Mîbuanaano ya Mika
17
1 I kwarî muntû ûmwe wa nthî îra îrî irîma ya Eburaimu, eetagwa Mika. 2 Eera gina, “Ûkwiywa sekeri ngiri îmwe na îgana cia fetha i muntû ûmwe, n'warumire mwamba ûyu nkîîgagua. Raitha, wone i ciino ndî nacio. I niû ndaathûkiirie.” Gina n'we amwîra, “Mwathani arookûthaarima mwan'wakwa.” 3 Aacookeria gina mbeca inu, na gina auga, “Îîndî i nkwathûrîra Mwathani fetha ino kûrû. Igaatûmîka kûrûtha mûbuanaano wa ngai ya gûcaa na ngai ya yûûmba. Kwoogu îîndî ga nkûnenkere cio ûrî woû.” 4 Rîru aacookeria gina fetha inu kaîrî. Gina aathûkia icuncî magana maîrî bia fetha aanenkera mûturi wa fetha. Mûturi ûyu n'we aarûtha ngai ya mûbuanaanoa wa gûcaa nacio na ûngî warûthîîtwe na fetha îkanjûkîîtue. Na mîbuanaano înu yaigwa nyomba ya Mika. 5 Muntû ûyû eetagwa Mika n'aarî na nyomba ya kûgongagîrwa ngai.b N'we aarûthire Efondi na Terapimu. Na aathuura ûmwe wa aana baake amûtuîkithia mûthînjîri wa ngai. 6 Kagiitaani gaku gûtaarî na mûnene Isiraeri; muntû wonthe aarûthaga bûra oonaga bwagîrîîte meethooni maake.7 Kagiitaani wa gaku i kwarî na mûthaka waumîîte Bethireemu nthî ya Njunda wa mûciî wa Njunda, n'we aarî Mûrawi,c n'we aatûîre ku arî mûgeni. 8 Na auma agu taûni ya Bethireemu nthî ya Njunda aathi gûceria bantû angî atûûra. Athiîte woogu, aakinya kwa Mika mûciî nthîgûrû îrî na irîma ya Eburaimu. 9 Mika amûûria, “I kû uumîîte?” N'we amûcookeria amwîra, “Niû ndî Mûrawi kuuma Bethireemu nthî ya Njunda. Na i ka ngûceria bantû a gûtûûra.” 10 Mika amwîra, “Tûtûûranie aaga. Wîgue ûrî ta baaba na mûthînjîri wa ngai, na ngakweyaga sekeri îkûmi cia fetha wa mwanka, na nguo cia gwîkîra, na bia kûrîa. Rîru Mûrawi ûyu aathûngîra.” 11 Mûthaka ûyu Mûrawi eetîgîîria gûkara na Mika na aakara ta mwana wake wengwa. 12 Mika amwathûra aatuîka mûthînjîri wa ngai yake. Na aakaraga kwa Mika mûciî. 13 Rîru Mika auga, “Îîndî inkûmenya Mwathani agaatûma mantû maakwa makara bwega n'ûntû ndî na Mûrawi ta arî mûthînjîri wa ngai yakwa.”