Ruuthu arî rwaraani
3
1 Ntugû îmwe Naomi eera Ruuthu atarî, “Inkwona kaaba ngûcwîre muntû wa gûkûgûra. Kaaba ûrî na muntû wa gûkûmenyeera kaingo ûtarîa thîîna. 2 N'wene Mboasi, muntû ûra wa mûciî wetû naara ûrathiiyaga kûringa rûûa na aarî baake ba ngûgî? Îmunthî ûtugû akeegua akîeraga sayiri rwaraani. 3 Ûrîrûtha ûgu, ûthi ûthambe, wake maguta ma mîtaa na wîkîre nguo ira mbega mûno. Rîru ûthi rwaraani, îndî ûtikaareke akwona ataambîîte kwîgaagûra. 4 Warûtha ûgu, ûmûraithîîrie ûtige wamenya i kû amaama. Na watiga woona akûmaama, ûthi ûmûguûre magûrû ûmaame magûrûûni maake. Waarûtha ûgu, agakwîra bûra ûkaarûtha.”5 Ruuthu amûcookeria amwîra, “Nkaarûtha woogu wambîîra.”
6 Ruuthu aathi ara sayiri ciabûûragîrwa aarûtha wa bûra maciarawe aarî akûmwatha.
7 Kwoogu Mboasi aarîîkia kûrîa na kûnyua mwanka mwîrî unthe watambûrûka i mpaa, aathi akubî na kîthûmba gîa sayiri na kûmaama oogo. Ruuthu aaciemeeria mpoora, amûguûra magûrû na amaama oogo. 8 Ûtugû mainda maaganaana, Mboasi amakania nakwindûkîra. Akîthi kwona nwa mûka amaami magûrûûni maake.
9 Mboasi aûria, “Yiî! n'ûrî ûû woû wamaama aaga?”
Ruuthu acookia auga, “I niû Ruuthu. Menya i woû ûbatîîrue ûûmenyeera. Itû aba taambûrûkia nguo yaku ya kwîguîka ûûnguîke na mûthia ûmwe kwonania ûgwîtîgîîria kûûmenyeera.”
10 Mboasi amwîra, “Mwathani nakûthaarime itû mwar'wakwa. Kîao gîkî ûkûmbîgîîrua îîndî i kîo kînene kîrî kîra ûregîîrîîtue mûciî wetû agu mbere. Menyaga ûkîenda, ûgîcwa nthaka îgakûgûra, kinya wegua nwa yîthîrwe îrî ntongu kana îtarî ntongu. 11 Îndî na ûtamaka bûra bunthe wambîîra ngakûrûthîra n'ûntû ûrî mwekûrû ûmwega na antû bonthe taûni îno i baiyî ûgu. 12 Yîî i mma i niû mbatîîrue gûkûmenyeera. Îndî amwe na ûgu, kûrî na ûngî mûkinyu nkûrûki yakwa. 13 Ûrîraara aaga îmunthî, gwakea rûû tûkamûûria wegua agakûmenyeera. Eenda gûkûthûkia nwa bwega. Îndî wona aarega, nkûthiîtia mbere ya Mwathani ngakûthûkia ndî niû. Ta maama gûkîe woû.”
14 Kwoogu Ruuthu amaama waagu magûrûûni ma Mboasi. Mbere gûtirereerûka cwe, aûka n'ûntû Mboasi namwîrîîte ateendaga antû bamenya kana kûrî mûka ûrakinya agu rwaraani. 15 Rîru Mboasi amwîra, “Tambûrûkia gîkoi gîku gîaku.” Mboasi aarûma mîthûmba îthanthatû ya sayiri amwîkîîra, rîru amwaîkia. Nyuma ya ûgu Ruuthu aacooka bwa taûni.
16 Ruuthu akwînûka, maciarawe amûûria, “I ka kûthiire ata mwan'wakwa?” Ruuthu n'we amwîra bunthe bûra Mboasi arî akûmûrûthîra. 17 Ruuthu amwîra, “Agûmpa mîthûmba îno îthanthatû ya sayiri na ambîîra nkûretere, atikwendaga ngûkinya maara mpî.”
18 Naomi amwîra, “Mwan'wakwa, ûkoona bûra akaarûtha, îmunthî atiinogoka atarîîkîîtie mantû mamu maaku monthe.”