Samusoni arî Gasa
16
1 Ntugû îmwe Samusoni n'aathiire Gasa, oona îrwaya noogo, na aamaama narîo. 2 Ntheto ciataamba na antû ba Gasa beerwa “Samusoni arî aaga!” kwoogu bamûcîgîîria baaraara bamûgiitîrîîte ûtugû bunthe mwîrîgaani wa taûni înu. Baareere bakiri ûtugû bunthe bakîîranaga, “tûrîeteera mwanka rûkîîrî tûmûûrage.” 3 Îndî Samusoni n'we aamaamire mwanka ûtugû gatîgatî, aûkîîra aagwata mîrango ya mwîrîga wa taûni înu amîkûûra yonthe amwe na mbureemu ciayo na mîrîîgo mîene amîîkîra gîturo aathi n'yo mwanka kîrîmaani kîra kîerekanîrîte na Eburoni kûra îgûrû kathûmbîri.Samusoni na Nderira
4 Nyuma ya ûgu, Samusoni eenda mwarî wa kuuma kîbondeeni kîa Soreki, eetagwa Nderira. 5 Nabo atongoria ba Afirisiti baathi kîrî Nderira bamwîra, “Mweneerie ûmenye inya înu yake îneneete ûgu i kû yumaga, na n'ata tûûmba kûrûtha tûkamûgwata tûkamûthaîka kaingo tûthiria inya înu yake. Na warûtha ûgu, kîra ûmwe wacietû agakwa sekeri ngiri îmwe na îgana cia fetha.”
6 Kwoogu Nderira eera Samusoni, “Î ta mbîîra i kû ûrutîîte inya îgana ûûgû. Ûkaaya kwîgua muntû nakwenda gûkûthaîka akûthiria inya înu yaku rî, n'ata aûmba kûrûtha?” 7 Samusoni n'we amwîra, “Bûkaaya kûnthaîka na nga imbîthî mûgwanja, nthira inya ngakara ta antû bara bangî.” 8 Kwoogu atongoria babu ba Afirisiti baaretera Nderira nga imbîthî mûgwanja, na aathaîka Samusoni nacio. 9 Kûrî antû Nderira aithîîte kanyombaani kamwe gûku beeteereete. Na augîîria na inya amwîta, “Samusoni! Afirisiti bakûûya gûkûgwata!” Agûkutha nga inu, ciagiitûkire wa ta bûra rûrigi rûkaraga rwekîrwa mwankiini. Kwoogu bataamenya witho bwa inya yake.
10 Rîru Nderira eera Samusoni ata rî, “Woû ûrambonire ndî kîaa wambeneeria. Îîndî ta mbîîra bûra ûûmba kûthaîkwa ûtatharie.” 11 Samusoni amwîra, “Ûkeegua banthaîka na mîkanda îtaarotûmîka kaîrî, nthira inya ngakara ta antû bara bangî.” 12 Kwoogu Nderira aathûkia mîkanda yaimbia amûthaîka n'yo. Akûmûthaîka, amuugîîria, “Samusoni! Afirisiti bakûûya gûkûgwata!” Kûrî antû baithîîtwe kanyombaani kangî beteereete. Îndî n'we aakuthire mîkanda înu yatuîkanga ta ndigi cia nguo yauma njara.
13 Nderira eera Samusoni, “Mwanka agu îîndî ûûntuîkithîîtie kîaa, nwaka ûkûmbenia wa bûra ûkwenda. Ta mbîîra bûra ûûmba kûthaîkwa ûtatharie.” Samusoni amwîra, “Ûgatumanîîria iringa mûgwanja bia ntundu cia kîongo gîakwa na ndigi cia nguo ta mûgeka, rîru ûciringîre rûthingooni na kîango,a nwa nthire inya ngakara ta antû bara bangî.” 14 Kwoogu Samusoni amaami toro, Nderira aathûkia iringa bibu mûgwanja bia ntundu cia kîongo gîa Samusoni na atumanîîria na ndigi cia nguo, airingîra rûthingooni na kîango rîru amwîta amwîra, “Samusoni Afirisiti bakûûya gûkûgwata!” Aûkîîra auma torooni, etuunyûra kuuma kîrî kîango, kînyamû kîra gîatumanîîtie na ndigi.
