Mboasi aagûra Ruuthu
4
1 Gûgûkea, Mboasi aathi mwîrîgaani wa taûni nagûkara oogo eeteera muntû wa mûciî wao ûra aarî akûgwetera Ruuthu. Akari waagu muntû ûyu aaya akûrûkîîte. Mboasi amwîta amwîra, “Ta ncû aaga bai.” Muntû ûyu aagarûka aaya akara nthî.2 Mboasi eethîrania akûrû îkûmi bara baarî bamwe ba atongoria ba taûni înu abeera, “Ta ncûûni aaga bai.” Baaya baakara nthî. 3 Rîru Mboasi eera muntû ûyu wa mûciî wao, “Mwekûrû ûra Naomi, ûra aracookire kuuma Moabu nakwendia kîthaka kîra kîarî kîa mûruayia Erimereki. 4 Ndarathûgaaniirie ndoona nkwîre wegua nûkwenda gûkîgûra, uuge mbere ya antû na akûrû baba bakari aaga bakîîgagua, wenda gûgîkûûra ûgîkûûre îndî naka waremwa ûûmbîîre n'ûntû gûtirî we ûngî ûbatîîrue gûgîkûûra tatiga woû kana niû nkuumîîte nyuma.”
Muntû ûyu auga, “Ngagîkûûra bai.”
5 Mboasi aacooka amwîra, “Ûmenye îndî wakûûra kîthaka kuuma kîrî Naomi, nwa mwanka ûgûre Ruuthu, mwekûrû ûra ntigwa wa kuuma Moabu kaingo kîthaka gîgaatûûra kîrî kîa ûyu mûkuû atikaaye kûriganîria.”
6 Muntû ûyu akwîgua ûgu auga, “We! Ntigîkûûra n'ûntû ndaûmba kûthûûkia rûgai rwa aana baakwa. Gîkûûre ûrî woû, niû ntirûtha ûgu.”
7 Kagiitaani gaku, naara nthîgûrû ya Isiraeri, rîra antû bagîkûûra kana bagîkûûrana gîntû, kwonania bakûwatanîra baarûthaga ûûgû: Ûmwe aarutaga kîraatû akanenkera ûra ûngî bûrî ûkûûyî bwao. 8 Kwoogu muntû ûyu wa mûciî wa ba Mboasi i bu aarûthire, aaruta kîraatû.
9 Mboasi eera akûrû babu baarî oogo na antû bara bangî bonthe, “Bûrî akûûyî baakwa îmunthî nkîgûrîra Naomi into bionthe bira biarî bia Erimereki amwe na bia Kirioni na Maaroni. 10 Nkûthûkia kinya Ruuthu, ûra wa kuuma Moabu, mwekûrû wa Maaroni. Kuuma îmunthî i mwekûrû wakwa. Ndîrûtha ûûgû kaingo riîtwa rîa mwene rîtikaaye gûtiga kûgwetanîrua na mûciî wao kana antû ba taûni îno bamûriganîrua. Biû îmunthî bûrî akûûyî!”
11 Antû bonthe amwe na akûrû bara baarî gîkarooni gîku beetîgîîria bauga, “Îî bai tûrî akûûyî. Mwathani nathaarime mwekûrû ûyu ûkûgûra ta Raeri na Rea bara baaciarire mûgongo wa Isiraeri. Ûroothagaya Eburatha na ûkagea îgweta Bethireemu yonthe. 12 Mwathani aroothagayia mûciî waku na Ruuthu ta wa Peresi mwana wa Njunda na Tamari.”
Naomi aaciarîrwa mwana
13 Kwoogu Mboasi aagûra Ruuthu aatuîka mwekûrû wake. Mwathani amûthaarima aagîa nda na aaciara kaana ga kaîyî. 14 Eekûrû beera Naomi, “Mwathani arookumua we aatûma ûgîta mûteethia ûra agaakûmenyagîîra. Aroogea îgweta nthî îno ya Isiraeri yonthe. 15 Kaana gaka gagaatûma waanaka na i ko gagaakûmenyagîîra wakûra. N'ûntû mûk'wa mwana ûkwendeete ûûgû nakûrûkîîte nthaka mûgwanja.”
16 Rîru Naomi aathagaana kaana gaku, aatua gûkagwataga agîkamenyagîîra. 17 Eekûrû ba ntûûra nabo bageeta riîtwa Obendi bakiugaga, “Naomi naciarîrîîtwe mwana.” Obendi aarî îthe wa Njesii na Njesii n'we aarî îthe wa Ndaundi.
Rûrîîyo rwa Peresi, kuuma Peresi mwanka Ndaundi
18 Rûrû i ru rûrîîyo rwa mûciî wa Peresi:
Peresi aarî îthe wa Esironi,
19 Esironi aarî îthe wa Ramu.
Ramu n'we aarî îthe wa Aminandabu,
20 Aminandabu aarî îthe wa Naasoni,
Naasoni n'we aarî îthe Sarimoni,
21 Sarimoni aarî îthe wa Mboasi,
Mboasi n'we aarî îthe wa Obendi,
22 Obendi n'we aarî îthe wa Njesii,
na Njesii aarî îthe wa Ndaundi.