AGIITI MAGAMBA
Mantû ma îbuku rîrî
Kûringana na wîthîre îbuku rîrî rîandîkîîtwe i kîroria Samweri. Nwa wîgue rîaringithangiirue i mûrutwa ûmwe wake n'ûntû kûriingana na 1:2 rîariikiirie kwandîkwa kagiita ka mûnene Saûrû kana Ndaundi kagiita kara Aanjebusi baarûngiirue bauma Njebusi (îra Nyumaani yacokire gwîtagwa Njerusaremu).
Îbuku rîrî rîrîarîîria kagiita ta ka mîanka magana mathatû ma mîrongo îtaano na itaano kuuma gûkua kwa Njosua mwanka gûkua gwa Samusoni. Kagiitani gaka gûtaarî na watho Isiraeri, antû baakoobagia mîtugo ya mîgongo îra îîngî batûûranîîre n'yo na bakîrûaga n'yo.
Kagiita gaka Aisiraeri baathagwa na n'agiiti magamba na n'wabo baarî atongoria ba njûûrî cia ndûa. Kwoogu ngûgî yao îra nene mûno yaarî kûrûa na kwîngatia anthû na gûcookanîîria watho îndî bataûmbanaga ûntûûni bûbû bwega.
Nyuma ya kagiita ka agiiti magamba Aisiraeri batongoriirue i kîroria Samweri na nyuma yake i rîo baagîîre na mûnene wao wa mbere ûra eetagwa Saûrû.
Îbuku rîrî rîarîîrîîtie mantû mara Aisiraeri baatûûraga kûthiûrûûkania namo: Kûrega kwathîkîra Ngai, Ngai kûbakaanûkia na njîra ya kûrekeeria mîgongo îra îîngî îkabaithûkîra, bûra antû baarîragîra Ngai abateethia, na mûthiani bûra Ngai ateethagia antû baake. Mantû mama monthe i matwonagia yerekeria rîa îbuku rîrî, “Gwîtîgîka na wendo bwa Ngai bwa kwonokia antû baake bakari wa ûgu bakari.” Îbukuuni rîrî Ngai oonanîîtue arî mûkûûri na mûgiiti magamba.
Gwookubî îbuku rîrî rîkari ûûgû:
Mantû mwanya mwanya mwanka gûkua kwa Njosua (1:1-2:10)
Agiiti magamba ba Isiraeri (2:11-16:31)
Mantû mwanya mwanya (17:1-21:25)