîîtie kagiita ka mîanka îgana na mîrongo îtaano. Kuuma gwîtwa gwa Samweri mwankaani wa 1100 MKA mwanka gûkua kwa Ndaundi mwankaani wa 970 MKA. Gûtiiyîkeene bwega n'ûû aandîkîîte mabuku mama îndî i gwîtîgîkaga Samweri n'arutire ngûgî îînene mûno ku mwanka 1 Sam 25.
Yerekeeria rîa îbuku rîa 1 Samweri nwa ta rîa mabuku mara mangî ma kîrîîkanîro gîîkûrû: Ûtheru na kwathîkîra Ngai i bireetaga ithaarimo, îndî kûrega kwathîka kûreetaga kînyamaara na kûremwa i kûthi mbere. Mawîrane ma Ngai maûyûraga rîra muntû amenyeera na aûyûria rûteere rwake rwa kîrîîkanîro. Yerekeeria rîrî i rîonekaga bwega biugooni bira Mwathani eerire Eri, (Gîcu. 2:30) “ ‘I mma i ndaugire ati mûciî gwaku na wa abaagu bagaantûmîkagîra tene na tene.’ Îndî îîndî Mwathani ariuga, ‘Ûntû bûbû bûtiîgua bûrî oogo kaîrî! N'ûntû ntîîyaga bonthe bara bantîîyaga na nkamena bara baamenaga...’ ”
Ntheto cia kûrigaria naati n'îromba rîa mwekûrû ûmwe (Gîcu. 1-2) kagiitaani kara kwarî na mîtugo îmîthûûku mûno ûtongoriani bwa agiiti magamba i rîo rîaretire mwanya na ûriûkio kagiitaani ka mûnene Ndaundi. Mûbango wa Ngai warî gûtongoria antû baake gûkûrûkîîra kîrî iroria ta Musa kana Samweri. Îndî Aisiraeri beendaga mûnene kaingo beegua barî na mûtongoria wa njûûrî wa ta mîgongo îra îîngî baatûûranîîre n'yo. Kinya i beendaga taûni imbiingî na inthiûrûkîîrie na nthingo. Saûrû mûnene wao wa mbere ataathîkîra mawatho ma Ngai. Kwoogu aata ûnene bwaake, n'we na mwana wake Njonathani baûragîrwa ndûani. Rîru Mwathani aathuura mûnene aamwathîkagîra, n'we i Ndaundi kaîyî kara kaarîîthagia, ûra aatuîkire kaumo ka mûnene na mûrîîthi wa gîîkîrundu ta we Yiesû Kîrîstû.
Gwookubî îbuku rîrî rîkari ûûgû:
Samweri mûgiiti magamba wa Isiraeri 1:1-7:17
Saûrû aatuîka mûnene 8:1-10:27
Mîanka ya mbere ya wathani bwa Saûrû 11:1-15:35
Ndaundi na Saûrû 16:1-30:31
Gûkua wa Saûrû na nthaka ciake 31:1-13