15 Nderira amwîra, “N'ata ûûmba kuuga n'ûmbendeete, na bûra ûkuuga bûtirî nkorooni yaku? Rîrî i rîo rîa mathatû ûgîntuîkithagia kîaa gîaku, na mwanka agu ûtirambîîra ara ûkûruta inya îno yaku înene ûûgû.” 16 Na agûkara akîmûremagîîria mantû mamu wa kîra ntugû, Samusoni aanyamaara mûno nkorooni yake mûgendi wa gûkua. 17 Na i rîo eerire Nderira ûmma bungwa. Amwîra, “Ntundu yakwa îtaaro enjwa, n'ûntû ntwîre ndî Mûnasiri wa Ngai kuuma gûciarwa. Nkaaya kwenjwa, inya yakwa nwa îmbuumire, na nkathira inya, na ngîkara ta antû bara bangî.”
18 Nderira akûmenya Samusoni aamwîrire ûmma, aatûmanire kîrî atongoria ba Afirisiti akiugaga, “Ta cookaani kaîrî rîmwe akî, n'ûntû akûmbîîra ûmma bwa mantû monthe.” Atongoria babu ba Afirisiti baaya kîrî we, bagwete mbia na njara. 19 Nderira eneeria Samusoni amaama amaamîîrîtie kîongo bierooni biake, na eeta muntû aaya kûmwenja mîîndo îra mûgwanja ya ntundu ciake. Kwoogu anjîîria kûmûûmba na inya yake yathira yonthe.b 20 Rîru amuugîîria akîmwîraga, “Samusoni, Afirisiti bakûûya gûkûgwata!” Agûûka torooni athûgaania, “Ndiumagarûka ome ta wîthîre ndîburunce nthi.” N'we ataamenyaga kana Mwathani n'aamûtiganîrîîtie. 21 Rîru Afirisiti bamûgwata bamûtûraanga meetho, na bamwîndamia mwanka Gasa, bamwîkîra mpengû cia rûthuku, na aatûûra kûthiaga naagu nceera. 22 Ntundu cia kîongo gîake cianjîîria gûkûra kaîrî.
Gûkua gwa Samusoni
23 Îîndî atongoria babu ba Afirisiti beethîrana amwe barutîra ngai wao Ndagoni kîgongwana kîînene na gûkûngwîra. Baugaga, “ngai wetû akûneenkanîra Samusoni mûnthû wetû njarani cietû!” 24 Na antû bakûmwona, baakumia ngai wao bakiugaga, “ngai wetû agûtûgwatithia mûnthû njaraani cietû, we ûra areenyangagia nthîgûrû yetû na aûragîîte antû beetû baingî mûno.” 25 Wabathiîte na mbere gwîkenia, bauga, “Samusoni n'eetwe aaga aaye atûkenie.” Kwoogu Samusoni eetwa kuuma nceera, na abakenia arî agu mbere yao. Baamûrûngamîîtie gatîgatî ga itugî bia nyomba înu baarî. 26 Rîru Samusoni eera mûthaka ûra aamûgwete mûtî, “Ta ngwatithia itugî bira bitiirîîte nyomba îno, kaingo ndîtiira nabio.” 27 Nyomba înu ya ngai yaûyûri antû teke. Atongoria bonthe ba Afirisiti baarî ku. Na rûûgûrû ya nyomba i kwarî na antû ta ngiri ithatû arûme na aka, bara baaraithîîrîîtie Samusoni akîbakenia.
28 Rîru Samusoni aaromba Mwathani akiugaga, “Îî Mwathani Mwene Inya, ndirikana. Ingûkûromba Ngai ûmpe inya, ndîkûromba îgiita rîrî rîmwe rîonka, kaingo ndîrîîria nwa rîmwe kîrî Afirisiti n'ûntû bwa gûntûra meetho maakwa monthe.” 29 Kwoogu Samusoni eegwatîra itugî biîrî bia gatîgatî bira biatiirîîte nyomba înu, eetiira nabio, njara ya ûrîo îgwete gîtugî kîmwe n'ya kîmotho n'yo îgwete kîra kîngî. 30 Samusoni auga, “Gankuuyanîrie na Afirisiti.” Aatiindîka itugî bibu na inya yake yonthe, na nyomba înu yaturana nthî yagwîra atongoria babu ba Afirisiti na bonthe bara baarî ndeeni. Samusoni agîkua, aathiriirie antû baingî nkûrûki ya bara aûragîîte îgiita rîra aarootûûra mwoyo. 31 Rîru aruagina na antû ba mûciî wao bonthe baaya baakamata mwîrî wake baathi nau bauthika gatîgatî ga Sora na Esitaori nthikooni ya îthe Manoa. Aarî mûgiiti wa magamba naagu Isiraeri bantû a mîanka mîrongo îîrî.